ރައްޔިތުންގެ މަޖިލީހުގެ މެންބަރުން އިންތިހާބުވާ ޕާޓީން ވަކިވުމުން މެންބަރުކަމުގެ ގޮނޑި ގެއްލޭ ގޮތަށް އެކުލަވާލާފައިވާ އެންޓި ޑިފެކްޝަން ބިލުގެ މަސައްކަތް ވަގުތީ ކޮމިޓީއިން ނިންމައިފިއެެވެ.
ބިލްގެ މަސައްކަތް ކުރިޔަށް ގެންދިޔަ ވަގުތީ ކޮމިޓީގެ މެމްބަރަކު "ޚަބަރު އޮންލައިން"އަށް މައުލޫމާތު ދިން ގޮތުގައި މިބިލް އިއްޔެ ވަނީ ކޮމިޓީން ދިރާސާކޮށް ނިންމާފައެވެ. އޭނާ ވިދާޅުވި ގޮތުގައި އަންނަ ހަފާތާގެ ހޯމަ ދުވަހު އޮންނަ ޖަލްސާގައި ކޮމިޓީ ރިޕޯޓަށް ބަހުސްކޮށް، އަދި އެދުވަހު ބިލް ތަޅުމުން ފާސްކުރާނެއެވެ.
މަޖިލިހުގެ މިހާރުގެ ކޮމްޕޮޒިޝަނަށް ބަލާއިރުވެސް، މަޖިލިހުގެ ސިމްޕަލް މެޖޯރިޓީ އެމްޑީޕީއަށް އޮތުމުން ބިލް މަޖިލީހުން ފާސްވާނެކަމަށް ބެލެވެއެވެ. އެއަށްފަހު ބިލް ތަސްދީގު ކުރެއްވުމަށް ރައީސުލުންޖުމުހޫރިއްޔާއަށް ފޮނުއްވުމަށްފަހު، ބިލް ތަސްދީގު ކުރައްވަން ރައީސް މުއިއްޒުއަށް ލިބިވަޑައިގެންނަވާނީ 15 ދުވަހުގެ މުއްދަތެކެވެ.
އެމުއްދަތުގައި ބިލް ތަސްދީ ނުކުރައްވާނަމަ އަނބުރާ މަޖިލީހަށް ފޮނުއްވަން ޖެހޭނެއެވެ. ދެވަނަފަހަރަށް ބިލް އޮތްގޮތަށް ފާސްކޮށް ރައީސަށް ފޮނުވައިފިނަމަ، ބިލް ތަސްދީގު ކުރައްވަން ރައީސް މުއިއްޒުއަށް ލާޒިމް ވާނެއެވެ.
ރައްޔިތުންގެ މަޖިލިހުގެ މެންބަރުންގެ ގޮނޑި ގެއްލޭ ގޮތަށް އެންމެ ފުރަތަމަ އެންޓި ޑިފެކްޝަން ގާނޫނެއް ފާސްކުރީ 18 ވަނަ ރައްޔިތުންގެ މަޖިލިހުގައެވެ. އެހެންނަމަވެސް އެ ގާނޫނު އޭރު ފާސްކޮށްފައިވަނީ ވަކި މެމްބަރުންތަކަކަށް އަމާޒު ކޮށްފައެވެ.
އެއާއެކު، ސަރުކާރު ބަދަލުވުމާއެކު އެގާނޫނު ވަނީ އުވާލާފައެވެ.
މި ފަހުން އެމްޑީޕީގެ ގިނަ އަދަދެއްގެ މެންބަރުންތަކެއް ސަރުކާރު ހިންގާ ޕާޓީ ޕީއެންސީ އާ ގުޅިވަޑައިގަތުމާއި ގުޅިގެން އެންޓި ޑިފެކްޝަން ބިލް ފާސްކުރުމަށް ގޮވާލާ އަޑު ވަނީ ގަދަވާން ފަށާފައެވެ.
މި ބިލާއި ގުޅޭގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ތުޅާދޫ ދާއިރާގެ މެންބަރު ހިސާން ހުސެއިން ވިދާޅުވީ ކުރިން އޮތް ގާނޫނުގެ އެންމެ ބޮޑު އެއް މައްސަލައަކަށްވީ ސިޔާސީ ޕާޓީއަކުން މެންބަރު ވަކި ކުރާހިސާބުން އެ މެންބަރެއްގެ ގޮނޑި ހުސްވާގޮތަށް އޮތުމެވެ.
ހިސާން ވިދާޅުވީ އެހެންނަމަވެސް، މިހާރު މަޖިލީހަށް ވެއްދި ބިލުގެ ތަފާތަކީ ސިޔާސީ ޕާޓީއަކުން ވަކި ކޮށްފި ނަމަ އެ ދާއިރާގެ ރިކޯލް ވޯޓަކަށް އިލެކްޝަންސް ކޮމިޝަން (އީސީ) އިން ދާން ޖެހުމެވެ. އަދި މެމްބަރެއްގެ ގޮނޑި ގެއްލޭނީ ދާއިރާގެ ރައްޔިތުން އޭނާ އަށް ނޫނެކޭ ބުނެފި ނަމަ ކަމަށްވެސް ހިސާން ވިދާޅުވިއެވެ.
ސިޔާސީ ޕާޓީތަކުގެ މައްޗަށް މެންބަރުންގެ ފުލް ކޮންޓްރޯލް ނޯންނަ ގޮތަކަށް ނަމަވެސް ރައްޔިތުންގެ މި ކަންބޮޑުވުމަށް ވެސް އަޅުގަނޑުމެންނަށް އެޑްރެސް ކުރެވޭ ގޮތަށް މިހާރު މި ބިލް ފަރުމާ ކުރެވިފައި މި އޮތީ،" ހިސާން ވިދާޅުވި އެވެ.
އެމްޑީޕީއަށް މަޖިލީހަށް ހުށަހަޅާފަ އޮތް ބިލުގައިވާގޮތުން މެންބަރު އަމިއްލަ އަށް ޕާޓީން ވަކިވެއްޖެ ނަމަ އޭނާ ގޮނޑިން އިސްތިއުފާ ދެއްވަން ޖެހޭނެ އެވެ.
