މި އަހަރުގެ ފިޠުރު ޢީދު ނަމާދު ބޮޑުޖަމާޢަތުގައި، މާލެ، ހުޅުމާލެ އަދި ވިލިމާލޭގައިވެސް ކުރާގޮތަށް އިސްލާމިކް މިނިސްޓްރީން ހަމަޖައްސައިފިއެވެ.
އެ މިނިސްޓްރީން ކުރި އިއުލާނެއްގައި ބުނެފައިވަނީ، 1445 އަހަރުގެ ފިޠުރު ޢީދު ނަމާދު ބޮޑުޖަމާޢަތުގައި ކުރުމަށް ހަމަޖެހިފައިވަނީ، މާލޭގައި މާފަންނު ސްޓޭޑިއަމް، ވިލިމާލޭގައި ފުޓްބޯޅަ ދަނޑު އަދި ހުޅުމާލެ ސިންތަޓިކް ޓްރެކާއި، ހުޅުމާލެ ފޭސް2ގެ ކްރިކެޓް ސްޓޭޑިއަމް، އިސްލާމީ މަރްކަޒާއި، މަރުކަޒުގެ ސަރަޙައްދު އަދި ކިންގް ސަލްމާން މިސްކިތާއި، އެމިސްކިތުގެ ސަރަހައްދުގައި ކުރުމަށް ހަމަޖެހިފައިވާ ކަމުގައެވެ.
އެގޮތުން މިނިސްޓްރީން މިހާރުވަނީ ބޮޑު ޖަމާއަތުގައި ކުރާ ޢީދުނަމާދަށް ތައްޔާރު ކުރުމުގެ މަސައްކަތުގައި އުޅުއްވާ ބޭފުޅުންގެ ކެއުމާއި ސައި ތައްޔާރުކޮށްދޭނެ ފަރާތެއް ހޯދުމަށާއި، އަދި މި ތަންތަނުގައި ސައުންޑް ހަމަޖައްސައިދޭނެ ފަރާތެއް ހޯދންވެސް އިއުލާން ކޮށްފައެވެ.
ޢީދު ނަމާދަށް ދާއިރު ސަމާލުކަން ދޭންވީ ކަންތައްތަކުގެ ތެރޭގައި:
- – ގެއިން ވުޟޫކޮށްގެން އައުން.
- – އަމިއްލަ މުސައްލައެއް ގެންދިއުން
- – އަމިއްލަ ފެންފުޅިއެއް ގެންދިއުން.
- – ފައިވާންލާނެ ކުޑަ ދަބަހެއް ނުވަތަ ކޮތަޅެއް ( ދަބަސް/ކޮތަޅު ޕްލާސްޓިކް އެއްޗަކަށް ނުވުން).
އިސްލާމިކް މިނިސްޓްރީން ދަނީ މިއަހަރުގެ އީދު ނަމާދުކުރާ ގަޑި ހެނދުނު 7:00 އަށް އަވަސް ކުރުމަށް މަޝްވަރާތައް ކުރިޔަށް ގެންދެމުންނެވެ.
