ނުކުޅެދުންތެރިކަން ހުންނަ މީހުންނާއި ކުދިންނަށް ހާއްސަކޮށްގެން ދައުލަތުގެ މީޑިއާ "ޕީއެސްއެމް"އިން ގެނެސްދެމުންދާ "އިޙުސާސް" ޕްރޮގްރާމްގައި އެޕްރޮގްރާމްގެ ޕްރެސެންޓަރ މަރިޔަމް ނަމްޒާ ދެއްކި ވާހަކަތަކަށް ބެލުންތެރިންގެ ފާޑުކިޔުން އަމާޒުވި ނަމަވެސް އެ ޕްރޮގްރާމް ހުއްޓާ ނުލާނެކަމަށް ޕީއެސްއެމްއިން ބުނެފިއެވެ.
ކޮންމެ ރޯދަމަހަކުވެސް ޕީއެސްއެމްއިން ގެނެސްދެމުންދާ "އިޙުސާސް" ޕްރޮގްރާމް ސިލްސިލާކޮށް ކުރިޔަށް ގެންދަމުންދާތާ މިއީ 4 ވަނަ އަހަރެވެ. އެ ޕްރޮގްރާމް ހުށަހަޅާދެމުންދަނީ ޓީވީ ޕްރެސެންޓަރެއް ކަމުގައިވާ، މި ސަރުކާރުގެ ޖެންޑާ މިނިސްޓްރީގެ ނައިބުގެ މަގާމް އަދާކުރައްވަމުން ގެންދަވާ މަރިޔަމް ނަމްޒާއެވެ.
މި ޕްރޮގްރާމަށް ބައެއް ފަރާތްތަކުގެ ފާޑުކިޔުން އަމާޒުވީ މިއަހަރުގެ ފުރަތަމަ ޕްރޮގްރާމްގައި، ނުކުޅެދުންތެރިކަން ހުންނަ ކުއްޖަކަށް ނިސްބަތްކޮށް، ދައްކައިގެން ނުވާނެ ބީދައަކުން ނަމްޒާ ވާހަކަ ދައްކާފައިވާކަމަށް ބުނެއެވެ.
މިކަމާ ގުޅިގެން ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރު ވިދާޅުވީ ފާޑުކިޔުން އަމާޒުވި ނަމަވެސް އެ ޕްރޮގްރާމް ހުއްޓާލަން ނުނިންމާ ކަމުގައެވެ، އެހެންނމަވެސް މިކަމުގައި ހުރި ކަންބޮޑުވުންތައް އެ ޕްރޮގްރާމް ހުށަހަޅައިދޭ ފަރާތާއި ހިއްސާކޮށްފައިވާ ކަމަށް އޭނާ ވިދާޅުވިއެވެ. އަދި އޭނާ ވިދާޅުވީ، ޕީއެސްއެމްގެ ކޮންޓެންޓް ކޮމިޓީއިން ވަރަށް ރަނގަޅަށް ބެލުމަށްފަހު ޕްރޮގްރާމް ކުރިޔަށް ގެންދާނެކަމުގައެވެ.
މި ރޯދަމަހުގެ ފުރަތަމަ ޕްރޮގްރާމްގައި ނަމްޒާ ދެއްކެވި ވާހަކަތަކާއި ގުޅިގެން ސޯޝަލް މީޑިއާގައި ފާޑުކިޔުން އަމާޒުވާން ފެށުމުން އޭނާވަނީ އޭނާގެ އެކްސް ހޭންޑްލް ޑިއެކްޓިވޭޓްވެސް ކޮށްފައެވެ.
