ޕްރައިވެޓް އިންސޫރަންސްތަކުގައި އާންމު ފަރުދުންނަށް ކުރިމަތިވާ މައްސަލަތައް ހައްލު ކުރުމަށް މަސައްކަތް ކުރާނެ ކަމުގައި ރައީސް ޑރ. މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރައީސް އޮފީހުން ގެނެސްދޭ "ރައީސްގެ ޖަވާބު" ސިލްސިލާގެ މިއަދުގެ ސެގްމަންޓުގައި ގދ.ގައްދޫ، ގުލްޒާރުވާދީ، ޙުސައިން ތައުފީޤް، އަމިއްލަ ފަރުދުންނަށް ހެލްތު އިންޝުއަރެންސްގެ ޚިދުމަތް ހޯދުމުގައި އިތުރު ލުއިފަސޭހަ ލިބޭނެ ގޮތަކާމެދު ދެންނެވި ސުވާލަށް ދެއްވި ޖަވާބުގައެވެ.
ޙުސައިން ތައުފީޤް ކުރި ސުވާލަކީ އިންސާރަންސްއިން ފައިސާ ލިބެނީ ޚިދުމަތް ހޯދުމަށްފަހު ފަހުން ބިލްތައް ހުށަހަޅައިގެން ކަމަށާއި، ފައިސާ ލިބޭކަންވެސް އިނގެނީ ބިލްތައް ހުށަހެޅުމުން އެތައް ދުވަހެއް ފަހުން ކަމަށެވެ. އޭނާ އެދުނީ އެކަން އެއަށްވުރެ ރަގަޅު ގޮތަކަށް ހަމަޖައްސައި ދިނުމަށެވެ.
ޙުސައިން ތައުފީޤްގެ ސުވާލުގެ ޖަވާބުގައި ރައީސް ވިދާޅުވީ ހެލްތު އިންޝޫރަންސްގެ ކަންކަމަކީ ވަކި އުސޫލަކުން ހަމަޖެހިފައި އޮންނަ ކަމެއް ކަމަށާއި، އޭނާގެ ކަންބޮޑުވުންތަކާއި ގުޅޭގޮތުން ކަމާއިގުޅޭ އިދާރާތަކުގައި ދަންނަވާނެ ކަމަށެވެ.
އާދެ، އިންޝޫރަންސްގެ ނިޒާމަކީ ވަކި ގޮތަކަށް ވަކި އުސޫލުތަކެއް ކަނޑައެޅިފައި އޮންނަ ކަމެއް ވީމަ، ތިވިދާޅުވި ކަންތަކުގަ އަޅުގަޑު މަޝްވަރާ ކުރާނަން އިނގޭތޯ، ކަމާބެހޭ އިދާރާތަކުގަ ދަންނަވާލާނަން މިހާރަށްވުރެ ރަގަޅު ގޮތަކަށް، ޚާއްސަކޮށް އާންމު ފަރުދުން އިންޝޫރަންސްގެ ނިޒާމުގެ ތެރޭގައި ބައިވެރި ވެގެން ކުރިޔަށް ދާއިރުގަ ތި ވިދާޅުވި ގޮތަށް އޮތުމަށްވުރެ ރަގަޅުގޮތަކަށް އެކަން ހަމަޖެއްސޭނެ ގޮތެއް ވޭތޯ ކަމާބެހޭ އިދާރާތަކުގެ ދަންނަވާނަން އެކަން ބަލައިދީ އެކަން ރަގަޅު ގޮތަކަށް ހަދައިދިނުމަށް.
ރައީސް ވިދާޅުވިއެވެ.
