މާލެ ސަރަހައްދުގައި އެއްގަމުގައި ދުއްވާ އުޅަނދު ގިނަވެ މަގުތައް ތޮއްޖެހިފައިވާތީ، އެކަމަށް އަވަސް ހައްލެއް ހޯދުމަށް ޓްރާންސްޕޯޓު މިނިސްޓްރީއާއި، މޯލްޑިވްސް ޕޮލިސް ސާވިސްއާއި، މާލޭސިޓީ ކައުންސިލާއި، އެޗްޑީސީއާއި، ވެމްކޯއާއި، ހޯމް މިނިސްޓްރީގެ އިތުރުން އާރުޑީސީ ގުޅިގެން ކުރިޔަށްގެންދާ، މާލެ އަދި ހުޅުމާލޭގެ މަގުތަކުގައި ބޭނުންނުކޮށް ގިނަ ދުވަސްވަންދެން ބަހައްޓާފައި ހުރި އުޅަނދުތައް މަގުތަކުން ނެގުމުގެ މަސައްކަތުގެ ތެރެއިން، މާލެއާއި ހުޅުމާލޭގެ މަގުތުގައި ބޭނުން ނުކޮށް ހުރި 281 އުޅަނދު މިހާތަނަށް ނައްތާލާފައިވާ ކަމުގައި ޓްރާންސްޕޯޓު މިނިސްޓްރިން ބުނެފިއެވެ.
އެމިނިސްޓްރީން ކުރި އެކްސް ޕޯސްޓެއްގައި ބުނެފައިވަނީ ޓްރެފިކް ޑިކޮންޖެސްޝަން ޕްރޮގްރާމުގެ ދަށުން މި ހަފްތާގެ ބުރާސްފަތި، ހުކުރު އަދި ހޮނިހިރު ދުވަހު ކުރެވުނު މަސައްކަތުން ގިނަ ދުވަސްވަންދެން ބޭނުންނުކޮށް މާލެ އަދި ހުޅުމާލޭގެ މަގުތަކުގައި ބަހައްޓާފައިހުރި އުޅަނދު ތަކުގެ ތެރެއިން ޖުމްލަ 123 އުޅަނދު ވަނީ ނައްތާލެވިފައި ވާކަމުގައެވެ. އަދި މި ޕްރޮގްރާމުގެ ދަށުން މިހާތަނަށް ޖުމުލަ 281 އުޅަނދު ވަނީ ނައްތާލެވިފައި ކަމަށްވެސް އެމިނިސްޓްރީން ބުނެފައި ވެއެވެ.
ޓްރާންސްޕޯޓް މިނިސްޓްރީ އާއި މާލޭ ސިޓީ ކައުންސިލާއި ފުލުހުންނާއި ވެމްކޯ އާއި އެމްޓީސީސީ އާއި އެޗްޑީސީ ގުޅިގެން ކުރިއަށްގެންދާ ޕްރޮގްރާމް އިންޑަސްޓްރިއަލް ޒޯނުގައި ބޭއްވި ރަސްމިއްޔާތު ފައްޓަވައިދެއްވަމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ އެ ޕްރޮގްރާމްއަކީ ކުރިއަށް އޮތް މާޗް މަހުގެ ނިޔަލަށް ކުރިއަށްގެންދަން ނިންމާފައިވާ މަސައްކަތެއްކަމަށެވެ.
ޕްރޮގްރާމުގެ ފުތަރަމަ ބައެއްގެގޮތުގައި މާލޭ އެކި ހިސާބުގައި ހުރި ވެހިކަލްތައް ނައްޓާލުމުގެ މަސައްކަތް ފަށާފައިވާރު އެ ފަދަ އުޅަނދުތައް ނައްތާލުމަށް އެދުމުގެ ފުރުސަތު ވެސް ހުޅުވާލާފައިވާއިރު އެކަމަށް އެދި ލިބޭ ހުށަހެޅުންތައް ބަލައި ސައްހަ ހުށަހެޅުންތަކުގައިވާ އުޅަނދުތައް ނައްތާލާނެ ކަމަށްވެސް ޓްރާންސްޕޯޓް މިނިސްޓްރީން ބުންޏެވެ.
ޓްރާންސްޕޯޓް މިނިސްޓްރީން ބުނީ މިއީ އެއްގަމު އުޅަނދު ތޮއްޖެހުމުގެ ސަބަބުން މާލެ ސަރަހައްދުގެ ޓްރެފިކް ފްލޯއަށް ދިމާވެފައިވާ މައްސަލަތަކަށް ހައްލު ހޯދުމަށް މިނިސްޓްރީން ކުރާ މަސައްކަތެއް ކަމަށެވެ. މާލެ އާއި ހުޅުމާލޭގެ މަގުތަކުގައި ބޭނުންނުކޮށް ގިނަދުވަސްވަންދެން ގަވާއިދާ ހިލާފަށް ބަހައްޓާފައިވާ އުޅަނދުތައް ދެނެގަނެ ހަމަޖެހިފައިވާ އުސޫލުގެ ތެރެއިން އެ އުޅަނދުތައް މަގުމަތިން ނަގާ ނައްތާލާނެ އެވެ.
