އިޒްރޭލަށް މިހާރުން މިހާރަށް ހަތިޔާރު އެޅުން މަނާކުރުމަށް ރާއްޖެއިން ގޮވާލައިފިއެވެ.
ރާއްޖެއިން މިކަމަށް ގޮވާލީ އދ.ގެ އާންމު މަޖިލީހުގެ ޕްލެނަރީ މީޓިންގައި "ޔޫޒް އޮފް ދަ ވީޓޯ" ގައި ޗާރޖޭ ޑި އެފެއާޒް ސަފީރު ޑރ. އަލީ ނަސީރު މުހައްމަދު މިއަދު ދެއްވި ބަޔާނެއްގައެވެ. ޗާރޖޭ ޑި އެފެއާޒް، އެމްބެސެޑަރ ޑރ. އަލީ ނަސީރު މުހައްމަދު މިއަދު ދެއްވި ބަޔާނުގައި ވިދާޅުވީ، ފެބްރުއަރީ މަހުގެ 20 ވަނަ ދުވަހު އދ.ގެ ސަލާމަތީ މަޖިލީހުގައި އެންމެ ފަހުން ވީޓޯ ކުރުމުން އިސްރާއީލަށް ލައިސަންސް ދީފައިވަނީ 29 ފެބްރުއަރީގައި ހިނގި ހާދިސާގައި ފަލަސްޠީނުގެ ސަތޭކައަށްވުރެ ގިނަ އާންމުން ޝަހީދުކޮށް، އެތައް ސަތޭކަ ބަޔަކު ޒަޚަމްކޮށްލުމުގެ ލައިސަންސް ކަމަށެވެ.
އެ ދުވަހު ވެސް އަދި އޭގެ ފަހުން ވެސް އިޒްރޭލުން މަރާލި އާންމުންނަކީ ކާބޯތަކެއްޗާއި ފެނާއި އެހެނިހެން ޒަރޫރީ ބޭނުންތަކުން މަހްރޫމްވެފައިވާ މީހުން ކަމަށް ރާއްޖެއިން ބުންޏެވެ.
ފަލަސްތީނުގައި އިސްރާއީލުން ހިންގަމުންދާ ޖަރީމާތައް ހުއްޓުވުމަށް ސަލާމަތީ މަޖިލީހުން އަވަސް ފިޔަވަޅުތަކެއް އެޅުމަށް ޗާރޖޭ ޑި އެފެއާޒް އެމްބެސެޑަރ ޑރ. އަލީ ނަސީރު މުހައްމަދު ވަނީ ގޮވާލައްވާފައެވެ.
އަދި ފަލަސްޠީނުގެ ރައްޔިތުންނާ ދެކޮޅަށް ހިންގާ ހަނގުރާމައިގެ ޖަރީމާތަކާއި، އިސްރާއީލުގެ ޢަމަލުތައް ހުއްޓުވައި، ފަލަސްޠީނުގެ ރައްޔިތުންނާ ދެކޮޅަށް ހިންގާ ހަނގުރާމައިގެ ޖަރީމާތަކަށް ޖަވާބުދާރީކުރުވުމަށް، ކައުންސިލާއި ބައިނަލްއަޤްވާމީ މުޖުތަމަޢަށް ސަރުކާރުންވަނީ އިލްތިމާސް ކޮށްފައެވެ.
