ރޯދަމަހާއި އަދި އެހެން މަސްދުވަސްތަކުގައިވެސް ނިދި ހަމަނުކޮށް އެއްގަމު އުޅަނދުތައް ދުއްވުމަކީ އެކްސިޑެންޓްތައް ހިނގުމަށް މެދުވެރިވާ ސަބަބެއް ކަމަށާއި، އެހެންކަމުން ނިދި ހަމަކޮށްގެން އުޅަނދުތައް ދުއްވުމަށް އިލްތިމާސް ކުރަކަމަށް ފުލުހުން ވިދާޅުވެއްޖެއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަމަ ދައްކަވަމުން ހުޅުމާލެ އޭރިއާގެ ސުޕްރިޑެންޓް އޮފް ޕޮލިސް ރަޖްނީ ޝުއައިބު ވިދާޅުވީ ވިދާޅުވީ ނުނިދާ ބައެއް މީހުން އުޅަނދުތައް ދުއްވަން އެރުމުން ވެސް އެކްސިޑެންޓްތައް ހިނގާ މިންވަރު އިތުރު ކަމަށެވެ.
އަޅުގަނޑުމެންނަށް ރޯދަ މަސް ނޫނަސް އެހެން މަސް މަހުގައި ވެސް ފާހަގަކުރެވޭ ނިދި ހަމަނުކޮށް އުޅަނދު ދުއްވާ މައްސަލަ މިކަމުގެ ސަބަބުން ވެސް ވަރަށް ގިނަ އެކްސިޑެންޓްތައް ހިނގާ، ނިދި ހަމަނުކޮށް ވެހިކަލް ނުދުއްވުމަށް އިލްތިމާސް ކުރަން.
ރަޖްނީ ވިދާޅުވިއެވެ.
އޭނާ އިތުރަށް ވިދާޅުވީ ހުޅުމާލޭގައި އާންމުކޮށް އެކްސިޑެންޓު ހިނގާ މަގުތަކަށް ބޮޑެތި ބަދަލުތަކެއް ގެންނަން ފުލުހުން ނިންމާފައިވާ ކަމަށާއި، ހުޅުމާލޭ ފޭސް އެކެއްގައި އަދި ދޭއްގައި ވެސް އެންމެ ކަންބޮޑުވަނީ އެކްސިޑެންޓްތަކާއި ގުޅުންހުރި މައްސަލަތަކާއި ހެދި ކަމަށެވެ.
އެގޮތުން އޭނާ ވިދާޅުވީ އެކްސިޑެންޓް ހިނގާ ބައެއް ޕޮއިންޓްތަކުގައި ރޯޑް ޑިވައިޑަރު ޖަހާ، ސްޕީޑް ބްރޭކަރުތައް ބަހައްޓާ، ލޭންތަކަށް ބަދަލު ގެނައުމުގެ މަސައްކަތްތައް ވެސް ކުރަމުންދާ ކަމަގައެވެ. އަދި އެ މަސައްކަތް ކުރަމުންދާނީ މާލެސިޓީ ކައުންސިލާއި ޓްރާންސްޕޯޓް މިނިސްޓްރީ އަދި އެޗްޑީސީ ބައިވެރިވުމާއެކު ކަމަށްވެސް އޭނާ ވިދާޅުވިއެވެ.
ރަޖުނީ ވިދާޅުވީ ހުޅުމާލޭގައި ހިނގާ އެކްސިޑެންޓްތަކުގެ ތެރޭގައި ވަރަށް ނުރައްކާތެރި އެކްސިޑެންޓްތައް ހިމެނޭ ކަމަށާއި މީހުންނަށް ޖިސްމާނީ ބޮޑެތި އަނިޔާތައް ލިބި، ފުރާނައަށް ނުރައްކާވާ ފަދަ ބޮޑެތި އަނިޔާތައް ލިބި، ބައެއް މީހުން ހޮސްޕިޓަލުގައި މިހާރުވެސް އެނދުމަތި ކުރެވިފައިވާ ކަމަށެވެ.
ކޮމެންޓު ފޮނުވާ