ރައީސް މުއިއްޒު ފާއިތުވި ހަފްތާގައި ރާއްޖޭގެ އުތުރުގެ ބައެއް ރަށްތަކަށް ކުރެއްވި ރަސްމީ ދަތުރުފުޅުގައި ކެނދިކުޅުދޫއަށް ވަޑައިގެން ކެމްޕޭން ކުރެއްވިކަމުގެ ތުހުމަތު ކޮށް އެރަށުގެ ރަށުކައުންސިލުން ނެރުނު ބަޔާން ބާތިލްކުރުމަށް ލޯކަލް ގަވަރމަންޓް އޮތޯރިޓީ (އެލްޖީއޭ) އިން އެންގި އެންގުމަށް އިޖާބަ ނުދޭނެކަމަށް ކެނދިކުޅުދޫ ކައުންސިލުން ވިދާޅުވެއްޖެއެވެ.
އެލްޖީއޭއިން ކެނދިކުޅުދޫ ކައުންސިލަށް އަންގާފައިވަނީ ކައުންސިލުގެ މެމްބަރުންގެ ސޮއި ނެތި، އަދި ކައުންސިލުން ނޫސް ބަޔާނަކަށް ޒިންމާވާނެ ފަރާތެއްގެ ނަން ނެތުމަކީ އެ ކައުންސިލުން ނެރުނު ބަޔާނުގެ ސައްހަކަމާ މެދު ސުވާލު އުފެދޭ ކަމެއް ކަމަށާއި، އެހެންކަމުން ކައުންސިލުން ނެރުނު ބަޔާން ބާތިލުކޮށް އެކަން މާދަމާ މެންދުރު 2:00 ކުރިން އެލްޖީއޭއަށް އެންގުމަށެވެ.
އެލްޖީއޭގެ ސިޓީއަށް ޖަވާބު ދިނުމުގެ ގޮތުން އެކައުންސިލުން މިއަދު ނެރުނު ބަޔާނުގައި ބުނެފައިވަނީ ލާމަރުކަޒީ ގާނޫނުން އުފެދިފައިވާ ރަށު ކައުންސިލްތަކަކީ އެގާނޫނުގެ 21 ވަނަ މައްދާގައިވާގޮތުގެ މަތިން، ސަރުކާރާ ވަކިން އަމިއްލަ ނަމުގައި ދައުވާ ކުރުމާއި، ދައުވާލިބުމުގެ ބާރު ލިބިފައިވާ އަދި އަމިއްލަ ނަމުގައި މުއާމަލާތު ކުރުމުގެ ބާރު ލިބިގެންވާ ވަކި ސިއްކައެއް އޮތް ގާނޫނީ ޝަޚުސުތަކެއް ކަމުގައެވެ.
އަދި އެލްޖީއޭއިން އެކައުންސިލަށް ފޮނުވި ސިޓީގައި އެ ކައުންސުލުން 2 މާރިޗްވަނަ ދުވަހު ނެރުނު ބަޔާން ބާތިލް ކުރަންޖެހޭ ގާނޫނީ ސަބަބެއް އެ އޮތޯރިޓީއަށް ދެއްކިފައި ނުވާތީ، ކައުންސިލުން ނެރުނު ބަޔާން ބާތިލް ކުރެވެން ނެތްކަމުގައެވެ.
އަދި ދިވެހިރާއްޖޭގެ ގާނޫނު އަސާސީގައި، ވެރިކަން ހިންގަންވާނީ ލާމަރުކަޒީ އުސޫލުންކަމަށް ބަޔާންކޮށްފައި އޮންނަ އޮތުމަށާއި، އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ތަސައްވުރާއު މަގުސަދުތައް ގެއްލުވާލައި، ކައުންސިލްގެ ބާރުތައް ކަނޑުވާލުމަށް މަސައްކަތް ނުކުރުމަށްވެސް ކެނދިކުޅުދޫ ކައުންސިލުން އެލްޖީއޭއަށް ގޮވާލާފައި ވެއެވެ.
