ދިވެހި ފުލުހުންގެ ޚިދުމަތުގެ ކްރައިމް ޕްރިވެންޝަން އެންޑް ޕަބްލިކް އެފެއާޒުން، ސްކޫލުތަކުގެ ފުރާވަރު އުމުރުފުރައިގެ ދަރިވަރުންނަށް ކުރިއަށްގެންދާ ފުރާވަރު ކޭންޕުގެ 103 ވަނަ ކޭންޕު މަދްރަސަތުލް ޢަރަބިއްޔަތުލް އިސްލާމިއްޔާގެ ދަރިވަރުންނަށް ކުރިއަށް ގެންގޮސްފިއެވެ.
މި ކޭންޕު ނިންމުމަށް އިއްޔެ އަރަބިއްޔާ ސްކޫލު ހޯލުގައި ބޭއްވި ރަސްމިއްޔާތު ރަސްމިއްޔާތު ޝަރަފުވެރިކޮށްދެއްވީ މާލެ ސިޓީ މޭޔަރ އާދަމް އާޒިމްއެވެ. މި ރަސްމިއްޔާތުގައި، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީން، ދިވެހި ފުލުހުންގެ ޚިދުމަތުގެ ސްޕޯކްސްޕާސަން ޗީފް ސުޕްރިންޓެންޑެންޓް އޮފް ޕޮލިސް އަޙްމަދު ޝިފާން، ކްރައިމް ޕްރިވެންޝަން އެންޑް ޕަބްލިކް އެފެއާޒުގެ ހެޑް ސުޕްރިންޓެންޑެންޓް އޮފް ޕޮލިސް އަޙްމަދު އަލީ. ޗީފް އިންސްޕެކްޓަރ އޮފް ޕޮލިސް އަޙްމަދު ރަމްޒީ އަދި ފުލުހުންގެ ކޮމިޝަންޑު ބައެއް
އޮފިސަރުންނާއި އެހެނިހެން ފުލުހުންގެ އިތުރުން އަރަބިއްޔާ ސްކޫލުގެ އިސްވެރިން ބައިވެރިވެލެއްވިއެވެ.
ފެބުރުވަރީ 29 އިން މާރިޗު 2 އަށް އަރަބިއްޔާ ސްކޫލުގައި ކުރިއަށް ގެންދިޔަ ފުރާވަރު ކޭންޕުގައި، އެ ސްކޫލުގެ ގްރޭޑް 7 އިން 12 އަށް ތައުލީމު ހާސިލުކުރަމުންދާ 104 ދަރިވަރުން ބައިވެރިވިއެވެ. އެއީ އަންހެން 40 ދަރިވަރުންނާއި ފިރިހެން 64 ދަރިވަރުންނެވެ.
މި ކޭންޕުގައި ދިރިއުޅުމުގެ ރިވެތި އަދަބުތައް ދަރިވަރުންނަށް ދަސްކޮށްދިނުމާއި ރަނގަޅު ތަރުބިއްޔަތަށް މަގުދައްކައިދީ ހަރުދަނާ ބައެއްގެ ގޮތުގައި ދެމިތިބުމަށް ބާރުއަޅައިދޭ ގިނަ ހަރަކާތްތަކެއް ކުރިއަށް ގެންގޮސްފައިވެއެވެ. އަދި ދަރިވަރުންނާ ގުޅުންހުރި ގާނޫނުތަކާއި ގަވާއިދުތަކުގެ މައުލޫމާތު ހިއްސާކޮށް އާންމު އިޖުތިމާއީ މިންގަނޑުތަކާ ހިލާފަށް ކުރެވޭ ކަންކަމުން ދުރުހެލިކުރުވައި އަދި ސްކޫލާއި މުޖުތަމައުގައި އުޅޭއިރު ދަރިވަރުންނަށް ކޮންމެހެން އެނގެންޖެހޭ ކަންކަން ދަސްކޮށްދިނުމަށް މައުލޫމާތު ދިނުމުގެ ސެޝަންތަކާއި ސެލްފް ޑިފެންސް ކުލާސްތަކާއި އެހެނިހެން ހަރަކާތްތައް ކުރިއަށް ގެންގޮސްފައިވެއެވެ.
އޭގެ އިތުރުން، އެ ދަރިވަރުންގެ ބެލެނިވެރިންނަށް މައުލޫމާތު ދިނުމުގެ ކުލާސްތަކެއް ވެސް ކުރިއަށް ގެންގޮސްފައިވެއެވެ. އެގޮތުން، ދަރިން ތަރުބިއްޔަތުކުރުމުގައި ސަމާލުކަންދޭންޖެހޭ ކަންތައްތަކާއި ގާނޫނުތަކާއި ގަވާއިދުތަކަށް އަހުލުވެރިކުރުވައި އަދި ތަފާތު އެކި ކުށްތަކުން ރައްކާތެރިކުރުވުމަށް މައުލޫމާތު ދީފައިވެއެވެ.
ކޮމެންޓު ފޮނުވާ