މިހާރު އޮތް ރައްޔިތުންގެ މަޖިލިހުން މިސަރުކާރުގެ ވައުދުތައް ފުއްދަން ޖާގަ ދޭން ބޭނުމެއް ނުވާކަމުގައި ރައީސް މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ މިހާރު ރ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ރ. މީދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ވާހަކަ ދައްކަވަމުންނެވެ.
މި ބައްދަލު ކުރެއްވުމުގައި ރައީސް މުއިއްޒު ވިދާޅުވީ ރިޔާސީ އިންތިޚާބަށްފަހު އައި ޓްރާންސިޝަން މުއްދަތުގެ ތެރޭގައި މި ސަރުކާރުން އޭރު ބަޖެޓަށް ހުށަހެޅި ކަންކަންވެސް ބަޖެޓުގައި ހިމަނާފައި ނުވާކަމުގައެވެ.
އެބޭފުޅުން ބޭނުންވާ ކަންކަން އުނިކޮށް، ބަދަލުތައް ގެނެސް، ހިނގަމުންދިޔަ މަޝްރޫއުތައްވެސް އަޅުގަނޑު ވައުދުވެފައި ވާނެ ނިންމަ ދޭނެ ކަމަށް ހުރިހާ ރަށެއްގައިވެސް، ހިނގަމުންދާ މަޝްރޫއުތައް، ފެށިފައި ހުރި މަޝްރޫއުތަައް، ފެށިފައި ހުރި މަޝްރޫއުތައް ނިންމުމާއި ގާތަށްވެސް ފައިސާ ހަމަޖައްސާދީފައެއް.
ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ އިންތިގާލީ މަރުހަލާގައި އޭރުގެ ސަރުކާރުން، ޕްރޮޖެކްތައް ހިންގަން އެކަށީގެންވާވަރަށް ބަޖެޓުގައި ފައިސާ ހިމަނާފައި ނުވާކަމުގައެވެ.
މި ދަންނަވަން އުޅޭ ވާހަކައަކީ މިހާރު އޮތް ރައްޔިތުންގެ މަޖިލީހުންނެއް ބޭނުމެއް ނުވެޔޭ، އަޅުގަނޑު ވީ ވައުދުތައް ފުއްދަން ޖާގަ ދޭކަށެއް، އެހެންވީމަ އެބޭފުޅުންނަށް ދަތި ކުރެވެން އޮތް ގޮތަކަށް ވިއްޔާ ކޮށްގެން މަޖިލީހުން ބަޖެޓް ފާސްކޮށްދިނީ.
ރައްޔިތުންގެ މަޖިލީހުން ބަޖެޓްގައި ބޭނުންވާވަރަށް ފައިސާ ހިމަނާ ނުދިނީ ސަރުކާރު ހިންގުމަށް ދަތިކުރުމުގެ މަގުސަދުގައިކަން ފާހަގަ ކުރައްވަމުން ރައީސް މުއިއްޒު ވިދާޅުވިއެވެ.
މިރޭ ރ. މީދޫގެ ރައްޔިތުންނާއި ބައްދަލުކޮށް ވާހަކަ ދައްކަވަމުން ރައީސް ވިދާޅުވީ މީދޫއަކީ ބިން ހުސްވެ، ފުރިފައިވާ ރަށެއް ކަމަަށާއި، އެރަށުގެ ބިން ބޮޑުކުރަން ފަޅުގައި މާބޮޑު ޖާގައެއްވެސް ނެތް ކަމުގައެވެ. އަދި އެރަށުގައި ގާތްގަނޑަކަށް 8-10 ހިކްޓަރު ހިއްކެން އޮތްއިރު، ހިއްކެން އޮތް އެންމެ ބޮޑު މިނަކަށް މި އަހަރު ތެރޭގައި ހިއްކައި ދޭނެ ކަަމަށް ރައީސް ވިދާޅުވިއެވެ.
އޭގެ އިތުރުންވެސް މީދޫގެ ހޮސްޕިޓަލް އަޅައިދިނުމާއި، ބަނދަރު ބޮޑުކޮށް ދިނުމުގެ އިތުރުން، ބޮޑު މިސްކިތެއްވެސް އެރަށުގައި އަޅައިދޭނެކަމަށް ރައީސް މުއިއްޒު ވައުދުވެވަޑައިގެންނެވިއެވެ.
