ކުރިޔަށް އޮތް މަޖިލިސް އިންތިޚާބު ފަސް ކުރުމަށް ގާނޫނަށް ގެނައި އިސްލާހު ތަސްދީގު ކުރަން ރައީސް މުއިއްޒުއަށް މަޖުބުރުވާ ގޮތަށް މަޖިލީހުން އަލުން އެ ބިލް ފާސްކޮށްފައިވަނިކޮށް، "17 މާރޗް" ގެ ވޯޓުގައި ރައްޔިތުން އެކުގައި ނިކުމެ ވޯޓުލައި ސަރުކާރާއެކު ކުރިޔަށް ދިއުމަށް ރައީސް މުއިއްޒު ގޮވާލައްވައިފިއެވެ.
ރައީސް މުއިއްޒު މިހެން ވިދާޅުވީ އުތުރުގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގައި ނ. ހޮޅުދު އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި މިއަދު ވާހަކަފުޅު ދައްކަވަމުންނެވެ.
މި ބައްދަލުވުމުގައި ވާހަކަ ދައްކަވަމުން ރައީސް ވިދާޅުވީ ރައްޔިތުންގެ އަތް މައްޗަށް މި އަންނަނީ ވަރަށް މުހިންމު ޒިންމާއެއް އަދާކުރުމުގެ ދުވަހެއް ކަމުގައެވެ.
17 މާޗްގައި އޮންނަ އިންތިހާބުގައި، އެ ދުވަހު ލާ ވޯޓުގައި ތިޔަބޭފުޅުން ނިންމަވައި ދެއްވަންވީ މި ދެންނެވި މުސްތަގުބަލް. އަޅުގަނޑު ޔަގީން ކުރަނީ ސަރުކާރުން ރައްޔިތުން އެދޭ ގޮތަށް، ރައްޔިތުން އެދޭ އަމާޒަށް މި ގައުމު ގެންދިއުމަށްޓަކައި ރައްޔިތުން އަތުކުރި އޮޅާލައިގެން ނުކުމެ ސަރުކާރާ އެކުގައި ކުރިއަށް ވަޑައިގަންނަވާނެ ކަމަށް.
ރައީސް ވިދާޅުވިއެވެ.
ރައީސް މުއިއްޒުގެ ވާހަކަ ފުޅުގައި އިތުރަށް ވިދާޅުވީ ބަޔަކު ބުނާހާގޮތަކަށް ތަބާވާ އަޅުންތަކެއްގެ ގޮތުގައި ތިބޭ ބަޔަކު މަޖިލީހަށް ވެއްވުމަކީ މިދިޔަ 3 މަހުގެ ތެރޭގައި މަޖިލީހުގެ ތެރެއިން ފެނިގެންދިޔަ މަންޒަރު ތަކުރާރު ވާނެކަމެއް ކަމަށާއި، އެފަދަ ހާލަތެއް އަތުވެއްޖެނަމަ ގައުމު އަނބުރާ އިއާދަ ނުކުރެވޭނެ ކަމުގައެވެ.
އެ ބައެއްގެ މައްޗަށް ބާރުގަދަ އެހެން ބަޔަކު އަންގާ އެންގުމަކަށް އޮޕަރޭޓުކުރާ، ބޭނުން ގޮތަކަށް، ބޭނުން ގޮތަކަށް ވޯޓު ދިނުމުގަ ތަބާވާ އަޅުންތަކެއްގެ ގޮތުގަ ތިބޭ މެންބަރުންތަކެއް މަޖިލީހަށް ވެއްދުމަކީ އެއީ މިދިޔަ ތިން މަސްދުވަހުގެ ތެރޭގަ އަޅުގަނޑުމެންނަށް ފެނުނު މަންޒަރު ތަކުރާރުވެ ދުވަހަކު ވެސް ރާއްޖެއަށް އަނބުރާ ދެން އިޔާދަ ނުކުރެވޭނެ ހިސާބަށް އަޅުގަނޑުމެންގެ ގައުމުގެ ކަންކަން ދާނެ ކަމަކަށް ވާނެ.
ރައީސް މުއިއްޒު ވިދާޅުވިއެވެ.
ރައްޔިތުންގެ މަޖިލީހުގެ އިންތިހާބު ރޯދައިގެ ފަހުން ބާއްވަންޖެހޭ ގޮތަށް ރައްޔިތުންގެ މަޖިލީހުން ފާސް ކުރި ބިލު އަނބުރާ އެ މަޖިލީހަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުވާލެއްވުމުން، އިތުރު ބަދަލެއް ނުގެނެސް އެ ބިލު މަޖިލީހުން އަނެއްކާވެސް ވަނީ ފާސްކޮށްފައެވެ.
މިނިވަން އަދި އިންސާފުވެރި އިންތިހާބަކަށް ހުރަސް އެޅިދާނެ ކަމަށް ބުނެ އެ ބިލު އަނބުރާ މަޖިލީހަށް ފޮނުވާލީ މިދިޔަ އާދީއްތަ ދުވަހެވެ.
އިތުރު ބަދަލެއް ނުގެނެސް އެ ބިލު މިއަދު ފާސް ކުރީ 47 މެންބަރުންގެ ވޯޓުންނެވެ. ބިލު ފާސްނުކުރަން ވޯޓުދިނީ 14 މެންބަރުންނެވެ.
