ރޯދައިގެ ފަހުން އިންތިހާބު ބާއްވާ ގޮތަށް މަޖިލީހުން ފާސްކުރި އިންތިހާބުތަކާ ބެހޭ ގާނޫނަށް އިސްލާހު ގެނައުމުގެ ބިލް ރައީސް ތަސްދީގު ނުކުރައްވައި އަނބުރާ މިއަދު ރައްޔިތުންގެ މަޖިލީހަށް ފޮނުއްވާލައްވައިފި އެވެ.
އަލުން ވިސްނާވަޑައިގަތުމަށް އެދި ރައީސް އަނބުރާ އެ ބިލް މަޖިލީހަށް ފޮނުއްވިކަން ރައީސް އޮފީހުން ދާދި ދެންމެއަކު ވަނީ ހާމަކޮށްފަ އެވެ. އެކަން ހާމަކުރަމުން ރައީސް އޮފީހުން ބުނީ އެ ބިލް ތަސްދީގުނުކުރައްވައި އަނބުރާ ފޮނުވާލީ ގާނޫނުއަސާސީގެ 91 ވަނަ މާއްދާގެ ހ. ގެ ދަށުން އެމަނިކުފާނަށް ލިބިވަޑައިގަންނަވާ އިހުތިޔާރުގެ ދަށުން ކަމަށެވެ.
ބަންޑާރަ ނައިބުގެ ލަފާގެ މަތިން އެގޮތަށް ރައީސް ނިންމެވި ސަބަބުތަކުގެ ގޮތުގައި ރައީސް އޮފީހުން ބުނީ:
1. ގާނޫނުއަސާސީގެ 79 ވަނަ މާއްދާގެ ށ. ގައި ވާގޮތުން މިހާރު އޮތް މަޖިލީހުގެ އުމުރު ހަމަވުމުގެ 30 ދުވަސްކުރީން އާ މަޖިލީހުގެ އިންތިހާބުގެ ހުރިހާކަމެއް ނިންމަން ޖެހުން.
2. ނަމަވެސް އެ ބިލުގައިވާގޮތަށް އިންތިހާބު ބާއްވާ ނަމަ ގާނޫނުއަސާސީގައި ކަނޑައަޅާފައި އެވާ މުއްދަތުގެ ކުރިން އިންތިހާބުގެ ހުރިހާ ކަންކަން ނިމާނުލެވުމުގެ ފުރުސަތު އޮތުމުން އެގޮތަށް ކަނޑައެޅުމަކީ ގާނޫނުއަސާސީއާ ހިލާފުވާނޭ ކަމެއްކަން.
