އެމްޑީޕީގެ ރައީސްކަމުގެ މަގާމަށް، ކުރީގެ ޚާރިޖީ ވަޒީރު ޝާހިދު ފޯމު ހުށަހަޅުއްވައިފިއެވެ.
ޝާހިދު މިއަދު ކުރެއްވި އެކްސް ޕޯސްޓެއްގައި ވިދާޅުވީ އެމްޑީޕީގެ ރައީސްކަމުގެ މަޤާމަށް ކުރިމަތިލުމަށް މިއަދު ޕާރޓީއަށް ފޯމު ހުށަހަޅުއްވާފައި ވާކަމަށެވެ. އަދި ޕާޓީގެ މެމްބަރުންގެ ތާއީދާ އެއްބާރުލުން ދެއްވުން އެދޭކަމަށްވެސް ޝާހިދު ވިދާޅުވެފައި ވެއެވެ.
މާތް ﷲގެ ވާގިފުޅާއި އެކު އެމް ޑީ ޕީ ގެ @MDPSecretariat ރައީސްކަމުގެ މަޤާމަށް ކުރިމަތިލުމަށް މިއަދު އަޅުގަނޑު ޕާރޓީއަށް ފޯމު ހުށަހަޅައިފީމެވެ.
ލޮބުވެތި މެމްބަރުންގެ ތާއީދާ އެއްބާރުލުން އަޅުގަނޑަށް ދެއްވުން އެދެމެވެ.#Aabaareh @MDPSecretariat
— Abdulla Shahid (@abdulla_shahid) February 19, 2024
އެމްޑީޕީގެ ރައީސްކަމަށް ކުރިމަތި ލެއްވުމަށް ނިންމަވާފައިވާކަން ކުރީގެ ފޮރިން މިނިސްޓަރ ޝާހިދު އިއުލާން ކުރެއްވީ އިއްޔެއެވެ.
ޝާހިދު އިއްޔެ ކުރެއްވި އެކްސް ޕޯސްޓުގައި ވިދާޅުވީ، އެމްޑީޕީގެ ރައީސްކަމުގެ މަގާމަށް ކުރިމަތިލުމަށް ގަސްތުކޮށްފައިވާ ކަމަށާއި، އައު ފޯރިޔަކާއި އައު ޖޯޝަކާއި އެކު، އާބާރެއްގައި އެމްޑީޕީ ނިކުމެ ރައްޔިތުން އެދޭމިސްރާބަށް ރާއްޖެ އަލުން ގެންދިޔުމަށް އެންމެން އެކުވެ އަތުގުޅާލަންވެއްޖެކަމަށް ބަލާލިކޮންމެދިމާލަކުން މިއަދު ފެންނާން އެބައޮތް ކަމުގައެވެ. އަދި އެމްޑީޕީގެ މެމްބަރުންގެ ތާއީދާ އެއްބާރުލުމަށް އެދޭކަމުގައިވެސް ޝާހިދު ވިދާޅުވެފައި ވެއެވެ.
އެމްޑީޕީގެ އަސާސީ ގަވާއިދުގައިވާގޮތުން އެންމެ ބޭފުޅަކު ރައީސްކަމަށް ކުރިމަތިލައްވައިފިނަމަ އެމަގާމަށް ބޭފުޅަކު ހޮވުމަށް ޕާޓީގެ މެމްބަރުންގެ މެދުގައި އާންމު އިންތިޚާބެއް ނުބާއްވާނެއެވެ.
ފާއިތުވި ނޮވެމްބަރުމަހު އެމްޑީޕީން ވަނީ އެޕާޓީގެ ވަގުތީ ރައީސްކަމަށް ކުރީގެ ރައީސް ސާލިހު ހަމަޖައްސާފައެވެ. އެހެންނަމަވެސް ރައީސް ސާލިހު ދެން އެޕާޓީގެ ރައީސްކަމަށް ވާދަ ނުކުރައްވާނެކަމަށް ވަނީ މައުލޫމާތު ލިބިފައެވެ.
އެމްޑީޕީގެ ރައީސްގެ މަޤާމުގެ އިންތިޚާބު 02 މާރޗް 2024 ވާ ހޮނިހިރު ދުވަހު ބޭއްވުމަށް އެޕާޓީންވަނީ ހަމަޖައްސާފައެވެ.
އެމްޑީޕީން ކުރި އިއުލާނުގައި ބުނެފައިވަނީ،ޕާޓީގެ ރައީސްކަމަށް ކުރިމަތިލުމަށް އެދޭ މެންބަރުންނަށް އެފުރުޞަތު 20 ފެބްރުއަރީ 2024 ވަނަ ދުވަހުގެ 14:00 އާއި ހަމައަށް ހުޅުވާލެވިފައިވާ ވާކަމަށެވެ.
މިކަމަށްއެދޭ މިޕާޓީގެ މެންބަރުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ފުރިހަމަކޮށްފައިވާ ކުށާއި ދަރާނީގެ ރިކޯޑާއި އެކު ފުރިހަމަކޮށް ފައި ހުށަހަޅަންޖެހޭނެ ކަމަށްވެސް ބުނެފައި ވެއެވެ.
