ކުރީ ސަރުކާރުން ހުޅުމާލޭގައި ބިނާކޮށްފައިވާ 4،000 ފްލެޓްގެ މައްސަލަ އޭސީސީން މިހަފްތާގައި ނިންމާނެކަމަށް ބުނެފިއެވެ.
އޭސީސީން ބުނެފައިވަނީ އޭސީސީއާއި ގުޅޭގޮތުން ހުށަހެޅި ޝަކުވާތައް ބެލުމަށް، ފްލެޓްތައް ދޫކުރުން ހުއްޓާލުމަށް އެންގި އެންގުމާއި ގިޅޭގޮތުން މިފަހްތާގައި ކޮމިޝަނުން މައްސަލަ ނިންމާނެ ކަމަށެވެ.
ރައީސް އިބްރާހިމް މުހައްމަދު ސޯލިހް ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 ފްލެޓް ލިބޭ މީހުންގެ ދާއިމީ ލިސްޓަށް ޝަކުވާ ހުށަހަޅަން އެކަށީގެންވާ މުއްދަތެއް ނުދީ އަދި އެ މައްސަލަ ނުބަލާ ފްލެޓު އެއްބަސްވުންތަކުގައި ސޮއި ނުކުރަން އެންޓި ކޮރަޕްޝަން ކޮމިޝަން (އޭސީސީ) އިން އެންގީ ފާއިތުވި ނޮވެމްބަރުމަހުގެ 5 ވަނަ ދުވަހުއެވެ.
އޭސީސީން އެކަން ހުއްޓުވީ ފްލެޓުގެ ދާއިމީ ލިސްޓު އިއުލާންކުރުމާ އެކު އެއީ އިންސާފުން ބޭރުން އަދި އޮޅުވާލުމެއްގެ ތެރެއިން އާންމުކޮށްފައިވާ ދާއިމީ ލިސްޓެއް ކަމަށް ބުނެ އާންމުންގެ ޝަކުވާ ބޮޑުވެ އެ މައްސަލަ ކޮމިޝަންގެ ސަމާލު ކަމަށް އައުމާ ގުޅިގެންނެވެ. ފްލެޓަށް ޕޮއިންޓް ދިނުމުގައި އިންސާފުވެރިކަމެއް ނެތް ކަމަށް ބުނެ، ޕޮއިންޓްތައް ލިބިފައި ހުރި ގޮތުގެ ތަފްސީލްތައް ހާމަކުރަން ގޮވާލައި މިއަދު ހައުސިން މިނިސްޓްރީ ދޮށަށް ބަޔަކު އެއްވެ އިހްތިޖާޖް ވެސް ކުރިއެވެ.
ޕްލޭނިން މިނިސްޓްރީން އޭރު ނިންމާފައި އޮތީ ދާއިމީ ލިސްޓު އިއުލާންކޮށް، ފުރަތަމަ 4،000 ފްލެޓް ލިބޭ މީހުންނަށް ނޮވެމްބަރު 17 ގެ ކުރިން، ލިއުން ހަވާލުކުރުމަށެވެ. އަދި ޝަރުތު ހަމަވާ އެކަމަކު، 4،000 ފްލެޓުގެ ތެރޭގައި ނުހިމެނޭ މީހުންނަށް ޕޯޓަލް މެދުވެރިކޮށް ލިޔުމެއް ދިނުމަށް ވެސް އޭރު ވަނީ ނިންމައިފައެވެ.
އޭސީސީގެ މީޑިއާ އޮފިޝަލް އޭރު ވިދާޅުވީ ހައުސިން މަޝްރޫއުގެ ދަށުން ފުރަތަމަ 4،000 ފްލެޓް ލިބޭ މީހުން ކަނޑައަޅައި، ލިސްޓް އާއްމުކޮށްފައިވަނީ ޝަކުވާ ހުށަހަޅަން ފުރުސަތު ނުލިބޭ ގޮތަށް ވަކި ބަޔަކަށް ނާޖާއިޒު މަންފާ ހޯދާ ދިނުމުން ކަމަށް ބުނެ ހުށަހަޅާފައިވާ މައްސަލައެއް ތަހުގީގުކުރަމުންދާ ކަމަށެވެ.
އެހެންވެ، އެ ސްކީމްގެ ދަށުން ދޫކުރާ ފްލެޓުތަކުގެ އެއްބަސްވުމުގައި ސޮއިކުރުމާއި އެ ފްލެޓުތައް ހަވާލުކުރުމާ ގުޅުންހުރި ހުރިހާ މަސައްކަތްތަކެއް، ޕޮއިންޓް ދީފައިވާ ގޮތާމެދު ޝަކުވާ ހުށަހަޅަން އެކަށީގެންވާ މުއްދަތެއް ދީ، އެ ޝަކުވާތަކަށް ބެލުމަށްފަހު ނޫނީ ކުރިއަށް ނުގެންދަން އަންގާފައިވާ ކަމަށް އޭސީސީން އޭރު ވިދާޅުވިއެވެ.
ގެދޮރުވެރިޔާ ސްކީމުގެ ދަށުން ފުރަތަމަ ފިޔަވަހީގައި ފްލެޓަށް އެދި ޖުމްލަ 20،697 މީހުން ފޯމު ހުށަހަޅާފައިވެއެވެ. މީގެތެރެއިން 13،000އެއްހާ މީހުން ޝަރުތު ފުރިހަމަވި ކަމަށާއި އެ އެންމެންނަށް ފްލެޓް ދޭނެ ކަމުގެ ޔަގީންކަން ސަރުކާރުން އޮތީ ދީފައެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެ ވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެ ތެރޭގައި ހިމެނެނީ ދެ ކޮޓަރީގެ 1،200 ޔުނިޓާއި ތިން ކޮޓަރީގެ 2،800 ޔުނިޓެވެ. ބައެއް ޔުނިޓުތަކުގެ މަސައްކަތް މިހާރު ވަނީ ނިމުމަކާ ގާތްވެފައެވެ.
