ކުރިޔަށް ހައްޖު މޫސުމްގައި ރާއްޖެއިން ހައްޖަށް ދިއުމަށް އިތުރަށް ކޯޓާ ލިބިއްޖެނަމަ، އެހެން ގުރޫޕްތަކަށްވެސް ކޯޓާ ދޫކުރާނީ ހައްޖު ކޯޕަރޭޝަންއިން ކަމުގައި އިސްލާމިކް މިނިސްޓަރ ޑރ. ޝަހީމް ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުން ވަޒީރުންނާއި ކުރަން ބޭނުންވާ ސުވާލުތަކަށް ޖަވާބު ދެއްވުމަށް ރޭ ބޭއްވި "އަހާ" ޕަބްލިކް ފޯރަމްގެ ފުރަތަމަ އެޕިސޯޑްގައި ވާހަކަ ދައްކަވަމުންނެވެ.
ރޭގެ ފޯރަމްގައި ޝަހީމް ވިދާޅުވޫ ރާއްޖޭގެ ރަސްމީ ހައްޖު ކޯޓާގެ ހުރިހާ ކަމެއްވެސް ކުރިޔަށް ގެންދާނީ މޯލްޑިވްސް ހައްޖު ކޯރޕަރޭޝަން މެދުވެރިކޮށް ކަމަށާއި، އެހެންނަމަވެސް އިތުރަށް ކޯޓާ ލިބި އެހެން ގުރޫޕްތަކަށް ކޯޓާ ދޫކުރަން ޖެހިއްޖަނަމަވެސް، އެކަންވެސް ކުރިޔަށް ގެންދާނީ ހައްޖު ކޯޕަރޭޝަންއިން ކަމުގައެވެ.
ޝަހީމް ވިދާޅުވީ އެކަން އެގޮތަށް ކުރިޔަށް ގެންދަވަން ނިންމެވީ ގުރޫޕްތަކުން ބޭނުން އަގެއްގައި ކޯޓާ ވިއްކުމުގެ ސިޔާސަތު ނިމުމަކަށް ގެނައުމަށްޓަކާ ކަމުގައެވެ.
މިސާލަކަށް އިތުރަށް އެއްހާސް ކޯޓާ ލިބުނީއޭ، ހައްޖުކޯޕަރޭޝަންއިން އާންމުކޮށް ހައްޖާޖީން ތިބުމަށް ހިފާފަ ހުންނަ ހޮޓާ.. މިހާރު ހިފާފަ ހުންނަ ހޮޓަލަކީ 13،00 ވަރަކަށް މީހުންގެ ޖާގައިގެ ހޮޓަލެއް. މާނައަކީ އިތުރަށް އެއްހާސް މީހުންގެ ކޯޓާ ލިބިއްޖެނަމަ، 2،000 ކޯޓާއަށް އިތުރު ވީއޭ.. އެހެން ވެއްޖެއްޔާ 700 މީހުންނާ ދޭތެރޭ ކިހިނެއްހޭ ކަންތައް ކުރާނީ. އެވަރަށް ކޯޓާ ލިބިއްޖެނަމަ، އަޅުގަޑުމެންގެ ވިސްނުމަކީ ހަމަ ހައްޖު ކޯޕަރޭޝަންއިންނޭ މެނޭޖް ކުރާނީ. އެކަން ކުރިޔަށް ގެންދާނީ، އެހެން އަމިއްލަ ކޯޕަރޭޝަންތަކަށް ހަވާލުކުރާނީ ހައްޖު ކޯޕަރޭޝަން މެދުވެރިކޮންނޭ. މާނައަކީ އެތާގަ އޮތް ކިއު ނިންމުމަކަށް އަންނާނީ އޭރުން. އެތަނުގެ ލިސްޓުގަ ތިބި މީހުން ހައްޖަށް ގެންދަން އެހެން ގުރޫޕްތަކަށް ވެސް ފުރުސަތު ދޭނީ އެމީހުން ކަނޑައަޅާ އަގެެއްގައޭ.
ރޭގެ ފޯރަމްގައި ވާހަކަ ދައްކަވަމުން ޝަހީމް ވިދާޅުވިއެވެ.
އޭނާ ވިދާޅުވީ ރާއްޖެއަށް އިތުރު ކޯޓާ ލިބިއްޖެނަމަ އެކޯޓާ އެހެން ގްރޫޕްތަކަށް ދޫކުރާނީ ގުރޫޕްތައް މެދުވެރިކޮށް، ހައްޖު ކޯޕަރޭޝަންއިން ކަނޑައަޅާ އަގެއްގަ މީހުން ހައްޖަށް ގެންދާ ގޮތަށް ކަމަށެވެ.
ގުރޫޕްތަކުން ބޭނުންވާހާ އަގެއް ނަގައިގެން ކޯޓާ ވިއްކުމުގެ ސިޔާސަތެއް ދެން ކުރިއަކަށް ނުދާނެއޭ. މާނައަކީ ހައްޖު ކޯޕަރޭޝަންގެ ކިއުގަ ތިބި މީހުންނަށޭ އެފުރުސަތުވެސް ލިބޭނީ، އެހެން ގުރޫޕްތައް މެދުވެރިކޮށް ކޯޕަރޭޝަންއިން ކަނޑައަޅާ އަގެއްގަ. އެނޫން ގޮތަކަށް އެކަންކަން ކުރިޔަކަށް ނުދާނެއޭ.
ޝަހީމް ވިދާޅުވިއެވެ.
ރާއްޖެއިން ހައްޖަށް ފޮނުވުމަށް ސައުދީ ސަރުކާރުން ދޭ ހުރިހާ ކޯޓާއެއް ހައްޖު ކޯޕަރޭޝަނާ ހަވާލުކުރުމަށް ސަރުކާރުން ވަނީ ނިންމާފައެވެ.
ސަރުކާރުން ބުނެފައިވަނީ، މިގޮތަށް ނިންމީ، ހައްޖަށް ދިއުމަށް ގިނަ ބަޔަކު ރަޖިސްޓްރީވެފައި ތިބި ތިބުމަށް ރިއާޔަތްކޮށް، ހައްޖުވެރިންގެ އިންތިޒާރު ދިގުލައިގެން ދިޔަ ނުދިނުމަށާއި، ޚިދުމަތުގެ ފެންވަރު ރަގަޅުކޮށް އާންމު ރައްޔިތުންގެ އިތުބާރު ބޮޑު ކުރުމަށް ކަމުގައެވެ.
އާންމު ގޮތެއްގައި ކޮންމެ އަހަރަކުވެސް ރާއްޖެއަށް ރަސްމީ ހައްޖު ކޯޓާގެ ގޮތުގައި ލިބެނީ 1،000 ކޯޓާއެވެ.
