އިސްލާމީ މުހިއްމު މުނާސަބަތުތައް ގައުމީ ފެންވަރެއްގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފާހަގަ ކުރަން ސަރުކާރުން މަޝްވަރާކޮށްފިއެވެ.
ރައީސް އޮފީހުގައި އޮތް ޕްރެސް ކޮންފަރެންސްގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިއްޔެ ވިދާޅުވީ އިސްލާމީ މުހިއްމު މުނާސަބަތުތައް ގައުމީ ފެންވަރެއްގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފާހަގަ ކުރަން ސޯޝަލް ކައުންސިލްގައި މަޝްވަރާ ކުރައްވާފައިވާ ކަމަށެވެ. އެގޮތުން އެ ރަށެއްގެ ކައުންސިލްތަކާއި ޖަމިއްޔާ، ޖަމާއަތްތައް ގުޅިގެން އެކަން ކުރެވިދާނެ ގޮތުގެ މަޝްވަރާ ކުރެއްވި ކަމަށް އޭނާ ވިދާޅުވިއެވެ.
ފާހަގަކުރަން ނިންމާފައިވާ ބައެއް ހާއްސަ މުނާސަބަތުތަކަކީ:
ރަމަޟާން މަހުގެ މުނާސަބަތު ފާހަގަ ކުރުން
ދެ އީދު ދެ ދުވަސް ފާހަގަ ކުރުން
ރާއްޖެ އިސްލާމްވި ދުވަސް
މި ސަރުކާރުން އަންނަނީ ދީނީ އަދި ގައުމީ ކަންކަން ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އޭގެ ތެރޭގައި، ސްކޫލު އެސެމްބްލީގައި ގައުމީ ސަލާމް ކިއުމާއި ސްކޫލުތަކުގައި ގައުމިއްޔަތާ ގުޅޭ މާއްދާއެއް ކިޔަވައިދިނުން ހިމެނެއެވެ.
މުސްލިމުން ފާހަގަ ކުރާ ފިތުރު އީދާއި އަޟްހާ އީދުގައި ހުރިހާ ސިޓީތަކަކާއި ވެރިކަން ކުރާ ރަށްތަކުގައި ބޮކި ދިއްލައި ޒީނަތްތެރިކޮށް، ތަކުބީރުގެ އަޑުން ގުގުމާލާނެ ކަމަށް ރައީސް ޑރ. މުހައްމަދު މުއިއްޒު މީގެކުރިން ވަނީ ވިދާޅުވެފައެވެ.
