މީލާދީ އާ އަހަރަކާ ކުރިމަތިލާއިރު، އެންމެ ބޮޑު ހިތްދަތިކަމަކާ ކުރިމަތިލާން ޖެހިފައިވަނީ ފަލަސްތީނުގެ ރައްޔިތުންނަށް ކަމަށާއި، އިޚްލާސްތެރި ދުއާވަނީ ފަލަސްތީނުގެ ރައްޔިތުންނާއެކީ ކަމުގައި ޖުމްހޫރީ ޕާޓީ (ޖޭޕީ) ގެ ލީޑަރު އަދި ރައްޔިތުންގެ މަޖިލިހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ރޭ ވިދާޅުވެއްޖެއެވެ.
ގާސިމް މިހެން ވިދާޅުވީ އާއަހަރުގެ މުނާސަބަތުގައި ކުރެއްވި އެކްސް ޕޯސްޓެއްގައެވެ.
ގާސިމްގެ އާއަހަރުގެ މެސެޖުގައި ވިދާޅުވީ، އާ އަހަރަކާއި ކުރިމަތިލާއިރު، ފަލަސްތީނުގައި ތިބި މުސްލިމް އަޚުންނާއި އުޚުތުންނަށް މިހާރު ކުރިމަތިވެފައިވާ ތަކުލީފުތައް އިންތިހާއަށް ހިތާމަކުރާންޖެހޭ ތަކުލީފުތަކެއް ކަމުގައެވެ.
2023 ވަނަ އަހަރުގެ އޮކްޓޯބަރު މަހުގެ 8 ވަނަ ދުވަހުން ފެށިގެން ޒަޔަނިސްޓް އިސްރާއީލުގެ ސަބަބުން އުފެދިފައިވާ ކާރިސާގެ ނަތީޖާއެއްގެ ގޮތުން އިންސާނީ ބޮޑު ކަރިސާއަކާއި ފަލަސްތީނުގެ ރައްޔިތުން ކުރިމަތިލާން ވަނީ ޖެހިފަ. ޒަޔަނިސްޓް އަސްކަރިއްޔާއިން ދެމުންދާ ބޮމުގެ ހަމަލާތަކުގެ ސަބަބުން މަދުވެގެން 21،672 މީހުން މަރުވެ، ކުށެއް ނެތް 56،165 އަށް ވުރެ ގިނަ އާންމުން ޒަޚަމްވެ، އެތައް މިލިއަން ގެއެއް ހަލާކުވެފައިވާއިރު، އަޅުގަނޑުމެންގެ އަބަދުވެސް ވިސްނުމާއި އިޚްލާޞްތެރި ދުޢާތައް އޮތީ އެބޭފުޅުންނާއެކުގައި. މާތް الله ފަލަސްޠީނުގެ ރައްޔިތުންނަށް އަވަސް ޝިފާއެއް ދެއްވައި ޒަޔަނިސްޓުންގެ އަނިޔާވެރިކަމުން ސަލާމަތްކުރައްވާށި!
ގާސިމްގެ އާއަހަރުގެ މެސެޖުގައި ވިދާޅުވެފައި ވެއެވެ.
