ގަވާއިދާ ޚިލާފަށް ހިންގާ ނޫސް މަޖައްލާތަކަކީ އެއްވެސް ބުރަދަނެއް ދެވޭނެ އެއްޗެއް ނޫންކަމަށާއި އަތަކެއްޗަށް ނޫސް މަޖައްލާ ކިޔުމަކީވެސް ބޭއިންސަފެއް ކަމުގައި ދީނީ އިލްމުވެރިޔާ އަލީ ޒައިދު ވިދާޅުވެއްޖެއެވެ.
އޭނާ މިހެން ވިދާޅުވެފައި މިވަނީ، ސަރުކާރަށް ފާޑު ކިޔަމުން އައި ދެ ނޫހެއް ސަރުކާރުން ބްލޮކް ކުރުމާއި ގުޅިގެން ސަރުކާރަށް ގިނަ ބައެއްގެ ފާޑު ކިޔުން އަމާޒު ވެފައި ވަނިކޮށެވެ.
ރޭގެ ވަގުތެއްގައި ސަރުކާރުން ވަނީ ކުރުސީ.ކޮމް އާއި ދިޔަވަރު.ކޮމްގެ ނަމުގައި ހިންގަމުން އައި ދެ ވެބްސައިޓެއް ބުލޮކް ކޮށްފައެވެ. މި ދެ ވެބްސައިޓަކީވެސް ސަރުކާރަށް ވަރަށް ބޮޑަށް ފާޑުކިޔުމުގެ ނަޒަރަކުން ލިޔަމުން އައި ދެ ވެބްސައިޓެކެވެ.
މި ދެ ވެބްސައިޓު ބްލޮ ކުރިމައްސަލާގައި ސަރުކާރަށް އަމާޒުވެފައިވާ ފާޑުކިޔުންތަކަށް ރައްދު ދެއްވާ ސަރުކާރުގެ ތަރުޖަމާން މުހައްމަދު ޝަހީބު އެކްސްގައި ކުރެއްވި ޕޯސްޓެއްގައި ވިދާޅުވީ ގާނޫނާއި ގަވައިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫހެއް ނުވަތަ މަޖައްލާއެއް ސަރުކާރުން ބްލޮކެއް ނުކުރާނެ ކަމަށެވެ.
ކުރުސީ.ކޮމް އާއި ދިޔަވަރު.ކޮމް އަކީ ރަޖިސްޓާ ކޮށްގެން ހިންގާ ދެ ނޫހެއް ނޫނެވެ. އެކަމަކު ރާއްޖޭގައި މިހާތަނަށް ވެސް ރެޖިސްޓްރީނުކޮށް ނޫސްތައް ހިންގަ އެވެ. އަދި އިސްރާއީލު ފަދަ ގައުމަތަކުން ހިންގާ އޮންލައިން ނޫސްތައްވެސް ރާއްޖޭގައި ބްލޮކު ކޮށްފައެއް ނުވެއެވެ.
ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުން މި ސަރުކާރުން ކަށަވަރުކުރާނެ ކަމުގެ ޔަގީންކަން އަރުވަން.
ޝަހީބު ވިދާޅުވި އެވެ.
މި ދެ ވެބްސައިޓް ބްލޮކް ކުރި މައްސަލާގައި އަލީ ޒައިދު ވިދާޅުވެފައިވަނީ ޤަވާޢިދާ ޚިލާފަށް ހިންގާ ނޫސް މަޖައްލާ ތަކަކީ، އެއްވެސް ބުރަދަނެއް ދެވޭނޭ އެއްޗެއް ނޫން ކަމުގައި އޭނާ ނުދެކޭ ކަަމަށާއި، އެތަކެއްޗަށް ނޫސް މަޖައްލާ ކިޔުމަކީވެސް ބޭއިންސާފެއް ކަމުއެވެ.
އަދި އޭނާ ވިދާޅުވީ ރެޖިސްޓަރ ކޮށްގެން ހިންގޭ އަބުރުވެރި ނޫސްވެރިކަމަކަށް ހުރިހާ ބޭފުޅުންވެސް މަރްޙަބާ ކިޔަންޖެހޭ ކަމަށެވެ.
އެހެންނަމަވެސް ރަޖިސްޓްރީ ނުކޮށް ހިންގާ ދެ ނޫހެއް ސަރުކާރުން ބްލޮކް ކުރުމާއި ގުޅިގެން ނޫސްވެރިންނާއި ސިޔާސީ ގިނަބަޔަކު ދަނީ ސަރުކާރަށް ފާޑު ކިޔަމުންނެވެ.
ކޮމެންޓު ފޮނުވާ