ރައީސް ޑރ. މުހައްމަދު މުއިއްޒު، ދަ ޑިމޮކްރެޓްސްގެ ރައީސް އަދި މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއާ އިއްޔެ ބައްދަލު ކުރައްވައި ކުރެއްވި މަޝްވަރާތަކުގެ ތަފްސީލް ހަސަން ހާމަނުކުރައްވާތީ އެ ޕާޓީގެ މެމްބަރު އަދި އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު ކަންބޮޑުވުން ފާޅުކުރައްވައިފިއެވެ.
އަމްރު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ އަޒުލު ކުރުމުގެ ވާހަކަތަކެއް ފެންމަތިވެފައިވާ ވަގުތެއްގައި ސިޔާސީ ޕާޓީތަކުގެ ވެރިންނާއި ރައީސުލްޖުމްހޫރިއްޔާ ކުއްލިއަކަށް ބައްދަލު ކުރައްވައި ކުރެވުނު މަޝްވަރާއެއްގެ ތަފްސީލް އެ ޕާޓީތަކުގެ އާންމު މެމްބަރުންނާ ރައްޔިތުންނަށް ސާފުވުން މުހިންމު ކަމަށެވެ.
"ރައީސުލްޖުމްހޫރިއްޔާ އަޒުލްކުރުމުގެ ވާހަކަތަކެއް ފެންމަތިވެފައިވާ ވަގުތެއްގައި، ސިޔާސީ ޕާޓީތަކުގެ ވެރިންނާ ރައީސުލްޖުމްހޫރިއްޔާ ކުއްލިޔަކަށް ބައްދަލުކުރައްވައި ކުރެވުނު މަޝްވަރާއެއްގެ ތަފްސީލު އެ ޕާޓީތަކުގެ އާންމު މެންބަރުންނާ ރައްޔިތުންނަށް ސާފުވުމަކީ މުހިއްމު ކަމެއް،" އަމްރު ވިދާޅުވިއެވެ.
އަމްރު އެގޮތަށް ވިދާޅުވި އިރު، ރައީސް މުއިއްޒު އިއްޔެ ވަނީ ހަސަން ލަތީފްގެ އިތުރުން ހަތަރު ޕާޓީއެއްގެ ސިޔާސީ ލީޑަރުންނާ ބައްދަލު ކުރައްވައިފައެވެ. އޭގެ ތެރޭގައި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމްއެންޕީގެ ރައީސް މުހައްމަދު ނާޒިމާއި އެމްޑީއޭގެ ލީޑަރު އަހުމަދު ސިޔާމް ހިމެނިވަޑައިގަންނަވައެވެ.
އެ މަޝްވަރާތަކުގެ މާ ބޮޑު ތަފްސީލެއް ނޭނގުނު ނަމަވެސް ރައީސް އޮފީހުން ބުނީ ވަކިވަކިން ބޭއްވި މި ބައްދަލު ކުރެއްވުންތަކުގައި ގައުމުގެ މަސްލަހަތަށްޓަކައި ސަރުކާރަށް އެއްބާރުލުމާއި ތާއިދު ދޭނެކަމުގެ ޔަގީންކަން ޕާޓީގެ ލީޑަރުން ދެއްވި ކަމަށެވެ.
އެނގިފައިވާ ގޮތުގައި ދަ ޑިމޮކްރެޓްސްގެ ގައުމީ މަޖިލިހުގެ ބައްދަލުވުމެއް މިރޭ ބޭއްވުމަށް ހަމަޖެހިފައިވެއެވެ.
