މޮރިޝަސްގެ ބޮޑުވަޒީރު ޗާގޮސްއަށް ރާއްޖޭގެ މަގުންލާފައި ދަތުރުކުރުމަށް އެއްވެސް ހުރަހެއް ނެތް ކަމުގައި ރައީސް ސާލިހު 2022 ވަނަ އަހަރު މޮރިޝަސްގެ ބޮޑުވަޒީރަށް ފޮނުއްވި ސިޓީގައި ވިދާޅުވެއްޖެއެވެ.
ރާއްޖެއާ މޮރިޝަސްއާ ދެމެދު އޮތް ކަނޑުގެ ސަރަަހައްދުގެ އިން ފުށު އަރާ މައްސަލައިގައި ކުރީގެ ރައީސް ސާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީ މިހާރުގެ ސަރުކާރުން މިއަދު ވަނީ އާންމުކޮށްފައެވެ. މި ސިޓީގައި ޗާގޮސްއަށް މޮރިޝަސްގެ ބޮޑުވަޒީރު ރާއްޖޭގެ މަގުން ދަތުރު ކުރުމުގެ ހުއްދަ އޮތްކަމަށް ރައީސް ސާލިހު ވިދާޅުވެފައިވަނީ، ޗާގޮސްގެ މިލްކުވެރިކަމާއި ގުޅޭގޮތުން ރާއްޖެއިން ކުރިން ދަމަހައްޓަމުން އައި ސްޓޭންޑް ދޫކޮށް ޗާގޮސްއަކީ މޮރިޝަސްގެ ބައެއްކަމަށް ރާއްޖެއިން ގަބޫ ކުރާކަމަށް ސިޓީގައި ވިދާޅުވަމުންނެެވެ.
ސިޔާސީ ގޮތުން ވަރަށް ބޮޑަށް އޭރު ރާއްޖޭގައި ޚިޔާލުތަފާތުވެގެން ދިޔަ، އަދި ކުރީ ސަރުކާރުން އާންމު ކުރުމަށް ދެކޮޅުހެދި މި ސިޓީގައިވަނީ، ރައީސް ސާލިހާއި މޮރިޝަސްގެ ބޮޑުވަޒީރާ ދެބޭފުޅުން އެއަހަރުގެ ޖޫންމަހުގެ 24 ވަނަ ދުވަހު ރުވާންޑާގެ ކިގާލީގައި ބޭއްވި ބައްދަލުވުމާއި ހަވާލާދެއްވާ، ޔޫއެންގެ އެޑްވައިޒަރީ އޮޕީނިއަންއާއި އެއްގޮތަށް ރާއްޖޭގެ ސްޓޭންޑް އެމައްސަލާގައި ބަދަލު ކޮށްފައިވާކަމަށް ވިދާޅުވެފައި ވެއެވެ. އަދި ޔޫއެންގެ އެގަރާރަށް ރާއްޖެއިން ތާއީދުކޮށް ޔޫއެންގައި ގަރާރާ އެއްކޮޅަށް ވޯޓު ދެއްވާނެކަމުގެ ޔަގީންކަން ދޭކަމަށްވެސް ރައީސް ސާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީގައި ވިދާޅުވެފައި ވެއެވެ.
މި ސިޓީގައި ރައީސް ސާލިހު އިތުރަށް ވިދާޅުވެފައިވަނީ، ޑީކޮލޮނައިޒޭޝަންގެ (އިސްތިއުމާރީ ބާރުތަކާއި ދެކޮޅު) ސިޔާސަތަށް ރާއްޖެއިން އަބަދުވެސް ތާއީދު ކުރާ ސިޔާސަތެއް ކަމަށާއި، އޭގެ ސަބަބަކީ، އިންސާނީ ހައްގުތަކާއި އަމިއްލަ މިނިވަންކަމަށް ރާއްޖެއިން އަބަދުވެސް އިހުތިރާމް ކުރާތީ ކަމުގައެވެ. އަދި ރާއްޖެއިން ފާއިތުވެދިޔަ ތަނުގައި ޔޫންއެންގައި އަދާކޮށްފައިވާ ދައުރަކީ މީގެ ހެއްކެއްކަމަށްވެސް ވިދާޅުވެފައި ވެއެވެ.
މި ސިޓީގައި ރައީސް ސާލިހު އިތުރަށް ވިދާޅުވެފައިވަނީ، މީގެ ކުރިން ރާއްޖެއިން މިމައްސަލާގައި ދެކޮޅު ހަދަމުން އައީ، 2010 ވަނަ އަހަރުގެ ޖުލައިމަހު ރާއްޖެއިން ކޮމިޝަނަށް ހުށަހެޅި ކޮންޓިނެންޝަލް ޝެލްފްގެ އިންތަކާއި މޮރިޝަންސްއިން ދެކޮޅު ހެދުމުގެ ސަބަބުން ކަމަށާއި، ރާއްޖެއިން ޖެނެރަލް އެސެމްބްލީގައި ދީފައިވާ ވޯޓުތަކުގައިވެސް އޭގެ ތަފްސީލްތައް މީގެ ކުރިން ހާމަކޮށްފައިވާނެކަމަށެވެ.
އެހެންނަމަވެސް، މި މައްސަލާގައި ރާއްޖޭގެ ސްޓޭންޑް ބަދަލު ކުރުމާއެކު އެމައްސަލައަށް ހައްލެއް އަންނާނެކަމަށް އުއްމީދު ކުރައްވާކަމުގައި ވިދާޅުވަމުން ރައީސް ސާލިހު ވިދާޅުވެފައިވަނީ، މިނިންމުމުގެ ސަބަބުން، ރާއްޖެއިން ދަމަހައްޓަމުން އަންނަ "ޑިކޮނޮލައިޒޭޝަން"އާއި ދެކޮޅު ސިޔާސަތަށް އިތުރަށް ބާރު ލިބިދީ، އަދި މޮރިޝަސްއާއި ދެމެދު އޮތް ގުޅުމަށް އިތުރު ކުރިއެރުން ލިބޭނެ ކަމަށް އުއްމީދު ކުރައްވާ ކަމުގައެވެ.
އަދި ސިޓީގައި ވިދާޅުވެފައިވަނީ ސަރުކާރުގެ މި ނިންމުމަކީ އިޓްލޮސްގައި ރާއްޖެއިން ނަގާފައިވާ ޕޮޒިޝަނަށް އެއްވެސް އަސަރެއް ކުރާނެ ނިންމުމެއް ނޫންކަމަށާއި، އޭގެ އިތުރުން 2010 ވަނަ އަހަރު ރާއްޖެއިން "ކޮމިޝަން އޮން ދަ ލިމިޓްސް އޮފް ދަ ކޮންޓިނެޓްޝަލް ޝެލްފް" ހުށަހަޅާފައިވާ ހުށަހަހެޅުމަށްވެސް އަސަރެއް ކުރާނެ ނިންމުމެއް ނޫން ކަމުގައެވެ.
އަދި ޔޫއެންގައި ރާއްޖެއިން ދޭ ވޯޓުގައި މި ތަފްސީލުތައް މި ގޮތުގެ މަތިން ހާމަކުރައްވާނެކަމަށްވެސް ރައީސްގެ ސިޓީފުޅުގައި ފާހަގަ ކުރައްވާފައި ވެއެވެ.
ސިޓީގައި ހާމަކޮށްފައިވާ ވާހަކަތަކަށް ބަލާއިރު، މިއީ މީގެ ކުރިން މިމައްސަލާގައި ސަރުކާރުން ހާމަކޮށްފައިވާ މައުލޫމާތުކަންވެސް ފާހަގަ ކުރެވެއެވެ. އެގޮތުން އޭރުގެ ސަރުކާރުން ބުނަމުން އައިސްފައިވަނީ ސަރުކާރުން މި ސިޓީ އާންމު ކޮށްފައި ނުވަނީ، ދޭދޭ ގައުމުތަކުގެ ވެރިންގެ މެދުގައި ބަދަލުކުރެވޭ މިފަދަ ސިޓީތައް އާންމުކޮށް "ޕަބްލި ޑޮމެއިން"އަށް ލުމަކީ ޑިޕްލޮމަސީއާއި ޚިލާފު، އަދި ކުރިޔަށް އޮތް ތަނުގައި ގައުމަތަކުގެ ވެރިންނާއެކީ ރާއްޖެއިން ދަމަހައްޓަންޖެހޭ މުއާމަލާތުތަކަށް ނޭދެވޭ އަސަރު ކޮށްފާނެ ކަމަކަށް ވާތީ ކަމުގައެވެ.
އެ ސިޓީ އާންމު ކުރުމަކީ މިހާރުގެ ރައީސް މުއިއްޒު ވެރިކަމަށް ވަޑައިގެންނެވުމަށް ވީ ވައުދެކެވެ.
ކުރީގެ ވެރިކަމުގައި ރައީސް ޞާލިހު ވިދާޅުވެފައިވަނީ އެ ސިޓީފުޅުގެ ހަގީގީ ބޭނުމަކީ ޗާގޮސް އަކީ އިނގިރޭސިންގެ ތަނެއްކަމަށް ރާއްޖެއިން ބުނަމުން އައި ސްޓޭންޑް ދޫކޮލިކަން މޮރިޝަސްއަށް އެންގުން ކަމުގައެވެ. އަދި އެ ސިޓީ ފޮނުއްވީ، ޗާގޯސްއަކީ މޮރިޝަސްގެ ބައެއްކަމަށް ބައިނަލްއަގުވާމީގޮތުން ނިންމާފައި އޮތުމުން ކަމަށްވެސް އޭރުގެ ސަރުކާރުން ބުނެފައި ވެއެވެ.
