ކުރީގެ ނާއިބު ރައީސް ފައިސަލް ނަސީމު، ކުރިޔަށް އޮތް މާލޭގެ މޭޔަރ ބައި އިލެކްޝަންގައި އެމްޑީޕީގެ ކެނޑިޑޭޓް އާދަމް އާޒިމަށް ތާއީދު ކުރައްވަން ނިންމަވައިފިއެވެ.

އެގޮތުން ފަައިސަލް ނަސީމްވަނީ މިރޭ އޮތް އާދަމް އާޒިމްގެ ކެމްޕޭން އިވެންޓުގައި ބައިވެރިވެވަޑައިގެންފައެވެ. އަދި މިރޭގެ އިވެންޓުގައި ފައިސަލް ނަސީމުވަނީ ވާހަކަވެސް ދައްކަވާފައެވެ. މިރޭގެ އިވެންޓުގައި ވާހަކަ ދައްކަވަމުން ފައިސަލް ވިދާޅުވީ ނާއިބު ރައީސްގެ ހައިސިއްޔަތުން އާދަމް އާޒިމްއާއެކު ވަރަށްގިނަ މަސައްކަތްތަކެއް ކުރެވިފައިވާ ކަމުގައެވެ.

ފައިސަލް ވިދާޅުވީ ރައީސް ސާލިހުގެ ސަރުކާރަކީ ރާއްޖޭގެ ތާރީޚުގައި ތަރައްގީގެ އެންމެ ގިނަ މަސައްކަތް ހިނގި ސަރުކާރު ކަމުގައެވެ. އެ އެސަރުކާރުގެ އެންމެ ގިނަ މަޝްރޫޢުތައް ހިންގުމުގެ އެންމެ އިސް މާލިމީއެއްގެ ގޮތުގައި ހުންނެވީ އާދަމް އާޒިމް ކަމުގައެވެ. އަދި ފައިސަލް ވިދާޅުވީ އާދަމް އާޒިމްއަކީ ކޮންމެ ސަރުކާރަކާއެކީވެސް މަސައްކަތް ކުރެއްވޭނެ ބޭފުޅެއް ކަމަށާއި، އެހެންކަމުން އާޒިމްއަށް ވޯޓު ދެއްވާ އާޒިމްއިންތިޚާބު ކޮށްދެއްވުމަށް ފައިސަލް އެދިވަޑައިގެންނެވިއެވެ.

މާލޭގެ މޭޔަރުގެ ގޮނޑި ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ހޯއްދެވި ކާމިޔާބީއާ އެކުގައި މިދިޔަ މަހުގެ 17 ވަނަ ދުވަހު ރައީސުލްޖުމްހޫރިއްޔާ ކަމުގެ ހުވާ ކުރެއްވުމުންނެވެ. ރައީސް މުއިއްޒާ އެކުގައި ސަރުކާރުގެ އެކިއެކި މަގާމުތަކަށް ވަޑައިގަތުމަށް މާލެ ސިޓީ ކައުންސިލްގެ ތިން ކައުންސިލަރުން ވެސް އިސްތިއުފާ ދެއްވާފައިވެއެވެ.

މި ގޮނޑިތަކަށް ބޭފުޅުން އިންތިހާބު ކުރުން އޮންނާނީ އަންނަ ޖެނުއަރީ މަހުގެ 13 ވަނަ ދުވަހު އެވެ.

މާލޭގެ މޭޔަރު ކަމަށް ވާދަކުރައްވާނެ ބޭފުޅުންގެ ތެރޭގައި ދެން ހިމެނެނީ އެމްޑީޕީގެ ޓިކެޓުގައި އެމްޓީސީސީގެ ކުރީގެ ސީއީއޯ އާދަމް އާޒިމްއާއި، މިހާރު މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މިނިވަން މެމްބަރެއްގެ ގޮތުގައި ފުރަހަނި ޝުއައިބުއެވެ.