ކުރިޔަށްދާ އިސްރާއީލު ހަމާސް ހަނގުރާމަ ހުއްޓާލުމަށް ދެފަރާތުގެ މެދުގައި ވި އެއްވަސްވުމާއި އެއްގޮތަށް، ހަމާސްއިން ރަހީނު ކޮށްފައިވާ އިސްރައީލުގެ 13 މީހުންނާއި، އިސްރާއީލުގައި ޖަލުން ފަލަސްތީނުގެ 39 މީހަކު މިނިވަން ކޮށްފިއެވެ.

ފަލަސްތީނުގެ ހަމާސް ޖަމާއަތުން ދޫކޮށްލި މީހުންގެ ތެރޭގައި ތައިލޭންޑުގެ 10 މީހުންނާއި ފިލިޕީންސް އެކަކު ހިމެނެއެވެ.

އިސްރާއީލުގެ ބޮޑުވަޒީރުގެ އޮފީހުން ވިދާޅުވެފައިވަނީ، ހަމާސްއިން ދޫކޮށްލުމަށް އެއްބަސްވެފައިވާ އެގައުމުގެ ރައްޔިތުންގެ ލިސްޓެއް ހޮނިހިރު ދުވަހު ވަނީ ލިބިފައިވާ ކަމުގައެވެ.

އިސްރާއީލާއި ހަމާސްއިން ހަނގުރާމަ ހުއްޓާލުމާއެކު، ޣައްޒާގައި ދިރިއުޅެމުންދާ މީހުންނަށް ވަނީ ވަރަށް ބޮޑު ލުޔެއް ލިބިފައެވެ. އެހެންނަމަވެސް، 4 ދުވަހަށް ހަނގުރާމަ ހުއްޓާލުމަށް އެއްބަސް ވެފައިވާތީ، 4 ދުވަހަށްފަހު ދެން ވެގެންދާނެ ގޮތަކާއިމެދު ޣައްޒާގެ ގިނަ އަދަދެއްގެ ރައްޔިތުންގެ މެދުގައި އުދާސްތައް ހުރި ކަމުގައި މީޑިއާތަކުން ރިޕޯޓު ކޮށްފައި ވެއެވެ.

7 ހަފްތާވަންދެއް ކުރިޔަށް ދިޔަ މި ހަނގުރާމާގައި މިހާތަނަށް ފަލަސްތީނުގެ 14,800 މީހަކު ވަނީ ޝަހީދު ވެފައެވެ. އޭގެ ތެރެއިން ގިނަ އަދަދެއްގެ ޝަހީދުންނަކީ ކުޑަކުދިންނެވެ. އިސްރާއީލުން މަރުވެފައިވަނީ 1،200 މީހުންނެވެ.