އިސްރާއީލު މީހުން ރާއްޖެއަށް އެތެރެވުން މަނާކުރުމަށް ގޮވާލާ ރައްޔިތުންގެ މަޖިލިހަށް ހުށަހެޅި ޕެޓިޝަން ރައްޔިތުންގެ މަޖިލިހުގެ ޕެޓިޝަން ކޮމިޓީން ފާސް ކޮށްފިއެވެ.
އިއްޔެ ބޭވުނު ކޮމިޓީ ބައްދަލުވުމުގައި ޕެޓިޝަނާ ގުޅޭ ގޮތުން ވާހަކަ ދައްކަވަމުން ރައްޔިތުންގެ މަޖިލިހުގެ އުނގޫފާރު ދާއުރާގެ މެންބަރު މުހައްމަދު ވަހީދު (ވައްޑެ) ވިދާޅުވީ ރާއްޖެއަކީ އެއްވެސް ގައުމަކާ ދެކޮޅު ގައުމަކަށް ނުވި ނަމަވެސް، އިންސާނިއްޔާއި ޚިލާފް ބޮޑެތި ޖަރީމާތައް ހިންގާ ގައުމުތަކާ ދެކޮޅަށް ރާއްޖެއިންވެސް ފިޔަވަޅު އަޅަން ޖެހޭކަމުގައެވެ. އަދި އެއީ ދުނިޔޭގެ އެހެން ގައުމުތަކާއި ބައިނަލްއަގުވާމީ ޖަމިއްޔާތަކުންވެސް އެކަން ކުރާ ގޮތްކަމަށްވެސް އޭނާ ވިދާޅުވިއެވެ.
އެނގިވަޑައިގަންނަވާނެ ފަލަސްތީނުގެ ރައްޔިތުންގެ ދަރިން މަރާފައި ފުނި ފުންޏަށް ޖަހަމުން އެ ގެންދަނީ. އެ މީހުން މުޅި އުމުރު ދުވަހު ބިނާކޮށްފައިވާ ގެދޮރު ހިނދުކޮޅެއްގެ ތެރޭގައި އެ ދަނީ ފުނޑުފުނޑުކޮށްލަމުން. ރާއްޖެއަކީ މިނިވަން މުސްގިއްލު ދައުލަތެއް. އަޅުގަނޑުމެންގެ ގާނޫނުގައި އޮންނަނީ ޓެރަޒިޒަމްގެ ގާނޫގައި ބަޔާންކޮށްފައިވާ މުދަލަށް ބޮޑެތި ގެއްލުންތައް ދިނުން، ފަސެންޖަރުން އުފުލާ އުނޅަދެއް ހައިޖެކް ކުރުން، އާންމުން ނުވަތަ އާންމުންގެ ސަލާމަތަށް ނުރައްކާވާ ހާލަތެއް ކުރިމަތިކުރުން. މުހިންމު އުމްރާނީ ބޮޑު ވަސީލަތްތަކަށް ގެއްލުން ދިނުން. އަސާސީ ހިދުމަތްތައް މެދުކަނޑާލުން. ބައިނަލްއަގްވާމީ ގޮތުން ހަނގުރާމަތަކުގައި ބޭނުން ކުރުން މަނާ ހަތިޔާރުތައް އިސްރާއީލުން ދަނީ ބޭނުންކުރަމުން. ފަލަސްތީނު ރައްޔިތުންގެ އެންމެ އަސާސީ އެންމެ ބޭނުންތެރި ހިދުމަތްތައް ވަނީ ކަނޑާލާފައި.
ކޮމިޓީގައި ވާހަކަ ދައްކަވަމުން ވަހީދު ވިދާޅުވެފައި ވެއެވެ.
ކޮމިޓީ ބައްދަލުވުމުގައި ވާހަކަ ދައްކަވަމުން ހެންވޭރު ހުނޅަގު ދާއިރާގެ މެންބަރު ހަސަން ލަތީފް ވިދާޅުވީ ފަލަސްތީނުގައި ހިގަމުންދަނީ ހަނގުރާމައެއްކަމަށް ގަބޫލު ނުކުރެވޭ ކަމުގައެވެ. އަދި އެއީ ގަތުލުއާންމެއްކަމަށް ސިފަ ކުރައްވަމުން އެއީ އިންސާނީ ހަޟާރަތެއް ނެތި ކޮށްލުމެއްކަމަށްވެސް އޭނާ ވިދާޅުވިއެވެ.
ކޮމިޓީގެ މުގައްރިރު މުލަކު ދާއިރާގެ މެންބަރު އިބްރާހިމް ނަސީރު ވިދާޅުވީ ރައިޓްސް މޫވްމަންޓުން ހުށަހަޅާފައިވާ އެ ޕެޓިޝަންގައި ގޮވާލަނީ އިސްރާއީލުގެ ޕާސްޕޯޓުގައި ރާއްޖެ އެތެރެވުން މަނާކުރުމަށް ކަމަށެވެ. އަދި އޭނާ ވިދާޅުވީ އެއީ އެ ކޮމިޓީއަށް ގޮތް ނިންމެން އޮތް ޕެޓިޝަނެއް ކަމުގައެވެ.
ޕެޓިޝަން ފާސް ކޮށްފައިވަނީ ކޮމިޓީގައި ބައިވެރިވި 6 މެމްބަރުންގެ އަޢުލަބިއްޔަތުންނެވެ.
