އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅާފައިވާ 49.6 ބިލިއަން ރުފިޔާގެ ބަޖެޓުގައި ކަނޑައޅާފައިވާ ހަރަދު ކުޑަ ކުރުމުގެ ސިޔާސަތުތައް ތަންފީޒު ކުރަން ޖެހޭ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު މިއަދު ވިދާޅުވެއްޖެއެވެ.
އަންނަ އަހަރަށް ލަފާކޮށް، މި ސަރުކާރުގެ ލަފައާ އެކު، ކުރީ ސަރުކާރުން ހުށަހެޅި ބަޖެޓުގެ ބަހުސް މަޖިލިހުގައި ވަނީ ފަށައިފައެވެ.
މަޖިލިހުގައި ބޭއްވި ޖަލްސާގައި ޝަފީގް ވިދާޅުވީ ފިސްކަލް އަދި ދެމެހެއްޓެނިވިކަން ކަށަވަރު ކުރުމަށް ދައުލަތުގެ ހަރަދާއި ފައިނޭންސް ހޯދަން ޖެހޭ މިންވަރު ކުޑަ ކުރަން ޖެހޭ އިރު، ހަރަދު ކުޑަކުރުމަށް ފިޔަވަޅުތައް ތަންފީޒު ކުރުމަކީ މުހިންމު ކަމެއް ކަމަށެވެ.
އެގޮތުން ބަޖެޓުގައި ހަރަދު ކުޑަ ކުރުމަށް ހިމަނާފައިވާ ކަންކަމަކީ އިންޑައިރެޓްސް ބައެއް ސަބްސިޑީތައް ސަރުކާރުގެ އެންމެ ބޭނުން ޖެހިފައިވާ ފަރާތްތަކަށް ހާއްސަ ކުރެވޭ ގޮތަށް ޑައިރެކްޓް ސަބްސިޑީއަކަށް ބަދަލު ކުރުމާއި އާސަންދައިގެ ނިޒާމު ހަރުދަނާކޮށް މުރާޖައާ ކުރުމާއި ސަރުކާރުގެ ވެލްފެއާގެ ގޮތުގައި އެހީ ދޭ ނިޒާމު ހަރުދަނާ ކުރުން ކަމަށް ވެސް ޝަފީގް ވިދާޅުވިއެވެ. އަދި މި ސިޔާސަތުތައް އެކުލަވާލާފައި ވަނީ އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި ވޯލްޑް ބޭންކާއި އޭޝިއަން ޑިވެލޮޕްމަންޓް ބޭންކް (އޭޑީބީ) ފަދަ މާލީ އިދާރާތަކުގެ އެހީގައި ކަމަށް ވެސް މިނިސްޓަރު ވިދާޅުވިއެވެ.
"އައިއެމްއެފް، ވޯލްޑް ބޭންކް އަދި އޭޑީބީ ފަދަ މާލީ އިދާރާތަކުގެ ފަންނީ އެހީތެރިކަމާއެކު ތައްޔާރު ކުރެވުނު ދިރާސާތަކުގެ އަލީގައި، އަންނަ އަހަރުގެ ޖުލައި މަހު މި ސިޔާސަތުތައް ތަންފީޒު ކުރުމަށް ކަމާބެހޭ ފަރާތްތަކާ އެކީގައި މިހާރު ވެސް މިދަނީ މަޝްވަރާ ކުރަމުން." ފިނޭންސް މިނިސްޓަރު ވިދާޅުވިއެވެ.
ފިނޭންސް މިނިސްޓަރު ވަނީ ހަރަދު ކުޑަ ކުރަން ކުރާ މަސައްކަތުގައި ދައުލަތުގެ ހުރިހާ މުއައްސަސާތަކެއްގެ އެއްބާރުލުމަށް އެދިވަޑައިގެންފައެވެ.
އަންނަ އަހަރަށް ކަނޑައަޅަފައިވާ ބަޖެޓަކީ ކުރީ ސަރުކާރުން ހުށަހެޅި ބަޖެޓެއް ނަމަވެސް، އެ ބަޖެޓުގެ ތެރެއިން އާ ސަރުކާރުގެ ވައުދުތައް ފުއްދަން ފަށައިގަނެވޭނެ ކަމަށް ޝަފީގް ވިދާޅުވިއެވެ.ޝަފީގު ވިދާޅުވީ، އަންނަ އަހަރުގެ ބަޖެޓުގައި ޕީއެސްއައިޕީއަށް 450 މަޝްރޫއުއަކަށް 1.5 ބިލިއަން ރުފިޔާ އާ ސަރުކާރުން ހިމަނާފައިވާ ކަމަށެވެ. އޭގެ ތެރެއިން ސަރުކާރުން ވެފައިވާ ވައުދުތައް ފުއްދަން ފެށޭނެ ކަމަށް އޭނާ ވިދާޅުވިއެވެ.
އަންނަ އަހަރުގެ ބަޖެޓުގައި ޕީއެސްއައިޕީގެ 1،700 އަށް ވުރެ ގިނަ މަޝްރޫއު ހިމަނާފައިވެއެވެ.
ޝަފީގު ވިދާޅުވީ، ސަރުކާރުގެ އަމާޒަކީ، މިހާރު ކުރިއަށްދާ މަޝްރޫއުތައް ވެސް ނުހުއްޓި ކުރިއަށް ގެންދެވޭނެ ގޮތްތަކަށް ހޯދައިގެން ކުރިއަށް ދިއުން ކަމަށެވެ.
