މި ސަރުކާރުގެ "ގެދޮރުވެރިޔާ" ސްކީމްގެ ދަށުން 4،000 ފްލެޓުތަކަށް ޕޮއިންޓް ދީފައިވާ ގޮތް މާދަމާއިން ފެށިގެން ޕޯޓަލް އިން ފެންނަން ހުންނާނެ ކަމަށް ހައުސިން މިނިސްޓްރީން މިއަދު ބުނެފިއެވެ.

ހައުސިން މިނިސްޓްރީގެ ފަރާތުން ބޭއްވި ނޫސްވެރިންގެ ބައްދަލުވުމުގައި މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ ދާއިމީ ލިސްޓަށް މިހާތަނަށް ލިބިފައިވާ ޝަކުވާތަކަށް ބަލާއިރު، އެ ލިސްޓަށް ބަދަލު އަންނަ ވަރުގެ ޝަކުވާއެއް ނެތް ކަމަށެވެ.

އާރިފް ވިދާޅުވީ މިހާތަނަށް ލިބިފައިވާ މައިގަނޑު ޝަކުވާތައް ހުށަހަޅާފައި ހުރީ، މާލޭގައި ދިގު މުއްދަތަކަށް ދިރިއުޅޭތީ ޕޮއިންޓް ލިބުނު ވަރު މަދުވެގެން ކަމަށެވެ. ނަމަވެސް އެ މުއްދަތު ދިގު ވުމަކީ، އުސޫލުގައިވާ ގޮތުން ޕޮއިންޓް އިތުރަށް ލިބެން ޖެހޭ ސަބަބެއް ނޫން ކަމަށް އޭނާ ވިދާޅުވިއެވެ.

އޭނާ ވިދާޅުވީ ތިން ކޮޓަރީގެ އެޕްލިކޭޝަންތަކުން މިހާތަނަށް ގާތްގަނޑަކަށް 2،000 ޝަކުވާ ލިބުނު އިރު، ދެ ކޮޓަރީގެ ފްލެޓުތަކުގެ ފޯމުތަކުން 900 ޝަކުވާ ލިބިފައިވާ ކަމަށެވެ.

"ރޭންޑަމްކޮށް މިތަނަށް އަންނަން ވެގެން ޗެކްކޮށްލި އިރުގައި ބައެއް ބޭފުޅުން ބުނެފައި އެބަހުރި ތިމަންނައަށް ލިބެން ޖެހޭނެއޭ މިހާ ވަރުގެ ސްކޯ. ދެން އަޅުގަނޑުމެން އެބޭފުޅާގެ ފޯމް ހުޅުވާލާފައި ބަލާލިން. ޖަވާބުދޭކަށް ނޫން. މައުލޫމާތަށްޓަކައި ބަލާލިއިރުގައި އެބޭފުޅާ ފޯމްގައި ދެއްވާފައިވާ މައުލޫމާތުން އެބޭފުޅާ އަށް ލިބޭ ވަރަށް ލިބިފައި ހުރީ. އެކަމަކު، މީތި ރިއަލައިޒްވެގެން މިއުޅެނީ ފަހުން ކަމަށް ވެދާނެ. އަޅުގަނޑުމެން މިއުޅެނީ ސްކޯރިން ރިޕޯޓު ޕޯޓަލަށް ވަނީމަ ކޮންމެ ބޭފުޅަކަށް ވެސް ދައްކާލަ ދޭން،" އާރިފް ވިދާޅުވިއެވެ.

އޭނާ ވިދާޅުވި ގޮތުގައި މިކަން ނިމިގެން ދާން ބޭނުން ވަނީ އެއްވެސް މީހެއްގެ ހައްގަކަށް އުނިކަން ނުލިބޭ ގޮތަށެވެ.

ފްލެޓު ލިބޭ މީހުންގެ ވަގުތީ ލިސްޓު އާއްމުކުރި އިރު ހަމައެކަނި ކަނޑައަޅާފައި ވަނީ ޝަރުތު ހަމަވާ މީހެއްގެ ގޮތުގައި އާއި ޝަރުތު ހަމަނުވާ މީހެއްގެ ގޮތުގައެވެ. އެ މީހަކަށް ލިބުނު ޕޮއިންޓް ފެންނަނީ ޕޯޓަލުންނެވެ. އެކަމަކު، ދާއިމީ ލިސްޓް އާއްމުކުރި އިރު ކޮންމެ މީހަކަށް ވެސް ލިބުނު ޕޮއިންޓް އާއްމުކޮށްފައިވެއެވެ. ޕޮއިންޓް ދީފައި ހުރި ގޮތުގެ ތަފްސީލެއް ނެތެވެ.

ޝަކުވާތަކަށް ހުޅުވާލި މުއްދަތު އަންނަ ބުރާސްފަތި ދުވަހު ހަމަވުމުން 24 ގަޑިއިރު ތެރޭ އެ ހުރިހާ ޝަކުވާއަކަށް ޖަވާބު ދޭނެ ކަމަށް އާރިފް ވިދާޅުވިއެވެ.

ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓުގައި ފްލެޓަށް ޝަރުތު ހަމަވާ 13،000 މީހުން އެބަ ތިއްބެވެ. އޭގެ ތެރެއިން، މި ސަރުކާރުން ދޭ ފުރަތަމަ 4،000 ފްލެޓް ލިބޭނެ މީހުން ކަނޑައެޅި އިރު، ފްލެޓް ދެނީ ތިން ކޮޓަރީގެ ފްލެޓަށް ހުށަހެޅި މީހުންގެ ތެރެއިން 76 ޕޮއިންޓަށް ވުރެ މަތިން ލިބޭ މީހުންނަށެވެ. އަދި ދެ ކޮޓަރީގެ ފްލެޓަށް ހުށަހެޅި މީހުންގެ ތެރެއިން 73 ޕޮއިންޓަށް ވުރެ މަތިން ލިބުނު މީހުންނަށެވެ.