ރައްޔިތުންގެ މަޖިލީހުގެ ރައިސްގެ އިތުބާރު ނެތްކަމުގެ މައްސަލައިގެ ގަރާރު މަޖިލީހުގެ ނާއިބު ރައިސް ބަލަހައްޓަންޖެހޭނެކަމަށް މަޖިލީހުގެ ޤަވާއިދުގައި ބަޔާންކުރާތީ، އެނޫން ގޮތަކަށް އަމަލުކުރެވޭނީ ގަވާއިދު އިސްލާހުކޮސްގެންކަމަށް މަޖިލީހުގެ އިދާރާއިން ސުޕްރީމް ކޯޓުގައި ބުނެފިއެވެ.
މަޖިލީހުގެ ރައީސް ނަޝީދުގެ އިތުބާރު ނެތްކަމުގެ މައްސަލަ ކުރިއަށްނުގެންދެވިފައިވަނީ މަޖިލީހުގެ ނާއިބު ރައީސް ސަލާމުގައި ހުންނެވުމުގައެވެ. މި މައްސަލާގައި އެމްޑީޕީން ސުޕްރީމް ކޯޓަށް ހުށައަޅާފައިވާ މައްސަލާގައި ފަނޑިޔާރުން ވަނީ މަޖިލީހުގެ ކައުންސެލް ޖެނެރަލް ފާތިމަރު ފިރުޒާއާއި ގިނަ ސުވާލުތަކެއް ކުރައްވާފައެވެ.
މިގޮތުން ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު ހުސްނުއްސުއޫދު ވަނީ މަޖިލީހުގެ ނައިބު ރައީސަށް ރިޔާސަތު ނުބެލެހެއްޓޭ ނުވަތަ އުޒުރުވެރިވާ ހާލަތެއްގައި މަޖިލީހުގެ ގަވާއިދުގެ 44 ވަނަ މާއްދާގެ ދަށުން، މަޖިލީހުގައި އެންމެ ގިނަ ދުވަސްވީ މެމްބަރުންނަށް ރިޔާސަތާ ހަވާލުވޭ ގޮތަށް އޮންނަ އިރު، ދުނިޔޭގެ އެހެން ގައުމުތަކުގެ ގާނޫނު ހަދާ މަޖިލީހުގައި އަމަލުކުރަނީ ކޮން ގޮތަކަށްތޯ ސުވާލުކުރައްވާފައެވެ.
އެ ސުވާލަސް ޖަވާބު ދެއްވަމުން ކައުސެލް ޖެނެރަލް ފިރުޒާ ވިދާޅުވީ، ރާއްޖޭގެ ގާނޫނުއަސާސީގައިވެސް ބަޔާންކޮށްފައިވާ ގޮތަށް އެހެން ގައުމުތަކުގައިވެސް މަޖިލީހުގެ ރައީސްގެ އިތުބާރު ނެތްކަމުގެ ގަރާރެއްގެ ޖަލްސާގެ ރިޔާސަތު ވަކި ބޭފުޅަކު ބަލަހައްޓަވާ ގޮތަށް ބަޔާންކޮށްފައި ނޯންނަ ކަމަށެވެ. ނަމަވެސް ގާނޫނުއަސާސީގެ 82 މާއްދާގެ ދަށުން މަޖިލީހުގެ ރައީސްގެ އިތުބާރުނެތްކަމުގެ ގަރާރެއް ހުށަހަޅާފައިވާ ޖަލްސާގެ ރިޔާސަތުގައި މަޖިލީހުގެ ރައީސް އިނދެގެން ނުވާނެ ކަމަށް ބަޔާންކޮށް، މަސްލަހަތު ފުށުއެރުމުގެ މައްސަލަ ހައްލުކޮށްދީފައި އޮއްވައި، މަޖިލީހުގެ ގަވާއިދުގައި އެހެން ގޮތަކަށް ބަޔާންކުރީ މަޖިލީހުގެ ވަކި ނިޔަތެއް އޮވެގެން ކަމަށް ގަބޫލުކުރެއްވޭކަމަށް ފިލްޒާ ވިދާޅުވިއެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލައަކީ މަޖިލީހުގެ ހަޔާތުގައި އަންނާނެ އެންމެ މުހިންމު މައްސަލަކަމަށާއި، އެހެންކަމުން ދެން އެ މައްސަލާގައި ރިޔާސަތުގައި އިންނަވާނީ މަޖިލީހުގައި ހުންނެވި އެންމެ އިސް ފަރާތްތަކަމަށެވެ.
ފިލްޒާ ވިދާޅުވީ މަޖިލީހުގެ ގަވާއިދުގައި އެހާ ސަފުކޮށް ބަޔާންކޮށްފައިވާކަމެއް އާންމު އިޖުރާއަތުގެ މާނައެއް ނަގައިގެން މަޖިލީހުގެ އިދާރާއަށް ނިންމުމެއް ނިންމޭނެ ކަމަށް ޤަބޫލު ނުކުރައްވާކަމަށެވެ.
މިއާއެކު ހުސްނުއްސުއޫދު ވަނީ ގަސްދުގައި މަޖިލީހަށް ވަޑައިނުގެން މަޖިލިސް ޑެޑްލޮކެއްގައި ބޭއްވިދާނެތޯވެސް ސުވާލުކުރައްވާފައެވެ.
މިއާއެކު ފިލްޒާ ވިދާޅުވީ، މަޖިލީހަށް މިހާރު ކުރިމަތިވެފައިވާ ހާލަތުން، މަޖިލީހުގެ އިތުރު މަސައްކަތެއް ނުކުރެވޭނެ ކަމަށް އެމްޑީޕީން ގަބޫލުކުރިޔަސް، މަޖިލީހުގެ އާންމު ޖަލްސާތައް ކުރިއަށް ގެންދަން ހުރަހެއް އޮތް ކަމަކަށް ގަބޫލުނުކުރައްވާކަމަށެވެ.
މްޑީޕީން ސުޕްރީމް ކޯޓަށް ހުށަހެޅި މައްސަލައިގައި ކޯޓުން ވަކި ގޮތަކަށް ނިމެންދެން ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ރައްޔިތުންގެ މަޖިލީހުގެ ރިޔާސަތުގައި އިނުމަށް މަޖިލީހުގެ ނައިބު ރައީސް އީވާ އުޒުރުވެރިވެވަޑައިގަންނަވާތީ ދެން ޖަލްސާއަކަށް އެ މައްސަލަ އެޖެންޑާ ނުކުރާނެ ކަމަށް މަޖިލީހުގެ އިދާރާއިން މިއަދު ވަނީ ހާމަކޮށްފައެވެ.
