ނުރަސްމީ ދަތުރުފުޅެއްގައި އިންތިޚާބީ ރައީސް ޑރ. މުޙައްމަދު މުއިއްޒު ސިންގަޕޫރަށް ކުރެއްވި ދަތުރުފުޅަށްފަހު ރާއްޖެ ވަޑައިގެންފިއެވެ.
އެމަނިކުފާނު ސިންގަޕޫރަށް ފުރާވަޑައިގެންފައިވަނީ މިދޔަ ހަފްތާގެ ހޯމަ ދުވަހުގެ ރޭގައެވެ. ދަތުރުފުޅު ނިންމަވާ ލެއްވުމަށްފަހު ރާއްޖެ ވަޑައިގެންފައިވަނީ ރޭގެ ވަގުތެއްގައެވެ. މި ދަތުރުފުޅުގައި ޕީޕީއެމް/ޕީއެންސީގެ އިސް ބައެއް ބޭފުޅުންވެސް ބައިވެރިވެ ވަޑައިގެންފައިވެއެވެ.
މިއީ ރިޔާސީ އިންތިޚާބު ކާމިޔާބުކުރެއްވުމަށްފަހު އިންތިޚާބީ ރައީސް ރާއްޖެއިން ބޭރަށް ކުރެއްވި ފުރަތަމަ ދަތުރުފުޅެވެ. އިންތިޚާވީ ރައީސް ޑރ. މުއިއްޒާއި، ނައިބް ރައީސް ހުސެއިން މުހައްމަދު ލަތީފް، ހުވާ ކުރެއްވުމުގެ ޖަލްސާ އޮންނާނީ ނޮވެމްބަރު 17 ވާ ހުކުރު ދުވަހުގެ ހަވީރު 16:45 ގައެވެ.
ގާނޫނު އަސާސީގައި ބަޔާންކޮށްފައިވަނީ ރައީސުލްޖުމްހޫރިއްޔާގެ މަގާމުގެ ދައުރަކީ ފަސް އަހަރުކަމަށެވެ. ރާއްޖޭގައި ރައީސުން ހުވާކުރެއްވުމުގެ ޖަލްސާ ބާއްވަމުން އައިސްފައިވަނީ ނޮވެންބަރު މަހުގެ 11ވަނަ ދުވަހުއެވެ. އެއީ ރާއްޖޭގެ ޖުމްހޫރީ ދުވަހެވެ. ނަމަވެސް 2013 ވަނަ އަހަރުގެ ރިޔާސީ އިންތިޚާބު ކުރިއަށްގެންދިއުމުގައި ދިމާވި ކަންތަންތަކެއްގެ ސަބަބުން އެއަހަރު އެ ރަސްމިއްޔާތު ފަސްކުރައްވާ، ބޭއްވެވީ ނޮވެމްބަރު 17ގައެވެ. 2013 ވަނަ އަހަރު އިންތިޚާބުގެ ދެބުރެއް ސުޕްރީމް ކޯޓުން ބާތިލުކުރުމާ ގުޅިގެން ރިޔާސީ އިންތިޚާބުގެ ދެވަނަ ބުރުގެ ވޯޓުލުން ބޭއްވީ އެ އަހަރުގެ ނޮވެމްބަރު 16 ވަނަ ދުވަހުއެވެ. އަދި ރައީސުލްޖުމްހޫރިއްޔާކަމުގެ ހުވާ ރައީސް ޔާމީން ކުރެއްވީ ނޮވެމްބަރު 17 ވަނަ ދުވަހުއެވެ.
މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރައީސުލްޖުމްހޫރިއްޔާކަމުގެ ހުވާ ކުރެއްވީ 2018 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހުއެވެ. އެ ޖަލްސާ އޮތީ ގަލޮޅު ދަނޑުގައެވެ.
