ފަލަސްތީނުގެ ރައްޔިތުންނާ އެކުގައި ތިބި ކަން ހާމަކޮށް "ރައިޓް މޫވްމަންޓް" ގެ ފަރާތުން ހާއްސަ ސައިކަލް ބުރަކާއި އެއްވުމެއް މާލޭގައި ބޭއްވުމަށް ނިންމައިފިއެވެ.
ރައިޓް މޫވްމަންޓުން އިންތިޒާމު ކުރާ މި ސައިކަލް ބުރު ފެށުމަށް ހަމަޖެހިފައި ވަނީ މިރޭ 8:00 ގައި ރަސްފަންނު ސަރަހައްދުންނެވެ. ސައިކަލް ބުރު ނިންމާލުމަށް ހަމަޖެހިފައި ވަނީ އާޓިފިޝަލް ބީޗަށެވެ. އާޓިފިޝަލް ބީޗުގައި ހާއްސަ އެއްވުމެއް މިރޭ 9:00 ގައި ބޭއްވުމަށް ވަނީ ހަމަޖެހިފައެވެ.
މި އިވެންޓުގައި ވީހާވެސް ގިނަ ބަޔަކު ބައިވެރިވުމަށް ރައިޓް މޫވްމަންޓުން އެދެއެވެ.
ރައިޓް މޫވްމަންޓުން ދަނީ އިސްރާއީލް މީހުން ރާއްޖެ އައުން ހުއްޓުވުމަށް ގޮވާލައި މިދިޔަ ހަފުތާގައި ޕެޓިޝަނެއްގައި ސޮއިކުރަމުންނެވެ. އެ ޖަމިއްޔާ އާއި އެހެން ޖަމިއްޔާތައް އަދި ކްލަބުތައް ގުޅިގެން ރައިޓް މޫވްމަންޓުން ވަނީ މީގެކުރިން މާލޭގައި ބޮޑު ހިނގާލުމެއް ވެސް ބާއްވައިފައެވެ.
އިސްރާއީލްގެ ލާއިންސާނީ އަމަލުތަކާ ދެކޮޅަށް އަޑު އުފުލައި، ރާއްޖޭގެ އަންހެނުން ފަލަސްތީނާ އެކު ތިބިކަން އަންގައިދިނުމަށް އިސްރާ އެސޯސިއޭޝަން ގުޅިގެން އެހެން ޖަމިއްޔާތަކާ ގުޅިގެން އިއްޔެ ވެސް މާލޭގައި ބޮޑު ހިނގާލުމެއް ބޭއްވިއެވެ.
އިސްރާއީލްގެ ހަމަލާތަކުގައި ފަލަސްތީނުގެ 9,227 މީހަކު ވަނީ ޝަހީދުވެފައެވެ. އޭގެ ތެރޭގައި އޭގެ ތެރޭގައި 3,826 ކުޑަކުދިންނާއި 2,405 އަންހެނުން ހިމެނެއެވެ. އަދި 32,516 މީހަކަށް އަނިޔާވެފައިވާއިރު އޭގެ ތެރޭގައި ވެސް ގިނަ އަދަދެއްގެ އަންހެނުންނާއި ކުޑަކުދިން ހިމެނެއެވެ.
