ދައުލަތަށް މިހާތަނަށް ލިބުނު އާމްދަނީގެ އިތުރުން 15 ބިލިއަނެއްހާ ރުފިޔާ ބޭނުންވާ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ކޯވިޑް-19ގެ ޙާލަތާއި ގުޅިގެން ލޯނާއި ހިލޭ އެހީގެ ގޮތުގައި މިހާތަނަށް 520 މިލިއަން ޑޮލަރު ލިބިފައިވާކަމަށް ފިނޭންސް މިނިސްޓަރ އިބްރާހީމް އަމީރު ވަނީ ވިދާޅުވެފައެވެ. ނަމަވެސް 2020 ވަނަ އަހަރު ހުށަހެޅި ބަޖެޓުގެ އަންދާޒާތައް ކޯވިޑް-19އާ ގުޅިގެން ވަރަށް ބޮޑަށް ބަދަލުވެފައިވާ ކަމަށެވެ. އެގޮތުން ހިލޭ އެހީއާއި އާމްދަނީގެ ގޮތުގައި ގާތްގަނޑަކަށް 30 ބިލިއަން ލިބޭނެކަމަށް އަންދާޒާކުރިނަމަވެސް، މިހާރު ލިބޭނެ ކަމަށް ލަފާކުރެވެނީ ގާތްގަނޑަކަށް 14 ބިލިއަން ރުފިޔާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިއަހަރަށް ލަފާކޮށް ހުށައެޅި ބަޖެޓުގެ އަންދާޒާތަކަށް ވަރަށް ބޮޑެތި ބަދަލުތަކެއް އައިސްފައިވާކަމަށެވެ. ހިލޭއެހީއާއި ލޯންގެ ގޮތުގައި 30 ބިލިއަން ރުފިޔާ ލިބޭނެކަމަށް ކުރިން އަންދާޒާކުރިކަމަށާއި، ނަމަވެސް މިހާރު ލިބޭނެކަމަށް އަންދާޒާކުރަނީ 14 ބިލިއަން ރުފިޔާކަމަށެވެ. އެއީ 15 ބިލިއަން ރުފިޔާގެ ދަށްވުމެއްކަން މިނިސްޓަރ ފާހަގަކުރެއްވިއެވެ.
ދައުލަތުގެ އާމްދަނީ ދަށްވިނަމަވެސް ރައްޔިތުންނަށް ބޭނުންވާ އަސާސީ ޚިދުމަތްތައް މެދުނުކެނޑި ފޯރުކޮށްދެމުން އަންނަކަމަށާއި، ތަރައްޤީގެ އެއްވެސް މަޝްރޫޢެެއްވެސް ނުހުއްޓޭކަމަށެވެ. އެމަޝްރޫޢުތަކަށް ދައުލަތުން ދައްކަންޖެހޭ ފައިސާތައް ދައްކަވަމުން ގެންދަވާކަމަށާއި، އާމްދަނީއަށް އަސަރުކުރި މީހުންނަށް އެލަވަންސްތައް ދެމުން އަންނަކަމަށާއި، ސިއްޙީ ދާއިރާއަށް އިންވެސްޓްކުރަމުންވެސް ކޯވިޑްގެ ބަލިމަޑުކަން ރާއްޖޭގައި ވަރަށް ބޮޑަށް ކޮންޓްރޯލްކުރެވިފައިވާކަމަށެވެ.
" މިިދަނީ ރައްޔިތުންނަށް ދޭންޖެހޭ ހުރިހާ އަސާސީ ޙިދުމަތްތަކެއް ދެމުން، ސަރުކާރެއްގެގޮތުން ކުރަންޖެހޭ ހުރިހާ ކަމެއް ކުރަމުން މިދަނީ، އޭގެތެރޭގައި ފާހަގަކޮށްލަންބޭނުންވޭ، އެއްވެސް ޕްރޮޖެކްޓެއް ނުހުއްޓި، ޕްރޮޖެކްޓުތަކަށް ދައްކަން ޖެހޭ ފައިސާވެސް ދައްކަމުން، އިންކަމް ސަޕޯޓު އެލަވަންސްވެސް ދެމުން މިދަނީ،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އަންނަ އަހަރަށް ލަފާކޮށް ހުށައަޅާ ބަޖެޓްގައި ފަތުރުވެރިކަމަށް ބަރޯސާވާ މިންވަރުކުޑަކޮށް ދަނޑުވެރިކަމާއި މަސްވެރިކަމަށް އިންވެސްޓްކުރުމަށް މުސްތަޤްބަލަށް ރާވާފައިވާ ކަންކަން ފެންނާކެމަަށެވެ.
