ނާޖާއިޒު މަންފާ ލިބޭ ގޮތަށް ކޮށްފައިވާ އެއްވެސް ކަމެއް ނޯންނާނެ ކަމަށް ފިޔުލް ސަޕްލައިސް މޯލްޑިވްސް ޕްރައިވެޓް ލިމިޓެޑް (އެފްއެސްއެމް) ގެ މެނޭޖިންގ ޑިރެކްޓަރު މުޙައްމަދު ގަސަމް ވިދާޅުވެއްޖެއެވެ.
ސްޓޭޓު ޓްރޭޑިން އޮގަނައިޒޭޝަން (އެސްޓީއޯ) ގެ ސަބްސިޑިއަރީ ކުންފުނި، އެފްއެސްއެމްގެ ލިޔުންތަކެއް ސިމެންތި ގަށާ މެޝިނަކަށް އަޅައި ފުނޑުކުރާ ވީޑިއޯއެއް އެ ކުންފުނީގެ މުވައްޒަފަކު ސޯޝަލް މީޑިއާއަށް ދޫކޮށްލުމާއެކު، މައްސަލަ ހޫނުވެފައި ވަނިކޮށް ގަސަމް ވިދާޅުވީ "ފޮރުވަންޖެހޭ، ނާޖާއިޒު މަންފާ ލިބޭ ގޮތަށް ކޮށްފައިވާ އެއްވެސް ކަމެއް ނޯންނާނެ ކަމުގެ ޔަގީންކަން އަރުވަން" ކަމަށެވެ.
އެ ޕޯސްޓުގައި އޭނާ ވިދާޅުވީ ލިޔެކިޔުންތަކެއް ނައްތާލީ އޭނާ ހިންގާފައިވާ ނުރަނގަޅު ކަންތައްތަކެއް ފޮރުވަންކަމަށް މީހުންގެ ސިކުނޑިއަށް ވެއްދުމަށް ބައެއް ފަރާތްތަކުން ސޯޝަލް މީޑިއާގެ ވަސީލްތަތައް މެދުވެރިކޮށް ކުރަމުން އަންނަ މަސައްކަތަކީ ފިނޑި އަމަލެއް ކަަމަށެވެ.
އޭނާ އަދިވެސް ހުންނެވީ މައިންބަފައިން ދިން ހެޔޮ ތަރުބިއްޔަތުގެ މަތީގައިކަން ފާހަގަކުރައްވައި ގަސަމް ވިދާޅުވީ އޭނާ ކޮށްފައިވާ ހަލާލު މަސައްކަތުން ލިބޭ އެއްޗެއް ނޫނީ ބޭނުންނުކުރައްވާކަމުގެ ޔަގީންކަން އެބައޮތް ކަަމަށެވެ. އަދި އެފްއެސްއެމްގައި ކުރައްވާފައިވާ ކޮންމެ މަސައްކަތަކީ ވެސް ކުންފުނީގެ ކުރިއެރުމަށް ކޮށްފައިވާ މަސައްކަތެއް ކަމަށާއި ނާޖާއިޒު މަންފާ ލިބޭ ގޮތަށް ކޮށްފައިވާ އެއްވެސް ކަމެއް ނޯންނާނެކަމުގެ ޔަގީންކަން ގަސަމް ދެއްވިއެވެ.
މުހިންމު ލިޔުންތަކެއް ގަވާއިދާ ޚިލާފަށް ނައްތާލިކަމަށް ބުނާ ވާހަކަތައް އެފްއެސްއެމް އިން ވަނީ ދޮގުކޮށްފައެވެ. އެ ކުންފުނިން ހޯމަ ދުވަހު ބުނީ ނައްތާލާފައިވަނީ ގިނަ ދުވަސްވެފައިވާ، ކުންފުންޏަށް ބޭނުންނުވާ ބައެއް ލިޔުންތައް ކަމަށެވެ. މިއީ އެ ކުންފުނިން ކުރިންވެސް ކުރާ ކަމެއް ކަމަށް ބުންޏެވެ.
އެ ކުންފުނިން ބުނީ، މީސްމީޑިއާގައި ދައުރުވަމުންދާ ވީޑިއޯއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ. އަދި އެކަމާ ގުޅޭގޮތުން އެއްވެސް އިދާރާއަކުން ކަމެއް ސާފުކުރަން ބޭނުންވާނަމަ އެފްއެސްއެމްއިން އެމަކަށް އެއްބާރުލުން ދޭނެ ކަމަށް ވެސް އެ ކުންފުނިން ބުންޏެވެ.
ނައްތައިލި ލިޔުންތަކަކީ ގިނަ އަހަރުތަކެއް ވަންދެން ގުދަން ކުރެވިފައިހުރި، އަދި އެއްވެސް ގޮތަކުން ކުންފުންޏަށް ބޭނުންވާނޭ ފަދަ ލިޔެކިޔުންތަކެއް ނޫން ކަމަށް އެފްއެސްއެމްއިން ބުނެއެވެ. އެ ލިޔުންތައް ނައްތާލީ ގާނޫނާ ހިލާފަށް ކަމަށާއި އެ މައްސަލަ ފުލުހަށް ހުށަހަޅާނެ ކަމަށް، ދައުލަތުގެ އިދާރާތަކުގައި ހުންނަ ލިޔުންތައް ރައްކާކުރުމުގެ ގާނޫނީ ހައިސިއްޔަތު އޮންނަ އިދާރާ، ގައުމީ އަރުޝީފުން ބުނެފައިވެ އެވެ. އެންޓި ކޮރަޕްޝަން ކޮމިޝަން (އޭސީސީ) އިން ވެސް ވަނީ އެ މައްސަލަ ފުލުހަށް ރިޕޯޓުކޮށްފައެވެ.
