މާލެ ސަރަހައްދުގައި ތަރައްޤީކުރަމުންދާ ތިލަމާލެ ބްރިޖާއި ގުޅޭގޮތުން ދޮގު ވާހަކަތަށް ނުފެތުރުމުނަށް އިންޑިއާ ހައިކޮމިޝަނުން އެދިއްޖެއެވެ.
އިންޑިއާ ހައިކޮމިޝަނުން ބުނީ، ތިލަމާލެ ބްރިޖު މަޝްރޫއު ކުރިއަށްދާ ގޮތާއި، މަޝްރޫއުއާ ގުޅޭ ތާރީހު، އަދި އެ މަޝްރޫއުގެ ޓައިމް ލައިން ގެނެސް ދީފައިވަނީ ހަގީގަތް އޮޅޭ ގޮތަށް ސައްހަ ނޫން މައުލޫމާތުތަކެއްކަމަށެވެ. އިންޑިއާ ހައިކޮމިޝަނުން އެ އިޝަރާތްކުރީ މީޑިއާއަކުން ގެނެސްދިން މަޢުލޫމާތެއްގެ ސަބަބުންނެވެ.
ގްރޭޓަރ މާލެ ކަނެކްޓިވިޓީ ބްރިޖްގެ އަމަލީ މަސައްކަތް ފަށާފައިވަނީ 2022 ވަނަ އަހަރުގެ އޯގަސްޓްމަހުގެ ތެރޭގައެވެ. މި މަޝްރޫޢަކީ މާލެ ސަރަޙައްދުގައި އުމްރާނީ ގޮތުން ކުރިއަށް ގެންދެވޭ އެންމެ ބޮޑު ބިޔަ މަޝްރޫޢެވެ. މިމަޝްރޫގެ ދަށުން 4 ރަށެއް ގުޅުވާލާނެއެވެ. އެއީ މާލެއާއި ވިލިމާލެއާއި ގުޅީފަޅާއި ތިލަފުށްޓެވެ.
ތިލަފުށްޓާއި ހަމައަށް ބްރިޖް ގުޅާލުމުގެ މަސައްކަތް 2024 ވަނަ އަހަރުގެ މެދާ ހަމައަށް ނިންމުމަށް ސަރުކާރުން ވަނީ ޢަމާޒު ހިފާފައެވެ. މިމަޝްރޫއުގެ ދަށުން ޤާއިމްކުރާ 3 ބުރިޖާއި، ކޯސްވޭ އަދި މަގުތަކުގެ ނެޓްވޯކުގެ ދިގުމިނުގައި 6.7 ކިލޯމީޓަރު ހުންނާނެއެވެ. މީގެއިތުރަށް ގުޅާލާ، ކޮންމެ ރަށަކަށް އަރާ ފޭބުމަށް އިންޓަރޗޭންޖް ޕޮއިންޓްތަކާއި، ޕާކިން ސަރަހައްދުތައް ވެސް ހުންނާނެއެވެ.
މުޅި މި މަޝްރޫޢަށް 500 މިލިއަން ޑޮލަރު ހޭދަވާނެއެވެ. އެއީ 7 ބިލިއަނަށްވުރެ ގިނަ ރުފިޔާއެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. އަދި ދިވެހި ސަރުކާރުން ވެސް މި މަޝްރޫޢަށް ޚަރަދުކުރެއްވުމަށް ވަނީ ހަމަޖެހިފައެވެ.
