އިސްރާއީލުން ހިސޯރުކޮށް، ވައިގެ ހަމަލާތައް މެދުނުކެނޑި ދެމުންދާ ޢައްޒާއަށް އިންސާނީ ބޮޑު ކާރިސާއަކާ ކުރިމަތިވާން ދެންއޮތީ އެންމެ 24 ގަޑިއިރު ކަމުގައި ދުނިޔޭގެ ސިއްޙަތު ޖަމިއްޔާ، ޑަބްލިއުއެޗްއޯއިން ބުނެފިއެވެ.
ދުނިޔޭގެ ސިއްޙަތު ޖަމިއްޔާއިން ބުނެފައިވާ ގޮތުގައި ޢައްޒާގައި ކަރަންޓާއި، ފެނާއި އަދި ތެޔޮ މިހާރު ހުރީ އެންމެ 24 ގަޑިއިރަށް ފުދޭވަރަށް ކަމަށެވެ.
އދ.ގެ އޮފިޝަލުންގެ އިންޒާރުތައް ފާއިތުވި 24 ގަޑިއިރުގެ ތެރޭގައި އިތުރުވެ، ހަރުކަށިވެފައިވަނީ، ޣައްޒާގައި އިންސާނީ ޙާލަތު ގޯސްވަމުންދާތީ ކަމަށް ޔޫއެންއިން ބުނެފައިވެއެވެ. އދ.ގެ އޮފިޝަލުންގެ ބުނެފައިވަނީ، ޣައްޒާގައި ބޭނުންވާ މުހިންމު ސާމާނު ހުސްވަމުން ދިއުމުގެ އިތުރުން، ކާބޯތަކެއްޗާއި، ފެނާއި، ބޭހާއި، ތެޔޮ މިހާރު އެންމެ 24 ގަޑިއިރަށް ފުދޭވަރަށްވެސް އެ ސިޓީގައި ނެތް ކަމަށެވެ.
މިގޮތުން، ތެލަށް އެހާ ބޮޑު ޑިމާންޑެއް އޮތް އިރު، ކުރިއަށް އޮތް 24 ގަޑިއިރުގެ ތެރޭގައި ހޮސްޕިޓަލްތަކަށް ކަރަންޓު ދިނުމަށް ބޭނުންކުރާ ޖަނަރޭޓަރުތައްވެސް ހުއްޓުމަކަށް އަންނާނޭ ކަމުގެ ނުރައްކާ މިހާރު ކުރިމަތިވެފައިވާކަމަށް އދ.ގެ ހިއުމެނިޓޭރިއަން އެޖެންސީން ދަނީ ބުނަމުންނެވެ. އަދި، އެއީ އެތާނގައި ފަރުވާ ދެމުން ގެންދާ ޒަޚަމްވެފައިވާ އެތައް ބަޔަކަށް ކުރިމަތިވެގެންދާނެ ވަރަށްބޮޑު ނުރައްކަލެއްކަންވެސް އެފަރާތުން ފާހަގަ ކޮށްފައި ވެއެވެ.
ޣައްޒާގެ ހާލަތު ގޯސްވެ، އދ. އިން އިންސާނީ ވަސީލަތްތައް ފޯރުކޮށްދިނުމަށް ގޮވާލަމުން އަންނައިރު، އދ.ގެ އިންސާނީ ހައްގުތަކާބެހޭ އެންމެ އިސްވެރިޔާ، މާޓިން ގްރިފިތްސް، މިސްރާއި އިސްރާއީލުގެ އިސްފަރާތްތަކާ މަޝްވަރާ ކުރަމުންދާކަމަށްވެސް މީޑިއާތަކުން ރިޕޯޓު ކޮށްފައި ވެއެވެ.
އޭނާ މިއަދު ނެރުއްވި ބަޔާނެއްގައި ވިދާޅުވެފައިވަނީ އެހީގެ ސާމާނު ޣައްޒާއަށް ގެނެވޭނެ ގޮތެއް ހޯދުމަށް ވަރަށް ބުރަކޮށް މަސައްކަތް ކުރަމުން އަންނަ ކަމަށެވެ. އޭނާ ވިދާޅުވީ މިކަމުގައި އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެންގެ ބައިވެރިވުން ވަރަށް ބޮޑަށް ލިބުނު ކަމަށެވެ. އަދި މިއަދު ކޮންމެވެސް ހިސާބަކަށް މި އެހީގެ ގެންދެވޭނެކަމުގެ އުއްމީދުގައި ހުންނެވި ނަމަވެސް، އަދި އެމަންޒަރު ފެނިފައި ނުވާކަމަށްވެސް އޭނާ ވިދާޅުވިއެވެ.
