ފާޑު ކިއުންތަކާ ކުރިމަތިނުލާ އިސްލާހީ މަސައްކަތް ކުރެވިދާނެ ކަމަށް ހީކުރުމަކީ ކުށް ހީއެއް ކަމަށް ވިދާޅުވެ ހޯމް މިނިސްޓަރ އިމްރާން ކުރެއްވި ޓުވީޓުގައި ކޮމެންޓް ނުކުރެވޭ ގޮތަށް އޮތުމުން ކުރީގެ ބަންޑާރަ ނައިބް ދިޔާނާ އެކަމަށް ފާޑު ވިދާޅުވެއްޖެއެވެ.

އިމްރާން މިއަދު ކުރެއްވި ޓުވީޓުގައި ވިދާޅުވީ ފާޑު ކިޔުންތަކާ ކުރިމަތި ނުލާ އިސްލާހީ މަސައްކަތް، ވަކިން ހާއްސަކޮށް ސިޔާސީ އިސްލާހީ މަސައްކަތް ކުރެވިދާނެ ކަމަށް ހީކުރުމަކީ ވަރަށް ބޮޑު ކުށް ހީއެއް ކަމަށެވެ. އިމްރާންގެ މިޓުވީޓުގައި އެއްވެސް މީހަކަށް ކޮމެންޓް ނުކުރެވޭ ގޮތްވަނީ ހަދާފައެވެ.

ޚިޔާލް ފާޅު ކުރުމަށް ފުރުސަތު އޮންނަން ވާނެކަމަށް ބުނެ އިމްރާން ކުރެއްވި ޓުވީޓުގައި ކޮމެންޓް ކުރެވޭނެ ފުރުސަތު ނުދީ އޮތުމުން ދިޔާނާ ވިދާޅުވީ ފުރަތަމަ އިއްޒަތްތެރި ޝޭޚު ކުރަންވީ ކަމަކީ ކޮމެންޓު ކުރެވޭ ގޮތް ހެދުން ކަަމަށެވެ. ރައްޔިތުންގެ ޚާދިމުގެ ގޮތުގައި ތިބޭ މީހުންނަށް ފާޑުކިޔުން އަމާޒު ވާނެކަމަށާއި އެކަން ބަލައި ގަންނަން ޖެހޭކަމަށް ދިޔާނާ ވިދާޅުވިއެވެ. ނަމަވެސް ހަޑިހުރު ބަހުން ކޮމެންޓް ކުރާނަމަ އެފަދަ މީހުން ބްލޮކް ކުރުމުގެ ހައްގުވެސް އޮންނާނެ ކަމަށެވެ.

އިއްޒަތްތެރި ޝައިޚު، ކޮމެންޓް ކުރެއްވޭ ގޮތަށް ހައްދަވާ. ސިޔާސީ މަސައްކަތުގައި ފާޑު އަމާޒުވާނެ، އިންސާފުވެރި ފާޑުކިޔުމަށް ޖާގަވެސް ދެއްވަންވާނެ. އަމުދުން ރައްޔިތުންގެ ޚާދުމުން ރައްޔިތުންގެ ފާޑުކިޔުން ބަލައިގަންނަން ޖެހޭނެ. ހަޑި ހުތުރު އެއްޗިހި ކިޔައިފިނަމަ ބްލޮކް ކޮށްލުމުގެ ހައްގު އޮންނަންވާނެ.

– ދިޔާނާ ވިދާޅުވިއެވެ.

އިމްރާން މިހާތަނަށް އައީ އިދިކޮޅު ޕީޕީއެމް ޕީއެންސީއަށް ވަރަށް ބޮޑަށް ފާޑުވިދާޅުވަމުންނެވެ. ޚާއްޞަކޮށް އިންތިޚާބުގެ ތެރޭގައި ޑރ.މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވިއެވެ. ނަމަވެސް ޢިމްރާަށްވެސް އެކަމާއި ގުލިގެން ފާޑުކިޔުންތައް އަމާޒުވިއެވެ. އެގޮތުން ޢިމްރާން ބޮޑަށް މަސައްކަތްކުރައްވަނީ މަޤާމުގެ ބޭނުމުގައިކަމަށްވެސް ފާޑުކިޔާ ފަރާތްތަކުން ތުހުމަތުކުރެއެވެ.

ސަރުކާރުގައި އަދާލަތު ޕާޓީ އޮތްނަމަވެސް މަޖިލީހުގެ އެމްޑީޕީގެ މެންބަރުން ޢިމްރާނާއި އަދާލަތަށް ޢަމާޒުކުރާ އެންމެ ބޮޑު ފާޑުކިޔުމަކީ، އެޕާޓީއަށް މަޖިލީހުގެ އެއްވެސް ގޮނޑިއެއް ކާމިޔާބު ނުކުރެވުމެވެ. ކައުންސިލް އިންތިޚާބުގައިވެސް ކާމިޔާބުކުރެވުނީ ވަރަށް މަދު ގޮނޑިއެކެވެ.

ޢިމްރާނާއި އަދާލަތު ޕާޓީގެ އިސް ބޭފުޅުންނަކީ ރައީސް އިބްރާހީމް މުޙައްމަދު ޞާލީޙުގެ ވަރަށް އަރިސް ބޭފުޅުންތަކެކެވެ. ނަމަވެސް މިސަރުކާރު އައުމުގެ ކުރިން ޢިމްރާން ވަނީ އެމްޑީޕީއަށްވެސް ވަރަށް ބޮޑަށް ފާޑުވިދާޅުވެފައެވެ.