ނިމިގެން ދިއަ ސެޕްޓެމްބަރު މަހުގެ 7 ވަނަ ދުވަހު ސިނަމާތަށް ގެނެސްދިން ޝާހުރުކް ހާން ގެ ފިލްމް "ޖަވާން" އިން ބޮޑު އާމްދަނީއެއް ހޯދައިފިއެވެ.
މިއާއި އެކުގައި ޝާހުގެ މިއަހަރުގެ ފުރަތަމަ ފިލްމް "ޕަޓާން" ފަހަތަށް ޖައްސައި "ޖަވާން" އިން ވަނީ ރެކޯޑް މުގުރައިލައިފައިއެވެ. ޝާހުރުކް ހާން އަށް މިއަހަރަކީ ވަރަށް ވެސް ކާމިޔާބު އަހަރަކެވެ. މިއަހަރު ނެރުނު ޝާހުގެ ދެ ފިލްމްވެސް ވެގެން ގޮސްފައިވަނީ ވަރަށް ކާމިޔާބު އަދި ބޮޑު އާމްދަނީ އެއް ހޯދި ދެފިލްމްއަށެވެ.
ރިޕޯޓްތައް ބުނި ގޮތުގައި، މިދިޔަ މަހު ހަތެއްގައި ސިނަމާތަކުގައި ދައްކަން ފެށި "ޖަވާން" އަށް މިހާރު ވަނީ އިންޑިއާ އާއި ދުނިޔޭގެ ބޮކްސް އޮފީސް ވެސް ހިމެނޭ ގޮތަށް ޖުމްލަ 130.3 މިލިއަން ޑޮލަރުގެ އާމްދަނީއެއް ލިބިފަ އެވެ. މިދިޔަ ޖެނުއަރީ މަހު ރިލީޒްކުރި ޝާހުގެ "ޕަތާން" އަށް ލިބުނު ޖުމްލަ އާމްދަނީ އަކީ 126 މިލިއަން ޑޮލަރެވެ.
"ޕަތާން" އަކީ 27 މިލިއަން ޑޮލަރުގެ ބަޖެޓަކުން ހެދި ފިލްމެކެވެ. އަދި "ޖަވާން"ގެ ބަޖެޓަކީ 36 މިލިއަން ޑޮލަރެވެ. މި ކާމިޔާބީއާ އެކު، "ޖަވާން" އަކީ މި އަހަރު އެންމެ ބޮޑު އާމްދަނީއެއް ހޯދި އިންޑިއާގެ ފިލްމެވެ. "ޕަތާން" ދެވަނައިގައި އޮތް އިރު، 83 މިލިއަން ޑޮލަރު ހޯދައިގެން ސަނީ ޑިއޯލްގެ "ގަދަރު 2″ އޮތީ ތިންވަނައިގަ އެވެ.
ދެކުނު އިންޑިއާގެ ފިލްމު އިންޑަސްޓްރީގައި މަޝްހޫރު ޑައިރެކްޓަރު އަޓްލީ ކުމާރުގެ މި ފިލްމްގެ ކާސްޓަށް ކާސްޓަށް ބަލާ އިރު، މިއީ ބޮލީވުޑާއި ދެކުނުގެ ތަރިންތަކެއްގެ މުސްހުނި ކާސްޓެއް އެކުލެވޭ އެއްޗެކެވެ.
"ޖަވާން" ގެ ބަތަލާ އަކީ ދެކުނުގެ މަޝްހޫރު ބަތަލާ ނަޔަންތަރާ އެވެ. އިތުރު ކާސްޓުންގެ ތެރޭގައި ސާނިއާ މަލްއުތުރާ، ސުނިލް ގްރޯވާ، ވިޖޭ ސެތުޕަތީ، ޕްރިޔާމަނީ، ޔޯގީ ބާބޫ، ރިދިމާ ޑޮގްރާ އަދި އާސްތާ އަގަރްވާލް ހިމެނެ އެވެ.
