ވެނެޒުއޭލާގެ ރައީސް މަދުރޯއަށް ތާއީދު ކުރާ ފަރާތްތަކުން އެގައުމުގެ ނޭޝަނަލް އެސެމްބްލީއަށް މެބަރުން އިންތިޚާބުކުރުމަށް ބޭއްވުނު އިންތިޚާބު ކާމިޔާބު ކޮށްފައިވާކަމަށް، ވެނެޒުއޭލާގެ އިލެކްޝަންސް ކޮމިޝަނުން އިއުލާން ކޮށްފިއެވެ.
ވެނެޒުއޭލާގެ އިދިކޮޅު ލީޑަރު ޖުއާން ގުއައިޑޯ ވިދާޅުވެފައިވަނީ، މަދޫރޯގެ ޚުދުމުޚްތާރު ވެރިކަމުގައި، މިނިވަން އިންސާފުވެރި އިންތިޚާބެއް އެގައުމުގައި ބޭއްވުމަކީ މުސްތަހީލު ކަމެއްކަމުގައެވެ. އެގައުމުގެ ގާނޫނު ހަދާ މަޖިލީހުގައި މެޖޯރިޓީ ދަމަހައްޓަމުން އައި އިދިކޮޅު ޕާޓީތަކުން މިއިންތިޚާބު ބޮއިކޮޓް ކޮށްފައިވި ނަމަވެސް، ހަމަޖެހިފައި އޮތްގޮތަށް އިންތިޚާބު ވަނީ ކުރިޔަށް ގޮސްފައެވެ.
އަދި ދާއިމީ ނަތީޖާ އިއުލާން ކުރުމުގެ ކުރިން އެގައުމުގެ އިލެކްޝަންސް ކޮމިޝަނުން ވަނީ، ރައީސް މަދޫރޯއަށް ތާއީދުކުރާ ފަރާތްތަކުން ގާނޫނު ހަދާ މަޖިލީހުގެ މެޖޯރިޓީ ގޮޑިތައް ކާމިޔާބު ކޮށްފައިވާކަން ހާމަ ކޮށްފައެވެ.
އިދިކޮޅު ޕާޓީތަކުން ބުނެފައިވަނީ އިންތިޚާބުގެ ނަތީއަކީ ސައްޙަ ނަތީޖާއެއް ނޫންކަމަށެވެ. އަދި އިދިކޮޅު ލީޑަރު ޖުއާން ގުއައިޑޯ އަށާއި އަދި އޭނާގެ ގިނަ ބައިވެރިންނަށް ގާނޫނު ހަދާ މަޖިލިހުގެ ގޮޑިތައް މިފަހަރު ގެއްލިގެންދާނެއެވެ.
ގާނޫނު ހަދާ މަޖިލީހުގެ ރައީސްކަންވެސް ކުރައްވަމުން އައި، އިދިކޮޅު ލީޑަރު ޖުއާން ގުއައިޑޯ، 2019 ވަނަ އަހަރުގެ ޖެނުއަރީ މަހު، އޭނާއަކީ އެގައުމުގެ ރައީސްކަމަށް އަމިއްލަފުޅަށް އިއުލާން ކުރެއްވުމާއެކު، ވެނެޒުއޭލާގެ ސިޔާސީ މަސްރަހުވަނީ ހަލަބޮލި ވެފައެވެ. އެއަށްފަހު، އެމެރިކާއިން ވަނީ، ޖުއާން ގުއައިޑޯއަކީ ވެނެޒުއޭލާގެ ރައީސްކަމުގައި ބަލައިގެންފައެވެ. އެހެންނަމަވެސް، ޗައިނާއާއި ރަޝިއާއިން ވަނީ، ވެނެޒުއޭލާގެ ރައީސް މަދުރޯއަށް ހުރިހާ ގޮތަކުންވެސް އެހީތެރިކަން ފޯރުކޮށްދޭނެ ކަމަށް ބުނެފައެވެ.
ވެނެޒުއޭލާގެ ގާނޫނު ހަދާ މަޖިލީހަށް މެމްބަރުން އިންތިޚާބު ކުރުމަށް ބޭއްވުނު މިއިންތިޚާބު ގަބޫލު ނުކުރާނެ ކަމަށް އެމެރިކާއާއި އަދި އީޔޫން ވަނީ ބުނެފައެވެ.
