ކުރިޔަށް އޮތް ރިޔާސީ އިންތިޚާބުގެ ދެވަނަ ބުރު ނިމުމަށްފަހު، ބަރުލަމާނީ ވޯޓު ނެގުމުގެ މަސައްކަތްތައް ފަށައިގަތުމަށް ރައީސް ނަޝީދާއެކު އެއްބަސްވުމަކަށް އާދެވިފައިވާކަމުގައި ރައީސް ސާލިހު ވިދާޅުވެއްޖެއެވެ.
މިއަދު ރައީސް އޮފީހުގައި ރައީސް ސާލިހުއާއި ރައީސް ނަޝީދު ކުރިޔަށް ގެންދެވި މަޝްވަރާތަކަށްފަހު ނޫސްވެރިންނަށް މައުލޫމާތު ދެއްވަމުން ރައީސް ސާލިހު ވިދާޅުވީ އެ މަޝްވަރާތަކުގައި ވާހަކަދެކެވުނީ ރާއްޖޭގެ ސިޔާސީ މަސްރަހާއި ގުޅޭގޮތުން ކަމަށާއި، ކުރިޔަށް އޮތް ރިޔާސީ އިންތިޚާބުގެ ދެވަނަ ބުރަށްފަހު ނިޒާމީ ވޯޓުގެ ކަންކަމާއި ގުޅޭގޮތުން ކުރިޔަށް ވަޑައިގެންނެވުމަށް އެމަނިކުފާނު އެއްބަސް ވެފައިވާކަމުގައެވެ.
އަޅުގަޑުމެންނަށް ވާހަކަ ދެކެވުނީ މި ރިޔާސީ އިންތިޚާބަށްފަހުގަ އޭގެ މަސައްކަތްތައް ފަށައިގަތުމަށް. އަޅުގަޑުވެސް ދެން އިލެކްޝަން ކޮމިޝަންގަ އެދި އެކަމަށް އެދި ކުރިޔަށް ދިއުމާ ގުޅޭގޮތުން.. އަޅުގަޑުމެން ދެއްކީ މިހާރު އިހަށް އެވާހަކަ.. އިތުރު ތަފްސީލުގެ ވާހަކަ ނުދައްކާ، ދެވަނަ ބުރުގެ ވޯޓު ނިމުމުގެ ކުރިން އެއަށް ނުދިއުމަށް. އެވާހަކަ ނުދެއްކުމަށް. ދެން އޭގެ ފަހުން، ހަމަ ނިނުމާއެކީގެ އަދި ކޮންމެ ގޮތަކަށް އިންތިޚާބު ނިމުނުކަމަށް ވިޔަސް، އެމަސައްކަތްތައް ފަށައިގަތުމަށް.
މިއަދުގެ ބައްދަލުވުމަށްފަހު ރައީސް ސާލިހު ވިދާޅުވިއެވެ.
ރައީސް ޞާލިހާއިއެކު ރައީސް އޮފީހުގައި ރައީސް ނަޝީދު ބޭއްވި ކުރު ބައްދަލުވުމުގައި ކުރެވުނު މަޝްވަރާ ތަކާއި ގުޅޭގޮތުން ރައީސް ޞާލިހު ވިދާޅުވީ މިބައްދަލުވުމުގައި ދެބޭފުޅުން ރާއްޖޭގެ ސިޔާސީ މަސްރަހާއި ގުޅޭގޮތުންނާއި، ސިޔާސީ އެކި ކަންކަމާއި ގުޅޭ މަޝްވަރާތައް ކުރިއަށް ގެންދެވުނު ކަމަށެވެ.
ކުރެވުނު މަޝްވަރާތަކުގެ ތަފްސީލަށް ނުދިޔަ ނަމަވެސް ރައީސް ވިދާޅުވީ ނިޒާމީ ވޯޓު ނެގުމައި ގުޅޭގޮތުން މަޝްވަރާ ކުރެވުނު ކަމަށެވެ. އެގޮތުން އެވޯޓުގެ ވާހަކަ އިންތިޚާބަށްފަހު ދެއްކުމަށާއި މިވަގުތު އެވާހަކަ މަޑު ޖައްސާލަން މަޝްވަރާ ކުރެވުނު ކަމަށެވެ. އަދި އިންތިޚާބުގެ ނަތީޖާ ކޮންމެ ގޮތަކަށް ދިޔަޔަސް، ނިޒާމީ ވޯޓު އަންނަ މަހު ނެގުމަށް ކުރަންޖެހޭ މަސައްކަތް ކޮށްދެއްވުމަށް އިލެކްޝަންގައި ދަންނަވާނެކަމަށް ރައީސް ޞާލިހު ވިދާޅުވިއެވެ.
މީގެ އިތުރުން މިބައްދަލުވުމުގައި ޑިމޮކްރެޓުންގެ ތާއީދު ހޯދުމަށް ވާހަކަ ދެކުވުނު ކަމަށް ރައީސް ވިދާޅުވިއެވެ. ނަމަވެސް ރައީސް ނަޝީދު ވިދާޅުވެފައިވަނީ ޑިމޮކްރެޓްސްގެ ކައުންސިލުން ނިންމާފައިވާ ގޮތަށް އެބޭފުޅުން ތިއްބަވާނީ ނިއުޓްރަލްކޮށް ކަމަށެވެ.
ރައްޔިތުންގެ މަޖިލީހުން ފާސްކުރި ގަރާރަކުން އިލެކްޝަން ކޮމިޝަނަށް އަންގަވާފައި ވަނީ އަންނަ އޮކްޓޯބަރު މަހުގެ 30 ވަނަ ދުވަހުން ކުރިން ނިޒާމީ ވޯޓު ނެގުމަށެވެ. އެ ގަރާރާ ގުޅިގެން އެ ކޮމިޝަނުން ޤާނޫނީ ލަފާ ހޯދުމަށް ފަހު، ވޯޓު ކުރިއަށް ގެންދަން ވަނީ ނިންމަވާފައެވެ. އެކަމަކު އޭގެ ކުރިން ބައެއް ކަންކަން ސާފުކުރުމަށް ކޮމިޝަނުން ވަނީ މަޖިލީހަށް ހުށަހަޅުއްވާފައެވެ.
އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވީ، މި ވޯޓު ނެގުމަށް އެ ކޮމިޝަނުން ތައްޔާރުކަމަށެވެ. ނަމަވެސް އެކަން ކުރުމަށް ސާފުވާންޖެހޭ ބައެއް ކަންކަން އަދި އެބަހުރިކަމަށެވެ. ހަބީބް ވިދާޅުވީ، ރައްޔިތުންގެ ޚިޔާލު ހޯދަން ވޯޓު ނަގާއިރު އެ ނަގަނީ ކޮން މަޢުޞޫއަކަށްކަން، އަދި ކުރަން ޖެހެނީ ކޮން ސުވާލެއްކަން އެ ކޮމިޝަނަށް ސާފުވާން ޖެހޭ ކަމަށެވެ. ނަމަވެސް، މަޖިލީހުން އެކަން ހިއްސާކޮށްފައި ނެތް ކަމަށް ހަބީބު ވިދާޅުވިއެވެ.
އިލެކްޝަންގެ ޤާނޫނުގެ 32 ވަނަ މާއްދާގެ ދަށުން ރައްޔިތުންގެ ޚިޔާލު ހޯދުމުގެ ވޯޓު ނެގުމަކީ ކޮމިޝަންގެ ޒިންމާއެއް ކަމަށާއި އެހެންކަމުން، މިފަދަ ވޯޓެއް ނަގާއިރު ކޮމިޝަނުން އަމަލުކުރާނެ ގޮތްތައް ބަޔާންކުރާ ގަވައިދެއް އެކުލަވާލުމުގެ މަސައްކަތް ފަށާފައިވާ ކަމަށްވެސް އީސީގެ ނައިބު ރައީސް އިސްމާއީލް ހަބީބް ވިދާޅުވިއެވެ.
