ރާއްޖޭގައި އޮންނަން ފެންނަނީ ރިޔާސީ ނިޒާމެއްތޯ ނުވަތަ ބަރުލަމާނީ ނިޒާމެއްތޯ ބެލުމަށް ރައްޔިތުންގެ ހިޔާލު ހޯދުމުގެ އާންމު ވޯޓެއް ނަގަން ކުރާ މަސައްކަތުގެ ވާހަކަ ދެއްކުމަކީ އިދިކޮޅު ޕީޕީއެމް/ޕީއެންސީ އަށް މުހިންމު ކަމެއް ނޫން ކަމަށް ޕީއެންސީގެ ރައީސް އަބްދުއްރަހީމް އަބްދުﷲ މިއަދު ވިދާޅުވެއްޖެއެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕެއިނަށް ނ. ޅޮއްސަށް ވަޑައިގެން އެ ރަށުގައި ބޭއްވި ޖަލްސާގައި އަބްދުއްރަހީމް ވިދާޅުވީ ރާއްޖެ އަށް ބޭނުން ވަނީ ރިޔާސީ ނިޒާމެއް ކަން ރައްޔިތުން ނިންމައި އެކަން ގާނޫނުއަސާސީގައި ލިޔެފައިވާ ކަމަށެވެ.
"އަޅުގަނޑުމެންގެ ރައީސް، ރައީސް އަބްދުﷲ ޔާމީނަކީ ރައްޔިތުންގެ ނިންމުމާ އެއްގޮތަށް ކުރިއަށް ވަޑައިގަންނަވާ ބޭފުޅެއް. އަޅުގަނޑުމެންގެ ޕާޓީގެ ސިޔާސަތަކީ އެއީ. ކޮންމެ ކަމެއްގައި ވެސް އަޅުގަނޑުމެން އިސް ކުރާނީ ގައުމު،" އަދުރޭ ވިދާޅުވިއެވެ.
އަދުރޭ އެ އިޝާރާތް ކުރެއްވީ 2007 ވަނަ އަހަރު ދިވެހިންގެ މެދުގައި ނެގި ހިޔާލު ހޯދުމުގެ ވޯޓަށެވެ. ރާއްޖޭގައި އޭރު އޮންނަން ބޭނުންވަނީ ރިޔާސީ ނިޒާމެއްތޯ ނުވަތަ ބަރުލަމާނީ ނިޒާމެއްތޯ ބެލުމަށް ނެގި ވޯޓުގައި އެމްޑީޕީން ތާއީދު ކުރީ ބަރުލަމާނީ ނިޒާމަކަށެވެ. ވޯޓުލީ މީހުންގެ 40 އިންސައްތަ ބަރުލަމާނީއަށް ލިބުނުއިރު، ރިޔާސީ ނިޒާމަކަށް ތާއީދުކޮށް 60 އިންސައްތަ މީހުން ވޯޓު ދީފައިވެއެވެ.
އޭގެ އެތައް އަހަރެއް ފަހުން، އަނެއްކާ ވެސް ރާއްޖޭގައި އޮންނަން ފެންނަ ނިޒާމަކާ ބެހޭ ގޮތުން ވަނީ ވާހަކަތައް ދައްކަން ފަށައިފައެވެ. އެކަމުގައި އެންމެ އިސްކޮށް އުޅުއްވާ އެއް ބޭފުޅަކީ ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދެވެ.
ވެރިކަން ކުރުމުގެ ނިޒާމު ބަދަލުކުރުމުގެ ވޯޓު އަންނަ އޮކްޓޫބަރު މަހުގެ 30 ގައި ނަގަން ރައްޔިތުންގެ ހިޔާލު ހޯދަން ސީދާ ރައްޔިތުންގެ މަޖިލީހުން އިލެކްޝަންސް ކޮމިޝަން (އީސީ) އަށް އަންގާ ގޮތަށް ކަމާގުޅޭ ގަރާރު މަޖިލީހުން ވަނީ ފާސްކޮށްފައެވެ. އެ ގަރާރު މަޖިލިހަށް ހުށަހެޅުއްވީ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
އަބްދުއްރަހީމް ވިދާޅުވި ގޮތުގައި ކޮންމެ ކަމެއްގައި ވެސް ޕީޕީއެމް/ޕީއެންސީން އިސް ކުރާނީ ދިވެހި ގައުމެވެ. ރައްޔިތުން ރިޔާސީ ނިޒާމަކަށް ތާއީދު ކުރާ އިރު، ޕީޕީއެމާއި ޕީއެންސީން ތާއީދު ކުރަނީ ވެސް ރިޔާސީ ނިޒާމަކަށް ކަމަށް އަބްދުއްރަހީމް ވިދާޅުވިއެވެ.
"އަޅުގަނޑުމެން ނޫޅެން ކޮންމެހެން ނިޒާމީ ވޯޓެއްގައި އަޅައިގަނެގެން ނެއްޓެން ނޭނގިގެން. އަޅުގަނޑުމެން މިދަނީ ބާރު ސްޕީޑްގައި ކުރިއަށް ދިވެހިންގެ ރާއްޖެ އަށް ދާން މި ދަނީ." އަބްދުއްރަހީމް ވިދާޅުވިއެވެ.
