ރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭ ގޮތުން ރައްޔިތުން ދެކޭ ގޮތް ބެލުމަށް ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށް ރައްޔިތުންގެ މަޖިލީހަށް ހުށަހެޅި ގަރާރު މަޖިލީހަށް ބަލައި ގަތުމަށް ފާސްކޮށްފިއެވެ.
މިޤަރާރު މަޖިލީހަށް ހެޅުއްވީ ހުޅުދޫ ދާއިރާގެ މެމްބަރު އިލްޔާސް ލަބީބެވެ. މިޤަރާރަށް 1:30 މިނިޓަށް ބަހުސް ކުރުމަށްފަހު މިއަދު ވަނީ ވޯޓު ގަޑީގައި ވޯޓަށް އަހާފައެވެ. މިވޯޓު ފާސްވީ ވޯޓުގައި ބައިވެރިވި 35 މެމްބަރުންގެ އައުލަބިއްޔަތުންނެވެ. ހަމަ މިއާއިއެކު މިޤަރާރުގެ މަސައްކަތް މުޅި މަޖިލިސް ކޮމެޓީއަށް ގެންގޮސް ކުރުމަށް ވަނީ 34 މެމްބަރުންގެ ވޯޓުން ފާސްކޮށްފައެވެ.
ގަރާރު މަޖިލީހަށް ތައާރަފުކުރީ މިމަހުގެ 13 ވަނަ ދުވަހު ބޭއްވި މަޖިލީހުގެ ޖަލްސާގަ އެވެ. މި ގަރާރުގެ މަޖިލީހަށް ހުށަހަޅާ ބަހުސް ފަށާފައިވަނި މިއަދުއެވެ. މަޖިލީހުގެ މިއަދުގެ ޖަލްސާގައި ރައީސް ނަޝީދު ވަނީ ގަރާރު ނިމެންދެން މަޖިލީހުގެ މިއަދުގެ ޖަލްސާ ކުރިއަށް ގެންދަވާނެ ކަމަށް ވިދާޅުވެފައެވެ.
މަޖިލީހަށް މި ގަރާރު ތައާރަފުކުރިިއިރު ހުށަހަޅާފައިވަނީ ނިޒާމު ބަދަލުކުރުމާ ގުޅޭ ގޮތުން ރައްޔިތުން ދެކޭ ގޮތް ބެލުމުގެ ވޯޓު ނޮވެމްބަރު 30 ގެ ކުރިން ނެގުމަށެވެ. ނަމަވެސް އިލްޔާސް މިއަދު އެ ގަރާރު މަޖިލީހަށް ހުށަހެޅުއްވީ އޮކްޓޫބަރު 30 ގެ ކުރިން އެ ވޯޓު ނެގުމަށެވެ.
މިޤަރާރުގެ ބަހުސްގެ މަރުހަލާގައި އެމްޑީޕީއަށް ނިސްބަތްވާ މެމްބަރުންގެ ތެރެއިން ވާހަކަ ދެއްކީ ކާށިދޫ ދާއިރާގެ މެމްބަރު ޖާބިރު އެކަންޏެވެ. ދެން ވާހަކަ ދެއްކެވީ ޑިމޮކްރެޓްސްއާއި، ޕީޕީއެމް/ޕީއެންސީއަށް ތާއީދު ކުރާ މެމްބަރުންނެވެ.
ޤަރާރުގެ މުޅި މަޖިލިސް ކޮމެޓީގެ މަސައްކަތް ފަށާނީ މާދަމާ ހެދުނުއެވެ.
