ސިޔާސީ ކަންކަމުގައި އުޅޭއިރު އަބަދުވެސް ވާންވާނީ ރައްޔިތުންނަށް ނަމޫނާ ދައްކާ، ރީތި މިސާލު ދައްކާ ބަޔަކަށް ކަމަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ކެމްޕެއިނަށް ށ.ފުނަދޫއަށް ވަޑައިގެން ރައްޔިތުންނާއި ބައްދަލުކޮށް މުއިއްޒު ވިދާޅުވީ ސިޔާސީ ކަންކަމުގައި އުޅޭއިރު ތަފާތު ގިނަ ކަންތައްތަކާއި ދިމާވާނެ ކަމަށާއި ހިތްހަމަނުޖެހޭ ކަންތައްތައް ކުރާ ފަރާތްތަކާވެސް ދިމާވާނެ ކަމަށެވެ. އެހެންނަމަވެސް އަބަދުވެސް ވާންވާނީ ރައްޔިތުންނަށް ނަމޫނާ ދައްކާ ބަޔަކަށް ކަމަށް މުއިއްޒު ވަނީ ވިދާޅުވެފައެވެ. އަދި އެފަދަ ކަންތައްކުރާ މީހުންގެ ލެވެލަށް ނުވެއްޓި މަސައްކަތައިގެން ކުރިޔަށް ދިޔުމަށް މުއިއްޒު ވަނީ ގޮވާލައްވާފައެވެ.
އަޅުގަނޑުމެން ވާން ވާނީ ދަށު ދަރަޖައަކަށް، އެ މީހުން އެ ވެއްޓޭ ދަރަޖަ އަށް ނުވެއްޓި ތިބޭ ބަޔަކަށް. ވާން ޖެހޭނެ އަމަލާއި ބަހުން ރީތި މިސާލު ދައްކާ ބަޔަކަށް. ސިޔާސީ ވާދަވެރިޔާ އަށް ރައްދު ދިނުމުގެ ގޮތުން އެ ފަރާތުން ވެއްޓުނު ދަރަޖަ އަށް ވެއްޓިގެން ނުވާނެ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ، ދިވެހިންގެ ތެރޭގައި އޮތް އެކަކު އަނެއްކަކަށް އިހްތިރާމް ކުރުމުގެ އާދަ މިހާރު ނެތިގެން ގޮސްފައިވާ ކަމަށާއި އެއީ އަނބުރާ ގެންނަން ޖެހޭ އާދައެއް ކަމަށެވެ. އެހެން ނޫނީ މުޖުތަމައަށް ހަމަނޭވާއެއް ނުލެވޭނެ ކަމަށް ވިދާޅުވިއެވެ. އޭނާގެ ސަރުކާރެއްގައި އެ ކަމަށް ހާއްސަ ސަމާލުކަމެއް ދީގެން ތައުލީމީ ނިޒާމުގެ ތެރެއިން ކުދިންނަށް އެ އާދަތައް ދަސްކޮށްދެއްވާނެ ކަމަށް މުއިއްޒު ވިދާޅުވިއެވެ. ގައުމިއްޔަތާއި އަހުލާގު ވަކި މާއްދާއެއްގެ ގޮތުގައި ކިޔަވައިދޭނެ ކަމަށް ވިދާޅުވިއެވެ.
ފުނަދޫ ރައްޔިތުން އަރިހުން މުއިއްޒު އެދުނީ ހަމަޖެހޭ މިނިވަން މުޖުތަމައުއެއް ޤާއިމުކުރަން ބޭނުންވާ ނަމަ އޭނާއަށް އިތުބާރުކޮށް އިންތިހާބުގެ ދެވަނަ ބުރުގައި ހޮވައިދެއްވުމަށެވެ.
