ށ.އަތޮޅު ކައުންސިލް ރައީސް މުހައްމަދު ޝިޔާމްއާއި، އަތޮޅުގެ އެމްޑީޕީގެ މައި "ތަނބުތައް" ލުހިގެން ޑރ. މުއިއްޒަށް ތާއީދުކޮށް ޕީޕީއެމްއަށް ސޮއިކޮށްފިއެވެ.

ފޮނަދޫގައި މިރޭ ބޭއްވި ފޯރިގަދަ ޖަލްސާގައި މިބޭފުޅުންގެ ފޯމުތަކާއި ހަވާލުވީ ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުއިއްޒާއި، ދެ ޕާޓީ ހިންގުމާއި ހަވާލުވެ ހުންނެވި އަބްދުއްރަހީމެވެ. މިރޭ ގުޅުނު ހުރިހާ ބޭފުޅުންނަކީވެސް ށ.އަތޮޅުގެ އެމްޑީޕީ ނަގާކިޔާ އެންމެ ވަރުގަދަ އިސްނޭފުޅުންނެވެ.

މީގެ ތެރެއިންވެސް އެންމެ ބޮޑަށް ފާހަގަ ކުރެވެނީ ށ. އަތޮޅު ކައުންސިލް ރައީސްގެ މަޤާމު ފުރުއްވަމުންދިޔަ މުހައްމަދު ޝިޔާމެވެ. ޝިޔާމް ވަނީ މުއިއްޒު ށ.އަތޮޅަށް ކުރައްވާ ދަތުރުގައި ބައިވެރިވެ ހުރިހާ ރަށަކަށްވެސް ވަޑައިގެންފައެވެ.

މިރޭ މުއިއްޒަށް ތާއީދުކޮށް ޕީޕީއެމްއާއި ގުޅުނު އެމްޑީޕީ މެމްބަރުން:

– ށ. ކައުންސިލް ރައީސް މުހައްމަދު ޝިޔާމް
– ށ. ޅައިމަގު ޢަބްދުލް ޢަނީ އިބްރާހިމް
– ށ. ފުނަދޫ އެމްޑީޕީގެ އެއްތަނބު އަހުމަދު އިބްރާހިމް
– ފުނަދޫ އެމްޑީޕީ އެންމެ ވަރުގަދަ އަންހެން ކަނބަލެއް ކަމުގައިވާ މަރިޔަމް އިބްރާހިމް
– އީސާ އިސްމާއިލް
– އިސްމާއިލް އާދަމް
– ށ. ގޮއިދޫ ކައުންސިލް ރައީސް އިބްރާހިމް ޝާހިދު
– ފެނަކަ ވަޒީފައި މަސައްކަތް ކުރައްވާ، އަލީ ހަސަން
– އަލީ ވަހީދު

މުއިއްޒު ވަނީ މިބޭފުޅުން ގުޅުމުން ށ. އަތޮޅުން ސާފު މެޖޯރިޓީ މިހާރު ލިބޭނެކަމުގެ ޔަގީންކަން ލިބިފައިވާކަމަށެވެ. އަދި ފުރަތަމަ ބުރުގައި ލިބުނު ވޯޓަށްވުރެ މާގިނަ ވޯޓާއިއެކު ށ. އަތޮޅުން ބޮޑު ނަތީޖާއެއް ލިބިގެންދާނެކަމުގެ ޔަގީންކަން އޮތް ކަމަށެވެ.

މުއިއްޒު ވިދާޅުވީ ފަސޭހަ ނުކޮށް އިންތިޚާބު ކާމިޔާބު ކުރުމުގައި ކެނޑިނޭޅި މަސައްކަތް ކުރުމަށް ރައްޔިތުންގެ ކިބައިން އެދިވަޑައިގެންފައެވެ.