ކުރީގެ ނައިބު ރައީސް އަހުމަދު އަދީބު ބޭސްފަރުވާއަށް ސިންގަޕޫރުގައި ހުރުމުގެ މުއްދަތު އިތުރުކޮށްދޭން އަނެއްކާވެސް ހުށަހަޅުއްވައިފިއެވެ.

ބޭސްފަރުވާ ކުރުމަށް ރާއްޖެއިން ބޭރަށް ދިއުމުގެ ހުއްދަ ކަރެކްޝަނުން ދިނުމުން އަދީބު ސިންގަޕޫރަށް ފުރާވަޑައިގެންފައިވަނީ މިދިޔަ ޖުލައި މަހުގެ 11 ވަނަ ދުވަހުގައެވެ. ކަރެކްޝަނުން ބޭސްފަރުވާއަށް އަދީބުއަށް ދީފައިވަނީ 10 ދުވަހުގެ މުއްދަތެކެވެ. އެ މުއްދަތު މިހާރު ހަމަވެ, މުއްދަތު އިތުރުކޮށްދިނުމަށް އެދި އަދީބުގެ ފަރާތުން ކަރެކްޝަނަލް ސާވިސްގައި އެދުމުން، އެ ހުއްދަ އޮގަސްޓް 28އާ ހަމައަށް ވަނީ އިތުރުކޮށްދީފައެވެ.

އަދި އޭގެ ފަހުން ވެސް އެދިގެން މި މަހުގެ 15އާ ހިސާބަށް މުއްދަތު އިތުރުކޮށްދިނެވެ. ނަމަވެސްް އެ މުއްދަތު ފާއިތުވެ އަނެއްކާވެސް ބޭސް ފަރުވާގެ މުއްދަތު އިތުރުކޮށްދޭން އެދިފައިވާ ކަމަށް ކަރެކްޝަންސްއިން ބުނެއެވެ. ނަމަވެސް އެދިފައިވަނީ ކިހާ މުއްދަތަކަށް ކަމެއް ނޭނގެއެވެ.

ކަރެކްޝަންސްގެ މީޑިއާ އޮފިޝަލު ވިދާޅުވީ އަދީބުގެ ބޭސް ފަރުވާގެ މުއްދަތު އިތުރުކޮށްދިނުމާމެދު ގޮތެއް ނިންމާނީ ކަރެކްޝަންސްގެ ބޯޑުން ކަމަށެވެ. އަދި އެކަމާމެދު ގޮތެއް ނުނިންމާ ކަމަށް ވިދާޅުވިއެވެ.

ރާއްޖެއިން ބޭރަށް މީގެ ކުރިން ބޭސްފަރުވާއަށް ދާ ގައިދީންނަށްވެސް ދެވޭ މުއްދަތުގައި ފަރުވާ ނުނިމިއްޖެނަމަ އިތުރު މުއްދަތު ދޭކަމަށް ކަރެކްޝަންސްއިން މީގެކުރިން ވިދާޅުވެފައިވެއެވެ. އަދީބު ރާއްޖެއިން ބޭރަށް ވަޑައިގެންނެވީ އެކަމަށް ދޫކުރައްވާފައިވާ ވަގުތީ ޓްރެވަލް ޑޮކިއުމެންޓެއްގައެވެ.

އަދީބު ނިސްބަތްވެވަޑައިގަންނަވާ މޯލްޑިވްސް ތާޑްވޭ ޑިމޮކްރެޓްސް، އެމް.ޓީ.ޑީން ބުނީ އަދީބު ގެންދަވަނީ ފުރާނައަށް ނުރައްކާވާފަދަ ނާރުގެ ބައްޔަކަށް ފަރުވާ ހޯއްދަވަމުންކަމަށެވެ. އަދި އޭނާގެ ހާލު ރަނގަޅު ނޫންކަމަށްވެސް އަދީބުގެ އާއިލާއިން ބުނެފައިވެއެވެ.

އެމް.އެމް.ޕީ.އާރު.ސީގެ ކޮރަޕްޝަންގެ މައްސަލަ އަދީބުގެ މައްޗަށް ސާބިތުވެ، 20 އަހަރުގެ ޖަލު ޙުކުމެއް އިއްވާ، 2 މިލިއަން ރުފިޔާގެ ޖޫރިމަނާގެ ޙުކުމެއް އަދީބުގެ މައްޗަށް އިއްވާފައިވަނީ 2020 ވަނަ އަހަރުއެވެ. އެހެންނަމަވެސް، އަދީބުގެ ސިއްޙީ ހާލަތު ހުރި ގޮތުން، މޯލްޑިވްސް ކަރެކްޝަނަލް ސާރވިސްއިން ވަނީ އޭނާ ގޭބަންދަށް ބަދަލުކޮށްފައެވެ.