ކުޅުދުއްފުށީ ރޯހައުސްތައް އިމާރާތްކުރުމުގެ މަސައްކަތްކުރާ ބިދޭސީންގެ އެކޮމަޑޭޝަން ބްލޮކުގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފްއިން ބުނީ ކުޅުދުއްފުށި ސިޓީގެ 400 ހައުސިންގ ޔުނިޓްގެ ލޭބަރ ކުއާޓާއެއްގައި ރޯވި އަލިފާން އެމްއެންޑީއެފް ނޮދަން އޭރިއާ ކޮމާންޑް، ކުޅުދުއްފުށި ފަޔަރ ސްޓޭޝަނުގެ ފަޔަރފައިޓަރުން ހަރަކާތްތެރިވެ ނިއްވާލައިފައިވާކަމަށެވެ. އަލިފާންގަނޑު ރޯވި ވަގުތަކީ އެތަނުގައި ގިނަ ބަޔަކު ނެތް ވަގުތެއް ނަމަވެސް ބަޔަކު ނިދާފައި ތިބި ކަމަށާއި، އަލިފާން ރޯވުމުން އެމީހުން އެތަނުން ނިކުމެފައިވާކަމަށް މަންޒަރު ދުއް މީހަކު ބުންޏެވެ.
ނޮދަން އޭރިއާ ކޮމާންޑް، ކުޅުދުއްފުށި ފަޔަރ ސްޓޭޝަނަށް މިއަދު މެންދުރު 14:35 ހާއިރު ހާދިސާގެ ރިޕޯޓް ލިބުމާއެކު އެ ފަޔަރ ސްޓޭޝަންގެ ފަޔަރފައިޓަރުން ވަނީ އެ ސަރަހައްދަށް ގޮސް ރޯވެފައިހުރި އަލިފާން 15:05 ހާއިރު ވަނީ ނިއްވާލާފައެވެ.
އަލިފާން ރޯވި އެކޮމަޑޭޝަން ބްލޮކް ހުންނަ ސަރަހައްދަކީ އާންމު ގޭބިސީތައް ހުންނަ ސަރަހައްދެއް ނޫނެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަަމަށް އެމްއެންޑީއެފްއިން ބުނެއެވެ.
