ވެރިކަން ކުރާ މައި ޕާޓީ އެމްޑީޕީއާއި، ޕީޕީއެމްއަށް ނިސްބަތްވާ ގިނަ އަދަދެއްގެ މެމްބަރުން ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުއަށް ތާއީދުކޮށް ޕީޕީއެމް އާއި ގުޅިއްޖެއެވެ.
އާޓްފިޝަލް ބީޗުގައި މިރޭ އޮތް ޚާއްސަ ޖަލްސާގައި މިފޯމުތަކާއި ހަވާލުވެ ވަޑައިގެންނެވީ ރިޔާސީ ކެންޑިޑޭޓް މުއިއްޒާއި، ޕީޕީއެމް، ޕީއެންސީ ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމެވެ. ސޮއިކުރި މީހުންގެ ތެރޭގައިި ކުރީގެ ޕްރޮސެކިޓާ ޖެނެރަލް މުހުތާޒު މުހުސިންއާއި، ރައްޔިތުންގެ ޚާއްސަ މަޖިލީހުގެ މެމްބަރުކަން ކުރައްވާފައިވާ އަދި ސަރުކާރުގެ އިސް މަޤާމުތަކެއް ފުރުއްވާފައިވާ ލުބުނާ މުހައްމަދު ޒާހިރާއި، މިސަރުކާރުގެ ސްޓޭޓް މިނިސްޓަރުކަން ކުރައްވާފައިވާ މުހައްމަދު އަހުމަދުވެސް ހިމެނެއެވެ.
މީގެއިތުންވެސް ސޮއިކުރި މީހުންގެ ތެރޭގައި އެމްޑީޕީއާއި، ޕީޖީގެ އެކި ގޮފިތަކުގެ ރައީސުންނާއި، ނައިބް ރައީސުންނާއި، ޢާންމު ގިނަ އަދަދެއްގެ މެމްބަރުންވެސް ހިމެނެއެވެ.
މިފަހުން ޕީޕީއެމްއިންބާއްވާ ގިނަ އިވެންޓު ތަކުގައި ރާއްޖޭގެ އެކި ސިޔާސީ ޕާޓީތަކަށް ނިސްބަތްވާ ގިނަ އަދަދެއްގެ ބޭފުޅުން ދަނީ މުއިއްޒުއަށް ތާއީދުކޮށް ޕީޕީއެމްއާއި ގުޅެމުންނެވެ. އަދި ރަށްތަކަށް ކުރާދަތުރު ތަކުގައިވެސް އެރަށްތަކުގައި ތިއްބެވި އެމްޑީޕީއާއި، އެހެނިހެން ޕާޓީތަކަށް ނިސްބަތްވާ ގިނަ ބަޔަކު ދަނީ ޕީޕީއެމްއާއި ގުޅެމުންނެވެ.
