ކުރިއަށް ރިޔާސީ އިންތިހާބުގެ ދެވަނަ ބުރުގައި ޖުމުހޫރީ ޕާޓީގެ ތާއީދު ހޯދެއްވުމުގެ މަސައްކަތްފުޅު ކުރެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އަދި ވެސް ހުންނެވީ ޖޭޕީގެ ލީޑަރު ގާސިމްގެ އަރިހުގައި ސަން އައިލެންޑް ރިސޯޓްގައި ކަން އެނގިއްޖެއެވެ.

ރައީސް ސޯލިހް ސަން އައިލެންޑަށް ވަޑައިގަންނަވާފައިވަނީ އިއްޔެ މެންދުރު ފަހު 13:30 ކަންހާއިރުއެވެ. އަދިވެސް އެމަނިކުފާނު ހުންނެވީ އެ ރިސޯޓްގައި ގާސިމްގެ އަރިހުގައެވެ. ރައީސް މިހާރު އެ ރިސޯޓްގައި ކޯލިޝަންގެ މަޝްވަރާގައި އުޅުއްވާތާ އެތައް ގަޑިއިރެއް ވަނީ ވެފައެވެ.

ރައީސް ވަނީ މިއަދު މާލެ ވަޑައިގެންނެވުމަށް ހަމަ ޖެހިފައި އޮތްނަމަވެސް، މަޝްވަރާތައް ކުރިއަށްދާތީ އަދިވެސް ވަނީ މާލެ ވަދައިގެންނެވޭ ގޮތް ނުވެފައެވެ. ރައީސް އާއި ގާސިމް ބައްދަލުކުރައްވައި ގިނަ ވަގުތުތަކެއް މަޝްވަރާކުރެއްވުމުގައި ދަނީ ހޭދަކުރައްވަމުންނެވެ. ރޭގައިވެސް ދެ ބޭފުޅުން ވަރަށް ގިނައިރު ވަންދެން މަޝްވަރާތަކުގައި އުޅުއްވި ކަމަށް މައުލޫމާތު ލިބެއެވެ.

ރައީސްއާއިއެކު ކުރިއަށްދާ މަޝްވަރާތަކުގައި ގާސިމް ބައިވެރިކުރައްވަނީ ޓޫރިޒަމް މިނިސްޓަރު އަލީ ވަހީދާއި ވިޔަފާރިވެރިޔާ އަދި ގާތް އެކުވެރިޔާ އިސްމާއިލް ޝުޖާއު (އިންމަ) ކަމަށް ވެސް ޖޭޕީން ވިދާޅުވެފައި ވެއެވެ. އަދި އެ ދެބޭފުޅުން އެކަނި ވެސް ގިނަ މަޝްވަރާތަކެއް ކުރައްވަމުން ގެންދަވާ ކަމަށްވެސް ވިދާޅުވިއެވެ.

ކޯލިޝަން ހެދުމާއި ގުޅޭ ގޮތުން ޖުމްހޫރީ ޕާޓީން އިއްޔެ ގޮތެއް ނިންމަން ކައިރިވެފައި ވަނިކޮށް ރައީސް ސޯލިހް އިއްޔެ ސަން އައިލެންޑަށް ވަޑައިގެން ގާސިމްއާ މަޝްވަރާ ކުރައްވަން ނިންމެވިއިރު ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ ރަނިންމޭޓް ހުސެއިން މުހައްމަދު ލަތީފާއި އެ ޕާޓީގެ އިސް ބައެއް ބޭފުޅުންވެސް ސަން އައިލެންޑްގައި ކޯލިޝަން މަޝްވަރާތައް ކުރިއަށް ގެންދިޔައެވެ. ނަމަވެސް އެމަޝްވަރާތަކުން ލިބުނު ނަތީޖާއެއް އަދި ސާފެއް ނުވެއެވެ.