މިފަސް އަހަރަކީ ރާއްޖޭގެ ފަހުގެ ތާރީޚެއްގައި ދިވެހި ރައްޔިތުން އެންމެ ބޮޑަށް ނިކަމެތިކޮށް، ދިވެހިންގެ މިނިވަންކަމާއި އިސްތިޤުލާލަށް ލޮޅުން އަރުވާލި ފަސް އަހަރު ކަމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގައި ރައްޔިތުންގެ ތާއީދު އިތުރުކުރުމަށް ކުރައްވާ ބުރަ މަސައްކަތުގައި މިރޭ މާވެޔޮ މަގުގައި ބޭއްވި ފޯރިގަދަ ޖަލްސާގައި ވާހަކަ ދައްކަވަމުން ޑރ. މުއިއްޒު ވިދާޅުވީ ކެމްޕޭންގެ ފުރަތަމަ ބުރުގައި ގިނަ ރަށްތަކަށް ދެވުނު ކަމަށެވެ. ރައްޔިތުންގެ ފަރާތުން ފެނިގެން ދިޔައީ މާޔޫސްކަމާއި، ހިތްދަތިކަމާއި ކަންބޮޑުވުންކަަމަށް މުއިއްޒު ވިދާޅުވިއެވެ. ރައްޔިތުންގެ ދިރިއުޅުމުގެ ހާލަތަށް ބަދަލެއް ނައިސް މިފަސް އަހަރުވީ ރައްޔިތުންގެ ހަޔާތުން ބޭކާރުވެގެން ދިޔަ ފަސް އަހަރުގެ ގޮތުގައި ކަމަށް މުއިއްޒު ވިދާޅުވިއެވެ.
އަތޮޅު ތެރޭގެ ރަށްތަކެކޭ އެއްފަދައިން މާލެ ސިޓީގައި ދިރިއުޅޭ މީހުންގެ ފަރާތުންވެސް ފެނިގެން ދިޔައީ ހަމަ މިންޒަރުކަމަށް މުއިއްޒު ވިދާޅުވިއެވެ. ގެދޮރިވެރިކަމާއި ވަޒީފާތަކާއި، އެތަކެއް ކުލަހުވަފެން ދައްކައިގެން ވެރިކަމާއި ހަވާލުވެ ރައްޔިތުންނަށް މަތީން ހަދާން ނައްތާލައި މިސަރުކާރުން ވަނީ ބޮޑުތަނުން ރައްޔިތުންނަށް އިހުމާލު ވެފައިކަމަށް މުއިއްޒު ވިދާޅުވިއެވެ.
މާލޭގައި މިތިން ދުވަހު އެކި މަސައްކަތް ކުރެވިއްޖެ. ފެނިގެންދަނީ ރައްޔިތުން ވަރަށް ނިކަމެތި ހާލުގައި އުޅެމުންދާތަން. މިސަރުކާރުން ފަސް އަހަރޔު ބޭކާރު ކޮށްލި ފަސް އަހަރު. ޒުވާނުންނާއި، އިސްރަށްވެހިންނާއި، އަންހެނުން ވަނީ ބާކީވެ ނިކަމެތިވެފަ.
– މުއިއްޒު ވިދާޅުވިއެވެ.
ރައްޔިތުންގެ ބިކަ ހާލާއިއެކު ޤައުމުގެ މިނިވަން ކަމަށްވެސް މިސަރުކާރުން ވަނީ ވަރަށް ބޮޑަށް އިހުމާލު ވެފައިކަމަށް މުއިއްޒު ވިދާޅުވިއެވެ. ރާއްޖޭގައި އިންޑިޔާގެ ސިފައިން ތިބުމާއި، އިތުރު ތިލަފަޅު އެގްރިމަންޓާއި، ޗާގޯސް މައްސަލައާއި މިނޫންވެސް ދާޚިލީ އެތައް ކަމަކަށް ބިރާއި ނުރައްކާ އޮތް އެތައް ކަމެއް މިސަރުކާރުން ވަނީ ކޮށްފައިކަމަށް މުއިއްޒު ވިދާޅުވިއެވެ.
ރައްޔިތުން ބޭނުން ވަނީ މިކަންކަން ބަދަލުކޮށް އަމާން ސުލްހަވެރި ދިވެހިންގެ ރާއްޖެ އަލުން އިޔާދަ ވުމަށް ކަމަށާއި، އެކަން ކުރުމުގައި ދިވެހި ރައްޔިތުން ސާބިތުވެ ތިއްބެވުމަށް މުއިއްޒު ވަނީ ގޮވާލާފައެވެ. އަދި އިންތިޚާބުގެ ފަހު ބުރުގައި އެއްވެސް ރައްޔިތަކު ވަޒީފާގެ ބިރަށް، ދޭ އިންޒާރަކަށް ބެލުމެއްނެތި ކެރިގެން ވޯޓު ދެއްވުމަށް މުއިއްޒު ވަނީ އެދިވަޑައިގެންފައެވެ. މުއިއްޒު ވިދާޅުވީ މިމަހުގެ 30 ވަނަ ދުވަހު މިސަރުކާރު ރައްޔިތުން ބަދަލު ކުރާނެކަމަށާއި، އެކަމާއިއެއްވެސް ޝައްކެއްތެ ނެތްކަމަށެވެ.
މިކަމުގައި ބައިވެރިވެ މިސަރުކާރު ބަދަލު ކުރުމަށް ވޯޓު ދެއްވައިގެން ނުފޫޒުން އަނިޔާދީ، ވަޒީފާއިން ކަނޑާލައިފިނަމަ އެމީހަކަށް އެވަޒީފާއެއް އިޔާދަކޮށްދޭނެކަމަށް މުއިއްޒު ވިދާޅުވިއެވެ.
