ރިޔާސީ އިންތިޚާބުގެ ދެވަނަ ބުރުގައި ޑިމޮކްރެޓްސް އިން ތާއީދު ކުރާނެ ކެންޑިޑޭޓެއް ނިންމާނީ އެޕާޓީގެ ޢާންމު މެމްބަރުން އެދޭ ގޮތަކަށް ކަމަށާއި، މެމްބަރުން ގަބޫލު ނުކުރާނެ ގޮތަކަށް ދެވަނަބުރުގައި ވަކި ކެންޑިޑޭޓަކަށް ތާއީދު ނުކުރައްވާނެކަމަށް ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވެއްޖެއެވެ.
ރިޔާސީ އިންތިޚާބުގެ ފުރަތަމ ބުރުގައިި ރައީސް ޞާލިހަށް ޑރ.މުއިއްޒުގެ މައްޗަށް ކުރި ނުހޯދުނު އެންމެ ބޮޑު ސަބަބަކީ ދަ ޑިމޮކްރެޓްސްއެވެ. ދަ ޑިމޮކްރެޓްސް އިން ވަނީ އިންތިޚާބުގެ ފުރަތަމަ ބުރުގައި 15،000 އަށްވުރެ ގިނަ ވޯޓު ހޯދާފައެވެ. ޕާޓީ އުފައްދައި ވުޖޫދު ކުރިތާ ހަތަރު މަސްތެރޭގައި ވާދަކުރި ރިޔާސީ އިންތިޚާބުން މިހާބޮޑު ކާމިޔާބެއް ލިބުމުން އެކަމުގެ އުފާ ފާޅުކުރުމަށް މިއަދު ހަވީރު ދޮންމަނިކު ސްކައިވިއުގައި ބޭއްވި ހަވީރު ސައިފޮދުގެ ތެރެއިން ޢާންމު މެމްބަރުންނާއި ވާހަކަ ދައްކަވަމުން އިލްޔާސް ވިދާޅުވީ އާންމު މެމްބަރުން ތިބީ ކިހިނެތްކަން ސާފުވާކަމަށެވެ.
އިންތިޚާބުގެ ކެމްޕޭންގައި ޢާންމު މެމްބަރުންގެ ގޭގެއަށް ކައިރިއަށް ގޮސް ވަރަށް ބުރަ މަސައްކަތް ކުރެވިފައި ވާކަމަށާއި، އާންމު މެމްބަރުން ތިބިގޮތް މިހާރުވެސް ސާފުވާކަމަށް އިލްޔާސް ވިދާޅުވިއެވެ. އޭނާ މިހެން ވިދާޅުވުމާއިއެކު ސަޔަށްދިޔަ ޑިމޮކްރެޓްސްގެ ސަޕޯޓަރުން ވަނީ މިސަރުކާރާއި އަލުން ގުޅިގެން ނުވާނެކަމަށް ބުނެ އަޑުގަދަކޮށްފައެވެ. މިއާއިއެކު އިލްޔާސް ވިދާޅުވީ މެމްބަރުން ނޭދޭ ގޮތަކަށް ކަންކަން ނުނިންމާނެކަމަށެވެ.
މިއަދު ވަރަށް ގިނަ ބަޔަކު ކުރާ ސުވާލެއް އަޅުގަނޑުމެން ދެން ހަދާނީ ކިހިނެއްތޯ؟ އަޅުގަނޑު މިސުވާލު އަޅުގަނޑު މިކެމްޕޭންގައި ދިމާވި ވަރަށް ގިނަ މީހުންނާއި ކޮށް މިސުވާލުގެ ޖަވާބުވެސް އެނގޭ. އަދި މިހާރުވެސް ތިހުރިހާ ބޭފުޅުންގެ ވިސްނުން ފުޅާއި ކުރިއަށްދާންވީ ގޮތުގެ މައުލޫމާތު އަޅުގަނޑުމެންނަށް އެނގޭ. ކަންބޮޑުވެ ނުލައްވާ. އަޅުގަނޑުމެން ތިބޭފުޅުންނަށް، މިރާއްޖެއަށް މިޤައުމަށް މިޕާޓީއަށް ދެރަގޮތަކަށް ނުނިންމާނަން.
– އިލްޔާސް ވިދާޅުވިއެވެ.
އިލްޔާސް ވިދާޅުވީ ނިންމުން ނިންމާނީ ތެޅި ފޮޅިގަނެގެން ނޫންކަމަށެވެ. ނިންމާނީ ވިސްނުންތެރި ކަމާއިއެކު ޕާޓީިގެ ކައުންސިލާއި ގަބޫލު ކުރާ އަސާސްތަކައި، އުސޫލުތަކާއި އެކު ނޫނީ އެއްވެސް ކަމެއް ނުނިންމާނެކަމަށް އިލްޔާސް ވިދާޅުވިއެވެ. އޭނާ ވިދާޅުވީ ނިންމާ ނިންމުމެއް ވަރަށް އަވަހަށް ނިންމައި އެކަން އިއުލާން ކުރާނެކަމަށެވެ.
Democrats gadhakoh 😍❤️💪#Live @TheDemocratsMV ❤️💙❤️👏👏 pic.twitter.com/ALTvngdsxq
— Sim (@Simwarr) September 10, 2023
އިލްޔާސް މިހެން ވިދާޅުވިއިރު، ރައީސް ނަޝީދު މިއަދު ވަނީ އެމްޑީޕީއާއި ރައީސް ޞާލިހާއިއެކު ދެން ކުރިއަށް ދެވޭނެ އެއްވެސް ފޯމިއުލާއެއް ނެތްކަމުގެ އިޝާރާތެއް ކުރައްވާފައެވެ. އަދި ރައީސް ނަޝީދު ވަނީ އެމްޑީޕީގެ މެމްބަރުންވެސް އެއްބައިވަންތަ ސަރުކާރެއް އެކުލަވާލުމަށް ޑރ. މުއިއްޒާއި ބައިއަތު ހިފުމަށް އެމްޑީޕީގެ ޢާންމު މެމްބަރުންނަށްވެސް ގޮވާލާފައެވެ.
ކޮމެންޓު ފޮނުވާ