މަލްޓި ޕާޓީ ނިޒާމުގެ ތެރެއިން ރާއްޖޭގައި މިހާތަނަށް ބޭއްވުނުނު 4 އިންތިޚާބުގެ ތެރެއިން އިއްޔެ ނިމިގެންދިޔަ އިންތިޚާބަކީ އެންމެ އާދަޔާއި ޚިލާފް ނަތީޖާތަކެއް ފެނިގެންދިޔަ އިންތިޚާބެވެ.

އިންތިޚާބުގައި ވާދަވެރިވާނެކަމަށް ގިނަ ބަޔަކު ގަބޫލުކުރި ރައީސް އިބްރާހިމް މުހައްމަދު ޞާލިހާއި، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ފަރަގު އިންތިޚާބު ނިމިގެންދިޔަ އިރު ފެނުނީ ގިނަ ބަޔަކު ހީކުރި ގޮތާއި ދިމާ އިދިކޮޅަށެވެ. 130،000 ވޯޓާއިއެކު އިންތިޚަބުގެ 56 ޕަސެންޓް ވޯޓުން ފުރަތަމަ ބުރުން އިންތިޚާބު ނިންލާން ހިފި އެމްޑީޕީއަށް 40 އިންސައްތަ ވޯޓުވެސް ނުލިބުނެއެވެ.

ވެރިކަމުގެ އާރާއި ބާރާއި، ނުފޫޒާއިއެކު އަދާލަތާއި، އެމްޑީއޭގެ 20،000 އެއްހާ މެމްބަރުނާއި، އެމްޑީޕީގެ 57660 މެމްބަރުންނާއި އަދި އެތަކެއް ޖަމްއިއްޔާތަކާއި އެކުވެސް މިއިންތިޚާބުގައި ލިބުނީ 86،161 ވޯޓެވެ. މިއީ 39.05 އިންސައްތައެވެ. މުއިޒު ވަނީ އެއްވެސް ޕާޓީއެއްގެ އެހީތެރިކަމެއް ނެތި ފުރަތަމަ ބުރުގައި މިހާތަނަށް ސިޔާސީ ވަކި ފަރުދަކު ނިކުމެ ހޯދި އެންމެ ބޮޑު ނަތީޖާ ހޯދާފައެވެ. މުއިއްޒު ވަނީ 100000 ލައްކައަށް ވުރެ ގިނަ ވޯޓު ހޯއްދަވާފައެވެ.

މުއިއްޒުގެ ތާރީޚީ ކާމިޔާބާއި ކެތްތެރިކަން:

މުއިއްޒު އިންތިހާބަށް ނުކުމެވަޑައިގަތީ އެތައް ގޮންޖެހުންތަކަކާ އެކުއެވެ. އިންތިހާބުގެ ކެމްޕެއިންގައި އުޅުއްވީ އެންމެ 28 ދުވަހުއެވެ. ވަޑައިގެންނެވުނީ މަދު ރަށްތަކަކަށެވެ. ކެމްޕެއިނަށް ނުކުމެވަޑައިގަތުމުން ސަރުކާރުގެ އެތެރެއިން އެންޓި ކެމްޕެއިން އެންމެ ފަހު ވަގުތާ ހަމައަށް ވެސް ދިޔައީ ކުރިމަތިވަމުންނެވެ. ސީދާ މުއިއްޒު އަށާއި، ޢާއިލާގެ ބޭފުޅުންނަށާއި، އަނބިކަނބަލުންނަށް ނިސްބަތްކޮށް ނިކުޔާ އެއްޗެއް ނެތެވެ. މިހުރިހާ ފާޑިކިޔުންތަކަށް މުއިއްޒު އިސްކުރެއްވީ ކެތްތެރި ކަމަށެވެ.

ހުޅުމާލެ ހިމެނޭ ގޮތަށް މާލޭގެ ފަސް އަވަށަށް ބަލާއިރު ވެސް އެއްވެސް ތަނަކުން އެމްޑީޕީ އަށް ކުރިއެއް ނުހޯދެއެވެ. މިއީ، މިފަދަ ދަށް ނަތީޖާއެއް އެމްޑީޕީ އަށް މާލޭން ލިބުނު ފުރަތަމަ ފަހަރެވެ. އެންމެ ފަހުން އޮތް މަޖިލިސް އިންތިހާބުގައި މާލޭގެ ހުރިހާ ދާއިރާއަކަށް ނެގީ އެމްޑީޕީގެ މެންބަރުންނެވެ.

ހުރިހާ ސިޓީއެއް ކަހަލަ ގޮތަކަށް މުއިއްޒަށް:

މިއިންތިޚާބުގައި ޑރ. މުއިްއޒު ހޯއްދެވި އަނެއް ކާމިޔާބަކީ ރާއްޖޭގެ ސާފު އައުލަބިއްޔަތު ހޯއްދެވުމެވެ. އައްޑޫ ސިޓީ ފިޔަވައި ހުރިހާ ސިޓީއެއްގެ މެޖޯރިޓީ ވަނީ ހޯއްދަވާފައެވެ. އެންމެ ގިނަ ބަޔަކު ވޯޓުލާ މާލެ ސިޓީއަށް ސަރުކާރުން ކުރިމަތި ކުރި ނުފޫޒާއި ބާރާއިއެކުވެސް މުއިއްޒު ވަނީ ކުރި ހޯއްދަފާއެވެ. ގޯއްޗައި، ފްލެޓާއި އެތައް ވަޒީތަކާއި އެތައް އެތައް ކަމެއް ދިޔައީ ކުރަމުންނެވެ. ނަމަވެސް މިހުރިހާ ނުފޫޒަކާއިއެކު ރައީސަށް ލިބިފައިވަނީ 16،000 ވޯޓެވެ. އެއްވެސް ކޯލިޝަނެއް ނެތި، ގިނިކަންޏާ ވާދަކުރެއްވި މުއިއްޒު ވަނީ މާލޭން 22،000 ހޯއްދަވައިފައެވެ.

އިއްޔެގެ އިންތިހާބުގައި ފުވައްމުލަކުން ރައީސަށް ލިބުނީ 2،500 ވޯޓެވެ. މުއިއްޒަށް މި އިންތިހާބުގައި 3،300 ވޯޓު ލިބުނެވެ. ކުޅުދުއްފުށިން އިއްޔެގެ އިންތިހާބުގައި މުއިއްޒަށް ވަނީ ބޮޑު ތާއިދެއް ދީފައެވެ. އޭނަ އަށް 2،000 ވޯޓު ލިބުނުއިރު ރައީސަށް ހޯދުނީ 1،400 ވޯޓެވެ. އިންތިހާބު ކައިރިވެފައިވަނިކޮށް، ސިޓީއެއްގެ ދަރަޖަ ދިން ތިނަދޫން ރައީސަށް ހޯދުނީ 800 ވޯޓެވެ. އެއަށްވުރެ އިތުރަށް 1،200 ވޯޓު މުއިއްޒު ހޯއްދެވިއެވެ.

ކޯލިޝަންގެ ބައިވެރިން ހަމަ ސުމެއް:

ރައީސް ޞާލިހާއިއެކު މިއިންތިޚާބުގައި ކޯލިޝަން ހެދި ބައިވެރިންނަށް ނެރުވުނު ނަތީޖާއެއް މިއިންތިޚާބުގައި ނުދެއްކުނެވެ. ވިޔަފާރިވެރިޔާ ސަން ޓްރެވަލް ޝިޔާމާއި، ޝައިޚު އިމްރާނަށް ނަތީޖާއިން ދެއްކުނު އަދަދެއް ނެތެވެ. ބޮޑުތަނުން ހުރިހާ ހިސާބަކުންވެސް ބައްޔެވެ. ނ. އަތޮޅާއި، ދ. ހއ. ހދ. އިންވެސް ވީ ބައްޔެވެ. މިއީ ކޯލިޝަންގެ ބައިވެރިންގެ އެންމެ ވަރުގަދަ ކަމަށް ބުނާ އަތޮޅުތަކެވެ.

ދެވަނަ ބުރަކަށް އިންތިޚާބު ގޮސްފައިވާއިރު، މުއިއްޒަށް އިތުރަށް ބޭނުންވަނީ 15،000 ވޯޓެވެ. މިވޯޓު ހޯއްދެވުމަށް މުއިއްޒާއި މުއިއްޒުގެ ޓީމު އޮތީ ކުރިން ކުރި މަސައްކަތް ތިން ގުނަ އިތުރަށް ކުރާށެވެ. ކޯލިޝަން ހަދަން ޖެހޭ ބަޔަކާއި ކޯލިޝަން ހަދާ މަޝްވަރާކޮށް ދިވެހިންގެ ވެރިކަމެއް ގާއިމް ކުރުމަށް ތިބީ ކަމަރު ބަނދެގެންނެވެ.