ރިޔާސީ އިންތިހާބުގެ ވޯޓާ ދިމާކޮށް އެމްޑީޕީން ފައިސާ ބަހާ ކަމަށް ދައްކާ ވާހަކަތައް ރައީސް އިބްރާހިމް މުހައްމަދު ސޯލިހު ދޮގު ކުރައްވައިފިއެވެ.

ރައީސް އެގޮތަށް ވިދާޅުވީ ރިޔާސީ އިންތިހާބުގައި މިއަދު ވޯޓުލެއްވުމަށް ފަހު ނޫސްވެރިންނާ ވާހަކަފުޅު ދައްކަވަމުންނެވެ. ރައީސް ވިދާޅުވީ ވޯޓު ގަންނަން އެމްޑީޕީން ފައިސާ ބަހާ ވާހައަކީދޮގެއް ކަމަށެވެ.

"އެމްޑީީޕީއަކުން ފައިސާއެއް ނުބަހާނެ" ރައީސް ވިދާޅުވި އެވެ. އަދި އެކަމާ ގުޅޭ ގޮތުން އިތުރު އެއްވެސް އެއްޗެއް ރައީސް ވިދާޅެއް ނުވެއެވެ. އިންތިހާބަށް ފައިސާ ބަހަމުންދާ ކަމަށް ޕީޕީއެމްގެ އިސް ތަރުޖަމާން ހީނާ ވަލީދު ރޭ ވަނީ ވިދާޅުވެފައެވެ.

ހީނާ ވިދާޅުވީ ރޭ އެކި ރަށްރަށުގައި އެމްޑީޕީގެ ގްރޫޕްތަކުން ލާރި ބަހަމުންދާ ކަމުގެ މައުލޫމާތުވެސް ލިބެމުންދާ ކަމަށެވެ. އަދި މިކަންވެސް ކަމާ ބެހޭ ފަރާތްތަކަށް ރިޕޯޓް ކުރެވެމުންދާ ކަމަށް ހީނާ ވިދާޅުވިއެވެ. އެކަމާ ގުޅިގެން ފުލުހުންގެ ބަހެއް އަދި ނުލިބެއެވެ.

އޭގެ އިތުރުން ސްޓެލްކޯގެ ލޯންޗެއް މަހިބަދޫގެ ބަނދަރަށް ލެފުމުން އެ ދާއިރާގެ މެމްބަރު އަހުމަދު ތޯރިގު (ޓޮމް) ސަލާން ގޮވާ ލޯންޗަށް އެެރުމުން ވާ މޮހާލާ ލޯންޗްގައި ޓޮމް މަގުމައްޗަށް ގެންގޮސް، ރަހީނުކޮށްފައިވާ ކަމަށް ޕީޕީއެމުން ތުހުމަތު ކުރިއެވެ. ފަހުން ޓޮމް ވަނީ މަހިބަދު އަށް ގެންގޮސްފައެވެ.