މާދަމާގެ ވޯޓަކީ ދިވެހި ކޮންމެ ރައްޔިތެއްގެ ކުރިމަތީގައި އޮތް ބޮޑު ޤައުމީ ވާޖިބެއް ކަމަށާއި، އެވާޖިބު ހެޔޮ ގޮތުގައި އަދާކޮށް މިސަރުކާރު ބަދަލުކުރައްވައި ފުރުސަތު ދެއްވައިފިނަމަ ދިވެހިންގެ މިނިވަންކަން ހިމާޔަތްކޮށްދޭނެ ކަމުގެ ޔަގީންކަން ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ވިދާޅުވެއްޖެއެވެ.
ރިޔާސީ ކެމްޕޭން ނިންމާލުމަށް އެތައްހާސް ބަޔަކާއިއެކު މިއަދު ހަވީރު މާލޭގެ މަގުތަކުގައި ބޭއްވި ބޮޑު ހިނގާލުމަށްފަހު އާރޓްފިޝަލް ބީޗުގައި ވާހަކަ ދައްކަވަމުން މުއިއްޒު ވިދާޅުވީ މާދަމާ ދިވެހިން ލާ ވޯޓަކީ މިނިވަންކަމާިއ ގުޅިފައި އޮތް ވޯޓެއް ކަމަށެވެ. ރާއްޖޭގެ ކަނޑު ވިއްކާލި ވިއްކާލުމާއި، ދިވެހިންގެ އެތައް ބިމެއް ވަކި ޤައުމަކަށް ދީ، އެޤާއުމުގެ ސިފައިން މިފަސްގަނޑުގައި ތިބި ތިބުމަކީ އިންތިހާއަށް އޮތް ކަންބޮޑު ވުމެއްކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ މިނިވަންކަން ދަމަހައްޓާ ދިވެހިންގެ ސިޔާދަތާއި އިސްލާމީ ވަހުދަތު ހިފެއްޓުމަކީ އެންމެ ފުރަތަމަ ކުރާނެ ކަންތައް ކަމަށެވެ. އެއަށްފަހު ޤައުމުގެ ތަރައްޤީ ކޮށްދެއްވާނެކަމަށެވެ. ޤައުމުގެ ތަރައްޤީ އޮތީ ބޮޑުތަނުން ކުރަން ޖެހިފައި ކަމަށާއި، މަސްވެރިކަމާއި ދަނޑުވެރިކަމާއި އެހެން ސިނާއަތްތައްވެސް މިސަރުކާރުވަނީ ފުޑާލާފައި ކަމަށެވެ.
ދަރަނި ވަނީ އެތައް ބިލިޔަން ރުފިޔާއަކަށް ދަރުވާދާލާ. ދަރަނި ދައްކާނެ ގޮތް އެނގޭ. އިގްތިޞާދު ނަގާ ކޮޅަށް ޖަހާނީ ރައްޔިތުންނަށް އެއްވެސް ބުރައެއް ނެތްގޮަތަށް. ފައިސާ ޗާޕްކުރަނީ އިންތިހާއަށް، ފާއިތުވެދިޔަ އަހަރަކީ އެންމެ ގިނަ އަދަދަކަށް ފައިސާ ޗާޕްކުރި ފަސް އަހަރު. ފައިސާ ޗާޕް ކުރުން ހުއްޓާލާ ސަރުކާރަކަށް އަޅުގަނޑުގެ ސަރުކާރު ވާނެ.
– މުއިއްޒު ވިދާޅުވިއެވެ.
މުއިއްޒު ވިދާޅުވީ މާލެ ސަރަހައްދާއި މުޅި ރާއްޖެ ހިމެނޭހެން ހުރިހާ ރައްޔިތުންގެ ބޯހިޔާވަހިކަން ކަށަވަރު ކޮށްދެއްވާނެކަމަށެވެ. ބޯހިޔާ ވަހިކަމަކީ ވެރިކަން ނިމެން ދެ ހަފްތާއަށްވީމާ ކަނޑާއި ފަޅާއި، ޖައްވުން ދޭ އެއްޗަކަށް ނަހަދާނެކަމަށް މުއިއްޒު ވިދާޅުވިއެވެ.
ދިވެހީންގެ ކެނޑިޑޭޓް – ކެނޑިޑޭޓް ނަންބަރ 4 ޑރ.މުޢިއްޒަށް ވޯޓު ދެއްވާ ✅ #Vote4Muizzu#DrMuizzuSembe2023#DhiveheengeRaajje#FreePresidentYameen pic.twitter.com/iQeRLK7pQC
— Progressive Party of Maldives (@ProgressPartyMV) September 8, 2023
އެތައް ހާސް ބަޔަކާއިއެކު ބޭއްވި މިބައްދަލުވުމުގައި މުއިއްޒުވަނީ ޤައުމުގައި ހުރި ހުރިހާ މައްސަލަތަކެއް ހައްލުކޮށް، ރައްޔިތުން އެދޭފަދަ އިހުލާސްތެރި ވެރިކަމެއް ކޮށްދެއްވާނެކަމުގެ ޔަގީންކަން ދެއްވާފައެވެ.
