އިދިކޮޅު ޕްރޮގްރެސިވް ކޮންގްރެސް ކޯލިޝަނުން ރިޔާސީ އިންތިޚާބުގެ ކެމްޕޭންގެ އެންމެ ފަހު ހަރަކާތް ބޮޑު ހިނގާލުމަކުން ނިންމާލަން ހަމަޖެހިއްޖެއެވެ.
މިހިނގާލުމަކީ ޕީޕީއެމް/ޕީއެންސީގެ ލީޑަރޝިޕާއި ދިވެހި ރައްޔިތުން އިންތިޒާމު ކުރާ ހިނގާލުމެކެވެ. މިހިނގާލުން ފެށުމަށް ހަމަޖެހިފައިވަނީ މިއަދު ހަވީރު 3:45ގައި އާރޓްފިޝަލް ބީޗުންނެވެ. މި ހިނގާލުމުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް މުއިއްޒުއާއި، ރަނިންމޭޓް ހުސެއިން މުހައްމަދު ލަތީފްވެސް ބައިވެރިވާނެއެވެ. މާލޭގައި ބާއްވާ ބޮޑު ހިނގާލުމުގެ އިތުރުން އަތޮޅު ތެރޭގެ ރަށްތަކުގައިވެސް ކެމްޕޭން ނިންމުމަށް އެކި ހަރަކާތްތައް ދަނީ ރާވަމުންނެވެ.
މިހިނގާލުމަކީ މާލޭގެ ގިނަ އަދަދެއްގެ ޒުވާނުންނާއި، ޢާންމު ރައްޔިތުންނާއި ކަނބަލުންވެސް ބައިވެރިވެގެން ބާއްވާ ބޮޑު ހިނގާލުމެކެވެ. ހިނގާލުމުގައި ބައިވެރިވާ ބޭނުންވާ ކޮންމެ ބޭފުޅަކަށް އެފުރުސަތު ވަނީ ހުޅުވާލާފައެވެ.
ރިޔާސީ އިންތިޚާބުގެ ވޯޓުލުން މާދަމާ އޮންނާއެވެ. ވޯޓުލުން ކުރިއަށްދާނީ ހެނދުނު 8 އިން ހަވީރު 4 އަށެވެ. މުއިއްޒު ވަނީ ހުރިހާ ބޭފުޅުންވެސް ވީހާވެސް ހެނދުނާ ނިކުމެ ވޯޓުގެ ކަންކަން ނިންމުމަށް އިލްތިމާސް ކޮށްފައެވެ. އަދި މިސަރުކާރުން ވޯޓަށް ނުފޫޒު ފޯރުވައި، ހިންގާ ހުރިހާ ޖަރީމާއެއް ހުއްޓުވުމަށް ދިވެހި ރައްޔިތުން ސަމާލުވެ ތިއްބެވުމަށްވެސް މުއިއްޒު ވަނީ އިލްތިމާސް ކުރައްވާފައެވެ.
މުއިއްޒުއާއި ސެމްބެ ވަނީ މިއިންތިޚާބުގެ ކެމްޕޭންގައި 150 އަށްވުރެ ގިނަ ރަށަށް ގޮސްފައެވެ. ވަޑައިގެންނެވި ރަށްތަކުން މުއިއްޒާއި ސެމްބެއަށް ބޮޑު ތާއީދެއް ވަނީ ލިބިގެން ގޮސްފައެވެ. މުއިއްޒުގެ އަމާޒަކީ މިއިންތިޚާބު އެއްބުރުން ކާމިޔާބު ކުރުމެވެ.
ކެމްޕޭން ކުރުމުގެ ސުންގަޑިއަކީ މިއަދު އިރުއޮއްސި 6:00 އެވެ. އޭގެ ފަހުން ކެމްޕޭންގެ އެއްވެސް ކަމެއް ކުރުމަކީ ޤާނޫނީ ގޮތުން ކުށެކެވެ.
